PILEMO 1 - Wunta Mempori

Tabea 1-3

¹ Inso ndi Paulu, asa mia hinuku hangano Ondae i Kerisituu Yesu ka inso ndi Timotiu pepaekompoto, hawe ndi Pilemo anu pinehohawa, pe'asa mpo'anggamami

² ka ndi Apapia pepaekompoto beine ka ndi Arikipu, walito mpeteahako ka a bawaa i rahamu:

³ Pe'aroa ka rodoa inso ndi Ondae Ue Ala, Amato ka inso ndi Ondae i Kerisituu kumongkomi komiu.

Pontarimakasi 4-7

⁴ Pontarimakasiku ndi Ondae Ue Alaku, sompo kurambeko a mpekakaiku,

⁵ hangano kurongeo mongkona pompehohawamu a luwuno mia mempori ka mongkona pompe'ala-alamu ndi Ondae Ue Yesu.

⁶ Ka mekakai aku, ka itepo'asaamu a pompe'ala-ala metonda umanggao ponto'oria anu moiko I oloto tia-Do i Kerisituu.

⁷ Inso a pompehohawamu mohawe akumo mawongkoa langkai ka roso, hangano aroado mia memempori utareroomo, pepaekompoku.

Po'emano i Paulu ndi Pilemo mongkona i Onesimu 8-22

⁸ Onaemo pu'uno, maupo ndi Ondae i Kerisituu malua aku tumenako hapa anu asalakono ka uweweuo,

⁹ sine mewowoloo pompehohawamu atuu, moikoopo ku'emao inso ndi omue. Ongkue, i Paulu, anu mota'u akumo, metiangi mbo'u kanandio-andio tinorungku hangano Ondae i Kerisituu Yesu,

¹⁰ kupohaweo po'emaku ndi omue mongkona anaku anu hinaweku kontongaaku a laro torungku, onaemo I Onesimu

¹¹ – i ndi'upua lano nahi upementuduo, sine kanandio-andio tedoa mentudu moiko ndi omue maupo ndi ongkue.

¹² Onae kutenao ka ipekule ndi omue – onae, onaemo wuano aroaku –.

¹³ Bakanaano ineheku umontoo i ndi'ai gagi eumu mekakaakune tempono kutinorungku hangano Lele Mawongkoa,

¹⁴ sine ba naapo u'induo, nahi kubehe moweweu hapa-hapa, ka si uweweuo anu moiko atuu kana rinokuhi, tendeano a moleono aroamu.

¹⁵ Hangano bara'ura onaemo pu'uno ka ipinonsia sarai inso ndi omue, ka upokotarimao ranta nahina tampulaano,

¹⁶ komba kana mbo'u ata, tendeano laluaopo sekono ata, onaemo gagi pepaekompo anu pinehohawa, kanatuumo ndi ongkue, tamoako ndi omue, moiko montoda mia maupo ndi Ondae i Ue.

¹⁷ Tewala utudu aku wali-walimu me'asa pompe'ala-ala, tarimaomo kana ongkue isa'a.

¹⁸ Ka tewala ipokorugikomo ka maupo mepasua ndi omue, popotembiakunemo luwu atuu –

¹⁹ ongkue, i Paulu, dumandiakono binuri ngkaeku ongkueku: Aku umowahio – ka si kupotae, ”Tembiomo luwuno atuu!” – hangano mepasuako ndi ongkue, onaemo koroimu omuemu.

²⁰ Oo pepaekompoku, po'ineeomo ka kupementuduko ndi Ondae i Ue: Tareroomo aroaku ndi Ondae i Kerisituu!

²¹ Saru me'ala-alao pomperorongeakomu, kuburiakomu andio. Kuto'orio, laalo sekonopo po'emaku andio koweweuo.

²² I larono atuu pepatindamo mbo'u metotoka aku, nde kuperorohio hangano pekakaimu aku koa pinokule ndi omue.

Tabea 23-25

²³ Tabeano i Eparasi ndi omue, waliku me'asa torungku hangano Ondae i Kerisituu Yesu,

²⁴ ka inso ndi Marakusu, i Aritariku, i Demasi ka i Lukasi, wali-waliku me'asa mpo'angga.

²⁵ Pe'aroa-Do Ue Yesu Kerisituu kumongkomio penaamiu!