Podoaa 1 - Wunta Mempori

Sorodadudo to Isaraeli dinoa

¹ Mepau Ira i Ue ndi Musa i pada one Sinai a laro Kema Tepotowoa, a ntanggala asa wula ko'orua a nta'u ko'orua umarido mpeluarako inso i wita Masiri.

² ”Doaomo porokono luwuno bawaa Isaraeli montonda luwuno suku anu kongko a laro sompo pepe'etuado. Buriomo nte'o'asa neeno luwuno tama i Isaraeli

³ anu tinuwuno rua pulu nta'u ka torea ka anu polio metea. Omue ka i Haruni asalakono buri ira montonda sorodaduno sompo suku.

⁴ Inso a sompo suku asalakono hinao asa mia anu mokowali komiu, mia anu gagi petewawado anu mpepe'etu.

⁵ Ndiomo neeno luwuno mia anu asalakono mokowali komiu. Inso a nsuku Rube: i Elisuri anano i Siedeuri;

⁶ inso a nsuku Simeo: i Selumieli anano i Surisiadai;

⁷ inso a nsuku Yehuda: i Nahasoni anano i Aminada;

⁸ inso a nsuku Isakari: i Netane'eli anano i Suari;

⁹ inso a nsuku Sebulo: i Eliabi anano i Heloni;

¹⁰ inso a inuleno i Yusupu: i Elisama anano i Amihudi inso a nsuku Eparai ka i Gamalieli anano i Pedasuri inso a nsuku Manase;

¹¹ inso a nsuku Benami: i Abidani anano i Gideoni;

¹² inso a nsuku Dani: i Ahieseri anano i Amisiadai;

¹³ inso a nsuku Asieri: i Pagieli anano i Okarani;

¹⁴ inso a nsuku Gadi: i Eliasapi anano i Rehueli;

¹⁵ inso a nsuku Napatali: i Ahira anano i Enani.”

¹⁶ Onaemo atuu luwuno mia anu bininiki inso a bawaa atuu, singge mia gagi petewawa inso a nsukudo uempu'uno. Ondaemo andio luwuno petewawado sorodadu Isaraeli.

¹⁷ Ka i'amba i Musa ka i Haruni moboi ira mia anu pinau neeno atuu,

¹⁸ ka a ntanggala asa wula ko'orua dotena ira luwuno bawaa mpepumpu. Ka do'amba bawaa mpeburi montonda luwuno suku anu a laro sompo pepe'etuado. Onaemo luwuno needo anu tinuwuno rua pulu nta'u ka torea binuri nte'o'asa,

¹⁹ kana peparenta-Do i Ue ndi Musa. Kanandiomo iburi ira i Musa i pada one Sinai.

²⁰ Inso a inuleno i Rube, anano i Isaraeli anu aka, montonda luwuno suku anu a laro mpepe'etuado, binuriomo nte'o'asa neeno luwuno tama anu tinuwuno rua pulu nta'u ka torea, luwuno mia anu polio metea.

²¹ Porokono anu binuri inso a nsuku Rube hinao pato pulu ka onoo nsowu ka lima etu mia.

²² Inso a inuleno i Simeo montonda luwuno suku anu a laro mpepe'etuado, binuriomo nte'o'asa neeno luwuno tama anu tinuwuno rua pulu nta'u ka torea, luwuno mia anu polio metea.

²³ Porokono anu binuri inso a nsuku Simeo hiano lima pulu ka osio nsowu ka tolu etu mia.

²⁴ Inso a inuleno i Gadi montonda luwuno suku a laro pepe'etuado, binuriomo neeno luwuno mia anu tinuwuno rua pulu nta'u ka torea, luwuno mia anu polio metea.

²⁵ Porokono anu binuri inso a nsuku Gadi hinao pato pulu ka olima nsowu nomo etu ka lima pulu mia.

²⁶ Inso a inuleno i Yehuda montonda luwuno suku anu a laro pepe'etuado, binuriomo neeno luwuno mia anu tinuwuno rua pulu nta'u ka torea, luwuno mia anu polio metea.

²⁷ Porokono anu binuri inso a nsuku Yehuda hiano pitu pulu ka opaa nsowu ka nomo etu mia.

²⁸ Inso a inuleno i Isakari montonda luwuno suku anu a laro pepe'etuado, binuriomo neeno luwuno mia anu tinuwuno ruapulu nta'u ka torea, luwuno mia anu polio metea.

²⁹ Porokono anu binuri inso a nsuku Isakari hinao limapulu ka opaa nsowu ka pato'etu mia.

³⁰ Inso a inuleno i Sebulo montonda luwuno suku anu a laro pepe'etuado, binuriomo neeno luwuno mia anu tinuwuno ruapulu nta'u ka torea, luwuno mia anu polio metea.

³¹ Porokono anu binuri inso a nsuku Sebulo hinao lima pulu ka opitu nsowu ka pato etu mia.

³² Mongkona inuleno i Yusupu: inso a inuleno i Eparai montonda luwuno suku anu a laro pepe'etuado, binuriomo neeno luwuno mia anu tinuwuno rua pulu nta'u ka torea, luwuno mia anu polio metea.

³³ Porokono anu binuri inso a nsuku Eparai hinao pato pulu nsowu ka lima etu mia.

³⁴ Inso a inuleno i Manase montonda luwuno suku anu a laro pepe'etuado, binuriomo neeno luwuno mia anu tinuwuno rua pulu nta'u ka torea, luwuno anu polio metea.

³⁵ Porokono anu binuri inso a nsuku Manase hinao tolu pulu ka orua nsowu ka rua etu mia.

³⁶ Inso a inuleno i Benami montonda luwuno suku anu a laro pepe'etuado, binuriomo neeno luwuno mia anu tinuwuno rua pulu nta'u ka torea, luwuno mia anu polio metea.

³⁷ Porokono anu binuri inso a nsuku Benami hinao tolu pulu ka olima nsowu ka pato etu mia.

³⁸ Inso a inuleno i Dani montonda luwuno suku anu a laro pepe'etuado, binuriomo neeno luwuno mia anu tinuwuno rua pulu nta'u ka torea, luwuno mia anu polio metea.

³⁹ Porokono anu binuri inso a nsuku Dani hinao nomo pulu ka orua nsowu ka pitu etu mia.

⁴⁰ Inso a inuleno i Asieri montonda luwuno suku anu a laro pepe'etuado, binuriomo neeno luwuno mia anu tinuwuno rua pulu nta'u ka torea, luwuno mia anu polio metea.

⁴¹ Porokono anu binuri inso a nsuku Asieri hinao pato pulu ka asa nsowu ka lima etu mia.

⁴² Inso a inuleno i Napatali montonda luwuno suku anu a laro mpepe'etuado, binuriomo neeno luwuno mia anu tinuwuno rua pulu nta'u ka torea, luwuno mia anu polio metea.

⁴³ Porokono anu binuri inso a nsuku Napatali hinao lima pulu ka otolu nsowu ka pato etu mia.

⁴⁴ Onaemo atuu porokono luwuno mia anu binurido i Musa ka i Haruni ka hopulu ka orua petewawado to Isaraeli, singge mia sumaru ngkoroio pepe'etuano.

⁴⁵ Gagi luwuno to Isaraeli anu binuri montonda pepe'etuado, luwuno mia i Isaraeli anu tinuwuno rua pulu nta'u ka torea ka anu polio metea,

⁴⁶ porokono nomo etu ka tolu nsowu ka lima etu lima pulu mia.

⁴⁷ Sine ondae anu montonda sukuno uempu'uno tewinso to Lewi, nahi dompetonda binuri meronga ondae atuu.

⁴⁸ Hangano mepau Iramo i Ue ndi Musa,

⁴⁹ ”Butu suku Lewi siimo burio ke dumoao hadiono meronga saru to Isaraeli.

⁵⁰ Sine, tena iramo medagaio Kema Mempori, po'iangano songka-Do Ue Ala saru luwuno sangka ka parewano. Ondae asalakono mentandeo Kema Mempori saru luwuno sangkano ka mpekakaakono saru mpekema melimbuo.

⁵¹ Tempono mpelungka, Kema Mempori asalakono domengkaleo to Lewi ka tempono mpekema, Kema Mempori asalakono ondae mempasao; sekono mia biasa anu merangkuhako asalakono hinuku mate.

⁵² To Isaraeli asalakono singge mekema a mpekemaano saru bandera tepo'asaano, montonda sorodaduno.

⁵³ Sine to Lewi asalakono mpekema lumimbuo Kema Mempori, po'iangano songka-Do Ue Ala, kasi dokona ntekudaako bawaa Isaraeli. To Lewi asalakono mpekakaakono Kema Mempori, po'iangano songka-Do Ue Ala.”

⁵⁴ To Isaraeli mbo'u meweweuo kona ntu'u kana parenta-Do i Ue ndi Musa. Kanandiomo anu domeweweuo.