Nehemia 1 - Wunta Mempori

I Nehemia mekakaiako ira to Isaraeli

¹ Teweweuno i Nehemia anano i Hakalia. Ia wula Kisilewi ta'u korua pulu, tempono kukongko i bente Susani,

² haweomo i Hanani, asa mia inso a luwuno pepaekompoku meronga ba'opia mia inso i Yehuda. Mesikeno aku ndi ondae mongkona luwuno to Yahudi anu tola, nahi domentinawa, ka mongkona mbo'u Yerusale.

³ Mpotae ira ndi ongkue, ”Luwuno mia anu tebinta i ra'ai, anu nahi domentinawa, mekongko ira a laro masukaraa langkai ka mepinokongkodei. Benteno Yerusale rinongkaomo ka luwuno pewowa langkai sinongkoomo.”

⁴ Mansaku rumongeo lele andio, mentoro akumo mengese ka mo'inombo i larono ba'opia oleo. Mepuasa aku ka mekakai i aro-Do Ue Alano asa wawo langi.

⁵ Kupotae, ”Oo Ue, Ue Alano asa wawo langi, Ue Ala langkai pabawa-Do ka mongkokongiri, anu me'ini a mpedandia ka pompehohawa-Do a mia anu mehohawa Ira ka tumondao luwuno parenta-Do,

⁶ po'ineeono biri-Miu moronge, mata-Miu mongkita ka Irongeomo pekakai anu winuatakono tetenaa-Miu i aro-Miu meene ka wongi tiado to Isaraeli, luwuno tetenaa-Miu atuu, saru mangakuakono luwuno hala anu kimeweweuomo omami to Isaraeli ndi Omiu. Ongkue ka pe'etuku mpoweweu kamimo mbo'u hala.

⁷ Tedoa kamimo mensala ndi Omiu ka nahi kimentondao luwuno parenta, pompakosi ka atora anu Iparentaakonomo i Musa, tetenaa-Miu.

⁸ Irambeomo pau anu pinohawe-Miu ndi Musa, tetenaa-Miu, kakandio: Tewala mpelelu komiu nahi mpetenunu, Aku sumiarawo komiu i olodo luwuno tongku.

⁹ Sine tewala mpepokule komiu ndi Ongkue ka mentondao mpiha luwuno parenta-Ku saru meweweuo, manasa maupo luwuno miamiu anu tinadi mo'ia i tompano langi, Aku wali pumpu ira ka wawa ira a mpo'ianga anu Kubinikiomo ka ipo'ia nee-Ku i ra'ai.

¹⁰ Kombake luwudo andio tetenaa-Miu ka bawaa-Miu anu Ipotolaako iramo roso-Miu anu langkai ka kae-Miu anu moroso?

¹¹ Oo Ue, po'ineeomo biri-Miu rumongeo pekakaino tetenaa-Miu andio ka a pekakaido luwuno tetenaa-Miu anu inso i aroano dumoitoakono nee-Miu, ka po'ineeomo ka ime'ura tetenaa-Miu oleo andio ka mohawe pompehohawa inso a mia andio.” Tempo atuu ongkue andio puu mpo'atora inuado mokole.