Peluarakoa 3 - Wunta Mempori

¹ I Musa mompakambi asa bawaa bembe bimbano i Yitiro, ponino, sando mpesomba i Midia. Mansano wawa ira asa bawaa bembe bimba atuu me'asambaliako i pada one, haweomo i torukuno Hore, torukuno Ue Ala.

² Ka i'amba mala'eka-Do i Ue mepopokita ndi onae a laro langano api anu meluarako inso a ewo rui. Mansano kumitao, ka tengkitaomo: ewo rui atuu melanga, sine nahi mo'ai.

³ Motae i Musa, ”Aku pansia raane, aku paresao pepopokita anu mongkokongiri arau. Tembio ewo rui atuu nahi mo'ai?”

⁴ Mansa-Do kumitao i Ue, i Musa pansia ta paresao, mebooli Iramo Ue Ala inso ia tongano ewo rui atuu ndi onae, ”Musa, Musa!” ka isangki, ”Ndio aku.”

⁵ Ka Do'amba mepau, ”Si umpeda, lohuomo sandalamu, nde pentadeamu atuu, wita mempori.”

⁶ Mepau Ira mbo'u i Ue, ”Ongkuemo Ue Alado uempu'umu, Ue Alado i Burahima, i Saki ka i Yako.” Ka i'amba i Musa tumutuwio rupano, nde doitono kumita Ira Ue Ala.

⁷ Mepau Ira i Ue, ”Kukitaomo ntu'u marasaido bawaa-Ku i wita Masiri, ka Kurongeomo peboolido hangano wineweudo anu mpodagai mia mpo'angga. Kuto'oriomo ntu'u marasaido.

⁸ Onaemo ka Kupetii ta motola ira inso a ngkaedo to Masiri ka tumaate ira mpeluarako inso ia wita atuu lumako ia wita anu moiko ka malua, asa wita anu hadio ntu'u susu ka siu hoani, a mpo'iangado to Kana'a, to Heti, to Amori, to Perisi, to Hewi ka to Yebusi.

⁹ Kanandio-andio peboolido to Isaraeli haweomo ndi Ongkue. Kukitao mbo'u tedoa lansarado to Masiri mokonsii ira.

¹⁰ Gagi kanandio-andio, lakomo, Kutenako lumako ndi Pirao ka uwawa ira bawaa-Ku, to Isaraeli, mpeluarako inso i wita Masiri”

¹¹ Sine i potae i Musa ndi Ondae Ue Ala, ”Isemake ongkue andio, ka aku tepohaweakono i Pirao ka wawa ira to Isaraeli mpeluarako inso i wita Masiri?”

¹² Onaemo ka Dopepau i Ue, ”Aku koa kumongkomiko! Ndiomo petondoni ndi omue, nine ongkue anu tumenako; Tewala uwawa iramo tongku atuu mpeluarako inso i wita Masiri, komiu mpesomba ndi Ondae Ue Ala i torukuno andio.”

¹³ Ka i'amba i Musa sumangki Ira Ue Ala, ”Sine tewala lumako aku a nto Isaraeli ka kupotaeako ira: Ondae Ue Alado uempu'umiu anu tumena aku aiwa ndi omiu, ka dompesikeno ndi ongkue; Isema nee-Do? Hapa aku sumangkiako ira?”

¹⁴ Pau-Do Ue Ala ndi Musa, ”ONGKUE ONAEMO ONGKUE.” Pau-Do mbo'u, ”Kanandiomo pauako ira to Isaraeli atuu: ONGKUEMO ONGKUE anu tumena akumo aiwa ndi omiu.”

¹⁵ Umarino atuu mepau Ira Ue Ala ndi Musa, ”Kanandio pauako ira to Isaraeli: Ondae i Ue, Ue Alado uempu'umiu, Ue Alado i Burahima, i Saki ka i Yako, tumena aku aiwa ndi omiu: onaemo nee-Ku ranta nahina tampulaano ka kanatuumo nee-Ku ranta mapa'api-api inulemiu.

¹⁶ Lakomo, pumpu ira mia memotota'u to Isaraeli ka pauako ira: Ondae i Ue, Ue Alado uempu'umiu, i Burahina, i Saki ka i Yako, mepopokita iramo ndi ongkue, ka Dopepau: Kuperiokomiumo, kanatuu koa mbo'u hapa anu wineweudo ndi omiu i wita Masiri.

¹⁷ Gagi mepau Akumo: Aku tumaatekomiu mpeluarako inso a marasaiamiu i wita Masiri lumako a witado to Kana'a, to Heti, to Amori, to Perisi, to Hewi ka to Yebusi, ia asa wita anu tedoa hadio ntu'u susu ka siu hoani.

¹⁸ Tewala domperorongeakono pinaumu, lakomo saru luwuno mia memotota'udo to Isaraeli ndi mokole i wita Masiri, ka impotae ndi onae: Ondae i Ue, Ue Alado to Ibarani, hawe Iramo ndi omami; onaemo pu'uno, mpo'ema kami ndi omiu, i'eheakamimo melako i pada one otolu oleo pelempaa olaino, kami melako pompesombaako pesomba ndi Ondae i Ue, Ue Ala mami.

¹⁹ Sine lano Kuto'orio, nine mokoledo to Masiri nahi ta umeheakomiu melako, sangkadio dinadaiako kae anu moroso.

²⁰ Aku pakeo pabawa-Ku humukuo wita Masiri saru luwuakoano wineweu anu kinohali-haliako, anu Aku weweuo ndi ondae. Umarino atuu, ka do'amba mpo'ineekomiu melako.

²¹ Ka Aku weweu ira to Masiri ka dompehohawao tongku andio. Gagi, tewala komiumo melako, komba komiu melako moa ngkae,

²² Sompo beine asalakono ta mo'ema a mpehori rahano ka a beine anu mo'ia a mpehori rahano, sangka salaka ka wulaa saru sawu, pesangkado anamiu tama ka beine; kanatuumo komiu merontu ira to Masiri atuu.”