PILIPI 1 - Wunta Mempori

Tabea 1:1-2

¹ Inso ndi Paulu ka i Timotiu, Tetenaa-Do i Kerisituu Yesu, a luwuno mia mempori ndi Ondae i Kerisituu Yesu i Pilipi, saru luwuno petewawado bawaa ka diakee.

² Pe'aroa ka rodoa inso ndi Ondae Ue Ala, Amato, ka inso ndi Ondae Ue Yesu Kerisituu kumongkomi komiu.

Pontarimakasi ka pekakai 1:3-11

³ Pontarimakasiku ndi Ondae Ue Ala sompo kurambe komiu.

⁴ Ka sompo kupekakaiakomiu luwu, wela aku mekakai saru mawongko aroa.

⁵ Pontarimakasiku ndi Ondae Ue Alaku hangano tepo'asaamiu a Lele Mawongkoa mompu'u inso a oleo amba-ambano hawe kanandio-andio.

⁶ Mongkona andio kupe'ala-alao ntu'u, onaemo Ondae, anu pu'uo anggaa anu moiko i olomiu, Ira motilaloakono hawe a pokotompaano a oleo-Do i Kerisituu Yesu.

⁷ Lano tekonaanomo kupewowolo komiu luwu kanandio, hangano omiu kongko i laro aroaku, hangano mpohawe komiu luwu tia a mpe'aroa anu kuwineeako, moiko i tempono kutinorungku, maupo i tempono kukorahakono ka mokorosoo Lele Mawongkoa.

⁸ Hangano Ondae Ue Ala sakosiiku ba kana'umpe kutedoa kumekewoiakomiu luwu pompehohawa-Do i Kerisituu Yesu.

⁹ Ka ndiomo pekakaiku, po'ineeomo ka ikoteti-tetiangino pompehohawamiu a ponto'ori anu mentee ka a hadio rupa ponto'oria,

¹⁰ ranta ka impokobinikio hapa anu moiko, ka imemempori ka nahina tataano umpeda haweano oleo-Do i Kerisituu,

¹¹ bukeako wuano menteea anu inangga-Do i Yesu Kerisituu mokomarambao ka umunde-unde Ira Ue Ala.

Ponsakosiino i Paulu a laro torungku 1:12-26

¹² Ineheku, luwuno pepaekompo, ka imento'orio, nine hapa anu gagi ndi ongkue andio onaemo pu'uno ka ikotele-teleleno Lele Mawongkoa,

¹³ ranta mengkaaomo a luwuno ihino langkanae ka luwuno mia susua, nine tinorungku aku hangano Ondae i Kerisituu.

¹⁴ Ka hadioano pepaekompo ndi Ondae i Ue mempine'ala-ala iramo hangano tinorungku aku ka dontetiangi memosia mpepau mongkona pau-Do Ue Ala ka nahi domedoito.

¹⁵ Hinao mia anu palele Ira i Kerisituu hangano kohilido ka teposisalaa, sine hinao koa mbo'u anu palele Ira saru tinoo moiko.

¹⁶ Ondae andio palele Ira i Kerisituu hangano pompehohawa, hangano domento'orio, nine kongko aku i ndi'ai kumorahakono Lele Mawongkoa,

¹⁷ sine anu mehano hangano butu tiano koroido ka saru tinoo anu komba inso a moleono aroado, potaedo ba kanandio ira mpokomobeao tinembiku a laro torungku.

¹⁸ Sine komba tembio, hangano maupo kana'umpe, Ondae i Kerisituu pinalele, moiko saru tinoo anu mosa'o maupo anu moiko. Mongkona atuu mo'unde aku. Ka aku koa mo'unde mpiha,

¹⁹ hangano kuto'orio, nine umariano luwuno andio onaemo tekaduduiaku hangano pekakaimiu ka pontulungi-Do Penaa-Do i Yesu Kerisituu.

²⁰ Hangano anu tedoa kinekewoiku ka pinerorohiku onaemo nine a luwuakoano nahi aku mokoko'ii, tendeano kanakoa mpiha, kanatuu koa mbo'u kanandio-andio, Ondae i Kerisituu mengkaa Dopinokomaramba a ngkoroiku, moiko tuwuku maupo mateku.

²¹ Hangano tuwuku ondaemo i Kerisituu ka mate onaemo uraku.

²² Sene tewala asalakono ka kutuwu i wawontolino andio, pengkonaano atuu ndi ongkue mo'angga ka ipewua. Gaagi isua anu asalakono kubinikio, nahi kuto'orio.

²³ Pinakada aku inso a orua rupa: ineheku lumako ka kupo'ia meronga saru Ondae i Kerisituu – atuu lano laluaopo moiko;

²⁴ sine mentuduopo kupo'ia i wawontolino andio hangano omiu.

²⁵ Ka a laro pompe'ala-ala andio kuto'oriomo: aku mo'ia ka meronga-ronga mbo'u saru omiu luwu ka ikomoro-morosomiu ka memawongko a laro pompe'ala-ala,

²⁶ ranta mawongkomiu ndi Ondae i Kerisituu Yesu koteti-tetiangino hangano ongkue, ba kupekule ndi omiu.

Patudu ka impeteahako koa mpiha 1:27-30

²⁷ Butu, po'ineeomo tuwumiu ka ipenunu saru Lele Mawongkoa mongkona Ondae i Kerisituu, ka kukitao ba kuhawe, ka tewala nahi kuhawe aku rumongeo, nine moroso impentade a laro aasa penaa, ka mpe'asa aroa mpeteahako tiano pompe'ala-ala anu inso a Lele Mawongkoa,

²⁸ saru nahi impondendeakono maupo tedei anu umewai komiu. Ndi ondae luwuno atuu onaemo tondonino matea, sine ndi omiu petondoni tekaduduia, ka anu atuu haweno inso ndi Ondae Ue Ala.

²⁹ Hangano ndi omiu mewineeako komba butu ka impe'ala-ala Ira i Kerisituu, tendeano ka imemarasaiako Ira koa mbo'u,

³⁰ a laro pe'iseno pinewowolo anu mengkena kana anu kinitamiu i ndi'upua ndi ongkue, ka anu rinongemiu kanandio-andio mongkona ongkue.