Ponsabangi 4 - Wunta Mempori

Marasaino Sioni anu mongkokongiri 4:1-22

¹ Ha, momite ntu'u wulaa atuu, wulaa mpena atuu baali; watu mempori atuudo tetadiako a nsiuno sompo sala.

² Luwuno nana'ote Sioni anu hinao olino, anu mengkena saru wulaa motu'a, mentee ntu'u ondae mentinudu kana kuro wita wineweuno kaeno puu mpoweweu kuro.

³ Sekono serigala meweengakono uono ka mopo'uo ira anano, sine ana beine a tongkuku gagi iramo melambaha kana manu-manu unta i pada one.

⁴ Elono nana'ote kodei metako a langirano hangano mokoranga; nana'ote mpo'ema ira roti, sine nahina maupo te'asa mia mompowee.

⁵ Anu leleo mongkaa anu memo'ahi mate mokoninggo a nsala; anu leleo mentoro a wawo mpa'ulua kirimisi tepombole a howuno rompo.

⁶ Mosa'oano ana beine tongkuku lumaloio halano Sodomo, anu asa mpiniro rinongka-rongka nahina kae anu tumunduhio.

⁷ Luwuno petewawa memorina irapo sekono seru baku ka moputeopo sekono susu, koroido motahaopo sekono oluti inso a watu motaha, kana watu molowulu rupado.

⁸ Kanandio-andio rupado mo'itoopo sekono awu halo, a nsala nahi domentino'ori, kulido tengkuru a wukudo, mokari kana keu.

⁹ Me'ura irapo anu memate hangano ponai sekonopo ondae anu memate hangano mokoninggo, anu mpe'isei ka memate hangano nahina hasilino lere.

¹⁰ Saru kaeno ondaeno beine anu molusa-lusa numahu ira anado, gagi kaangado tempono dontedonta ana beine tongkuku.

¹¹ Ondae i Ue motolao luwuno tekuda-Do, umuwuo tekuda-Do anu tensila, ka mokomelangao api i Sioni, anu kumaano luwu empehino.

¹² Luwuno mokole i tolino nahi pine'ala-ala, maupo luwuno palilino wawontolino, nine ewaino ka iwali mokompewinso a laro luwuno matubono Yerusale.

¹³ Mongkona atuu gagi hangano halado nabino ka mosa'oado sando mpesombano anu i tonga-tongano me'uwuo reano mia anu nahina salano.

¹⁴ Kobangku-bangku ira kana mia morawu a nsala, tesosa'aiako rea, ranta nahi dompokotengku ira mia sangkado.

¹⁵ ”Peliahako! Mokoburu!” mia mpotae ndi ondae, ”Peliahako! Peliahako! Si tengkuo!”; ka do'amba mpolai ka mpelakopi, onaemo ka dompotae tongku: ”Sii dompo'ia tehine mbo'u i ndi'ai.”

¹⁶ Ondae i Ue sumiarawo ira, nahi Dobehe mbo'u kumita ira. Sando mpesomba nahi dompelangkai ira, ka mia memota'u nahi dompehohawa ira.

¹⁷ Matamami wela mpokekewoi pontulungi, sine nahina tuduno; inso a menara podagaia omami mposisikori asa tongku anu nahi polio montulungi.

¹⁸ Domempadasoo pelempamami, ranta nahi kimpokompesala a luwuno tanalapamami; umpedaomo tampulaano tumuwumami, sompoomo oleo ntumuwumami, oo, haweomo tampulaano tumuwumami.

¹⁹ Anu melulu kami memagasi irapo sekono manu-manu rajawali i laromeene domelulu kami a wawo ntorukuno, mentowoki kami i pada one.

²⁰ Mia anu inurapi-Do i Ue, penaano tumuwumami, kona rako a laro mpobolodo, onae anu potaemami, ”A laro mpe'engoiano kami mentuwu i olodo tongku.”

²¹ Po'undemo ka mawongkomo, hei ana beine Edomi, omue anu mo'iangario wita Usi, ndi omue mbo'u ta hawe piala, omue kogagi molangu ka u'amba mokoko'iio koroimu!

²² Tepahihiomo salamu, ana beine Sioni, nahi Ira wawako mbo'u i Ue a laro pontadia, sine salamu, ana beine Edomi, Ira sumuloo, ka luwuno halamu Ira mosabao.