Mika 1 - Wunta Mempori

Puu mpau 1:1

¹ Pau-Do i Ue anu hawe ndi Mika to Moresieti, a tempono i Yonata, i Ahasi ka i Hisikia, luwuno mokole i Yehuda, onaemo mengkena anu kinitano mongkona Samaria ka Yerusale.

Pepopoto'ori hukuno Samaria 1:2-7

² Imerongeomo, hei luwuno tongku! Impekokoongakono, hei tolino saru ihino! Po'ineeomo Ondae Ue Ala gagi sakosii ndi omiu, onaemo Ondae i Ue inso a raha-Do anu mempori.

³ Hangano menteeano Ondae i Ue meluarako inso a mpo'ianga-Do ka metii melempa a wawo luwuno pongkuno tolino.

⁴ Tepe'awuomo luwuno torukuno a ntoto karu-Do, ka luwuno lembono tebansi kana gomo i arono api, kana uwoi te'uwu a pontindulua.

⁵ Luwuno andio gagi hangano pe'ewano i Yako, ka hangano halado to Isaraeli. Hapa pe'ewano i Yako atuu? Kombake atuu Samaria? Hapa halado to Yehuda? Kombake atuu Yerusale?

⁶ Onaemo pu'uno Aku weweuo Samaria gagi howuno anu terawo a ntonga mpada, gagi po'ianga pompahoa keu anggoro. Aku walundi ira watuno a lembono ka sumungkeo luwu empehino.

⁷ Luwuno tinahano ta pinuro, luwuno tambo pebelesuno ta tinunu, ka luwuno lahumoano Aku rumawo-rawoo; hangano inso a ntambo pebelesua atuu pinumpu luwu, ka ta wali gagi tambo pebelesu.

Nabi sumabangio Yehuda ka Yerusale 1:8-16

⁸ Hangano atuu ka kumingki monsabangi ka meraali, mingki melempa nahina empehino karu ka nahi pelemba, aku mingki tumoo kana serigala ka meraali kana manu-manu unta;

⁹ hangano mobelano nahi ta tompa, haweomo i kota Yehuda, haweakoomo a mpewowa langkaino tongkuku, maupo i Yerusale!

¹⁰ Siimo pohaweo lele i Gati, siimo ntu'u pengese! Pewalundimo a laro pampawu i Beti-Le-Apira!

¹¹ Lakomo, hei palilino Sapira, saru kolambe-lambe ka mongkoko'ii. Palilino Saanani nahi sapa meluarako, ponsabangino Beti-Haeseli umonsoiko mepekadudui i ra'ai.

¹² Palilino Maroti mensalalaro ponsikori tepotolaa. Hangano masolaa metii inso ndi Ondae i Ue hawe a mpewowa langkai Yerusale.

¹³ Pasaomo ngara a ngkareta mpetea, hei palilino Lakisi! Ndiomo pompu'uano halado a ana beine Sioni, hangano ndi omuemo ihinawe pe'ewado to Isaraeli.

¹⁴ Onaemo pu'uno asalakono omue mompowee ihingkae pensuaa ndi Moresieti-Gati. Luwuno rahano i Akasibi ta gagi pompopo'oo a luwuno mokole i Isaraeli.

¹⁵ Da Aku mompotii anu mokompetuunduko, hei palilino Maresia! Marambano Isaraeli ta hawe i Adulami.

¹⁶ Keruomo ka londao ulumu, hangano luwuno ana mpinehohawamu! Weweuomo ulumu kana londa uluno manu-manu mongkaa anu mate, hangano ondae ira melako a pontadia mebintako.