Podoaa 30 - Wunta Mempori

Pontangado beine

¹ Mepau i Musa a luwuno petewawado suku Isaraeli, ”Ndiomo anu Dopeparentaako i Ue.

² Tewala asa tama montanga ke mesumpa ndi Ondae i Ue, ranta ka ipedandi, asalakono nahi moiko ilimpaio pauno atuu; asalakono iweweuo kana anu pinauno.

³ Sine tewala asa beine montanga ndi Ondae i Ue ka ipedandi i rahano amano tempono da i'ana beine,

⁴ ka irongeo amano pontanga ka pedandino anano atuu, sine amano nahi pompau hapa-hapa ndi onae, asalakono luwuno pontangano atuu ta kongko pinokogagi, kanatuukoa mbo'u sompo dandino.

⁵ Sine tewala amano umontoo tempono irongeo atuu, asalakono luwuno pontanga ka dandino anano atuu nahi ta pinokogagi; Ondae i Ue Ira umampunio beine atuu, hangano i'ontoomo amano.

⁶ Tewala beine atuu lembuino mekombia, ka onae da mepasua hangano asa inso i olono pontanga ke asa inso i olono dandi anu ipauo kanatuumokoa ka anu tetanggoako koroino,

⁷ ka irongeo tamano mongkona atuu, sine nahi pompau hapa-hapa ndi onae tempono irongeo, asalakono pontangano atuu ta pinokogagi, kanatuukoa mbo'u dandi anu tumanggoo koroino ta gagikoa mbo'u.

⁸ Sine tewala tamano atuu umontoo tempono irongeo, ka ibaliomo pontanga anu gagi pasuano beineno ka dandi anu pinauno kanatuumo koa ka anu umongoo beineno. Ira umampunio i Ue kombiano atuu.

⁹ Mongkona pontangano asa tuwu beine ke asa beine anu pinonsua, luwuno anu tumanggoo koroino ta gagi ndi onae.

¹⁰ Tewala a rahano tamano, asa beine montanga ke tumanggoo koroino a asa dandi saru mesumpa,

¹¹ ka irongeo tamano, sine nahi pompau hapa-hapa ndi onae ka nahi ontoo, asalakono luwuno pontangano beine atuu ta gagi, kanatuukoa mbo'u sompo dandi anu tumanggoo beine atuu.

¹² Sine tewala tamano atuu mekora balio tempono irongeo, asalakono maupo hapa pinau anu meluarako inso a ngangano, moiko pontanga maupo dandino nahi ta gagi. Umariomo ibalio tamano, ka Ondae i Ue Ira umampunio kombiano atuu.

¹³ Sompo pontanga ka sompo sumpa pedandino beine atuu ta me'urumako saru mepuasa, ta gagi kanatuu ke maupo nahi pokogagio tamano.

¹⁴ Sine, tewala tamano nahi pompauakono hapa-hapa ndi onae inso a oleo asa hawe a oleo tudano, ipokomengkaaomo sompo pontangano kombiano ke sompo dandi anu gagi pasuano kombiano; ipokomengkaaomo, hangano nahi pompau hapa-hapa ndi onae tempono irongeo.

¹⁵ Sine tewala nahi pokogagio ba opia tempo umarino rumongeo, asalakono onae ta tumembio salano kombiano.”

¹⁶ Onaemo luwuno pompakosi anu peparenta-Do i Ue ndi Musa mongkona asa tama ka kombiano, saru i olono asa ama ka anano beine tempono da i'ana beine i rahano amano.