Maleaki 3 - Wunta Mempori

¹ Kitao, Kutenao tinena-Ku ka ipatindao sala i aro-Ku! Nahi mengkoo-kooo Ondae i Ue anu inungkemiu atuu Ira hawe a raha-Do. Mala'eka Pedandia anu rinorondomiu atuu, menteeano hawe Ira, pau-Do Ueno luwuakoano.

² Isemake anu mokompopetea a oleo hawea-Do? Isemake anu mokompentade mpiha, tempono Dopepopokita? Hangano Ondae kana api pompokolono labu ka kana sabono puu mpolombo.

³ Ira mentoro kana mia anu mompokolono ka mompokomorina salaka. Ondae mokomorina ira to Lewi, mokomempori ira kana wulaa ka salaka. Ondaemo anu mpompesombaako pesomba ndi Ondae i Ue a laro menteea.

⁴ Pesombano Yehuda ka Yerusale ta mokomawongkoo aroa-Do i Ue kana luwuno oleo i ndi'ipua anu telaloomo ka kana luwuno ta'u i ndi'ipua anu telaloomo.

⁵ Aku aiwa umpeda ndi omiu gagi puu mpobitara. Aku ronga gagi sakosii a luwuno puu ponsihiri, luwuno mia anu mponsosabo, ka mia anu mpesumpa mpegaupi, saru mbo'u luwuno mia anu mompokonsii mia tinambo, tuwu beine, ka nana'ote nahina amano, saru anu nahi poweeako ira tia mia hawe ka nahi doito ndi Ongkue, pau-Do Ueno luwuakoano.

Mompesombaako tia hopulu 3:6-12

⁶ Menteeano Ongkue, Ue, nahi bali, ka omiu, inuleno i Yako, nahi ta pinokotampula.

⁷ Mompu'u tempono uempu'umiu mepansia komiumo inso a mpompakosi-Ku ka nahi mpekariao. Impepokulemo ndi Ongkue ka Aku mepokule ndi omiu, pau-Do Ueno luwuakoano. Sine mpotae komiu, ”Kana'umpeke kami mpepokule?”

⁸ Kana'umpeke mia mopo'oo Ira Ue Ala? Kahinaano, impopo'oo Aku. Sine, mpotae komiu, ”Kana'umpe kimpopo'oo Komiu?” Mongkona pesomba tia hopulu ka pesomba pinesusua!

⁹ Ikona komiumo totonaa, sine da impopo'oo Aku, hei omiu luwuno tongku!

¹⁰ Wawaomo luwuno tia hopulu atuu a laro raha ponaapa arataa, ka ihina pepatindaa kaanga a raha-Ku ka a rahako Akumo, pau-Do Ueno luwuakoano, nde nahi Aku umungkahiakomiu luwuno pentangoano langi ka umuwuakomiu ronso hadio ntu'u.

¹¹ Aku sumaariakomiu kosume modoko mongkaa, ka si pingkoo hasilino witamiu ka keu anggoro a mpada ka ipewuaakomiu koa, pau-Do Ueno luwuakoano.

¹² Luwuno tongku ira mpotaeakomiu manangai, hangano omiu ta gagi wita minawongkoako, pau-Do Ueno luwuakoano.

Pokotompaano ponangiado mia mentee 3:13-18

¹³ Luwuno paumiu tedoa mosa'o a mpau-Do i Ue. Sine mpotae komiu, ”Paumami anu isua umewai Komiu?”

¹⁴ Mpotae komiu, ”Nahina tuduno mesomba ndi Ondae Ue Ala. Hapake urano tompekariao pompakosi-Do ka mpelempa saru sangka po'inombo i aro-Do Ueno luwuakoano?

¹⁵ Kanandio-andio, mpotae kita mia mompelangka-langkai manangai. Mia anu mpoweweu gau mosa'o atuu komba butu me'ura, sine toola koa mbo'u maupo dome'ara-arahako Ira Ue Ala.”

¹⁶ Mia anu dumoitoako Ira i Ue mpepau pada ondaedo, ”Ondae i Ue mensiroio ka rumongeo; asa wunta pepopoto'ori binuri i aro-Do tiado mia anu dumoitoako Ira i Ue ka tiado anu melangkaio nee-Do.”

¹⁷ Ondae ira megagi bawaa pinehohawa-Ku a oleo Kupohuku, pau-Do Ueno luwuakoano. Aku mehohawa ira mengkena kana asa mia mompehohawa anano anu mekakaakono.

¹⁸ Ka komiu mpepokule mengkitao teposisinggeno mia mentee ka mia mogau mosa'o, olono mia anu mesomba ndi Ondae Ue Ala ka anu nahi pesomba ndi Ondae.