KOLOSE 1 - Wunta Mempori

Tabea 1:1-2

¹ Inso ndi Paulu, tinena-Do i Kerisituu, hangano po'ehe-Do Ue Ala, ka i Timotiu pepaekompoto,

² a luwuno pepaekompo anu mempori ka anu mpompe'ala-ala ndi Ondae i Kerisituu i kota Kolose. Pe'aroa ka rodoa inso ndi Ondae Ue Ala, Amato, kumongkomi komiu.

Pontarinakasi ka pekakai 1:3-14

³ Pontarimakasi kami mpiha ndi Ondae Ue Ala, Ama Ueto i Yesu Kerisituu, sompo kimpekakaiakomiu,

⁴ hangano kimerongeomo mongkona pompe'ala-alamiu ndi Ondae i Yesu Kerisituu ka mongkona pompehohawamiu a luwuno mia mempori,

⁵ hangano pomperorohia, anu imempinatindaako i suruga. Mongkona pomperorohia atuu se'eluomo imerongeo a mpau menteea, onaemo Lele Mawongkoa,

⁶ anu haweomo ndi omiu. Lele Mawongkoa atuu mewua ka koteti-tetiangino i asa wawontolino, kanatuu koa mbo'u i olomiu mompu'u tempono imerongeo ka mento'orio ntu'u pe'aroa-Do Ue Ala.

⁷ Luwuno atuu imento'oriomo inso ndi Eparasi, walimami pompekakaako anu pinehohawamami, anu ndi omiu onaemo puu pompekakaako-Do i Kerisituu anu metenunu.

⁸ Onae koa mbo'u anu mokomengkaao ndi omami pompehohawamiu a mpabawa-Do Penaa.

⁹ Onaemo pu'uno mompu'u tempono kimerongeo, nahi kimpenaa-naa mpekakaiakomiu. Kime'emao, ka imentarimao mperupa-rupa ponto'ori anu mentee, ka imento'orio koa ntu'u po'ehe-Do i Ue,

¹⁰ ka ipototono koa tuwumiu i aro-Do saru Dopemoikoo a luwuakoano, ka komiu mpewua a luwuno inangga anu moiko ka mentuwu a ponto'ori anu mentee mongkona Ondae Ue Ala,

¹¹ ka mempinokorosoako luwuno roso hangano pabawano maramba-Do ka imoroso aroamiu ka mensabara mentembio luwuakoano,

¹² ka pontarimakasi saru memawongko ndi Ondae i Ama, anu weweu komiu ka intekona mpohawe tia a hapa anu domempinakosiako mia memempori a poparentaa mewine.

¹³ Dopotola kitamo inso a mpabawano wongi-wongi ka lumimba kita a laro Poparentaa-Do ana-Do anu pinehohawa;

¹⁴ ndi Ondae ka tompohawe tetolosiato, onaemo po'ampunia hala.

Polalua-Do i Kerisituu 1:15-23

¹⁵ Ondaemo gambara-Do Ue Ala anu nahi tengkita, anu amba-ambano, lalua Irapo sekono luwuno anu pinokogagi,

¹⁶ hangano ndi Ondaemo ka ipinokogagi luwuakoano, anu kongko i suruga ka anu kongko i tolino, anu tengkita ka anu nahi tengkita, moiko kadera poparentaa, maupo poparentaa, moiko anu mpeparenta, maupo anu mempabawa; luwuakoano Dopokogagi ira ka tia-Do.

¹⁷ Kongko Iramo se'elu sekono luwuakoano ka luwuakoano kongko ndi Ondae.

¹⁸ Ondaemo uluno koroi, onaemo bawaa. Ondaemo anu amba-ambano, anu mewangu amba-ambano inso i olodo mia mate, onaemo ka Dolalua a luwuakoano.

¹⁹ Hangano luwuno sompo-Do Ue Ala ka ipo'ia i laro-Do,

²⁰ ka hangano Ondae Dopokompesintuwu ira luwuakoano saru koroi-Do, moiko anu kongko i tolino, maupo anu kongko i suruga, umari-Do moweweu pesintuwua hangano rea a ngkeu pinotamba-Do i Kerisituu.

²¹ Omiu mbo'u anu i ndi'upua mentuwu olai inso ndi Ondae Ue Ala ka anu mpe'iwaliako Ira i laro aroa ka pinewowolo kana anu mengkaa a mpoweweumiu anu mosa'o,

²² kanandio-andio Dopokosintuwuo, a ngkoroi-Do i Kerisituu hangano mate-Do, ka Donaa komiu mempori ka nahina tisoano ka nahina tataano i aro-Do.

²³ Onaemo pu'uno asalakono ka imemoroso aroa a pompe'ala-ala, memoroso mpiha ka nahi ntelelu, ka si mebehe ntepahe inso a pomperorohia Lele Mawongkoa, anu imerongeomo ka anu pinaleleomo i asa wawontolino i totono langi, ka anu ongkue andio, i Paulu, gagi akumo puu pompekakaakono.

Pompekakaako ka marasaino i Paulu 1:24–2:5

²⁴ Kanandio-andio kupo'undeakono marasaiku hangano omiu, ka mokosompoo a ngkoroiku hapa anu makura a ntebobarasai-Do i Kerisituu, tiano koroi-Do, onaemo bawaa.

²⁵ Gagi akumo puu pompekakaako bawaa atuu menunu saru anggaa anu Dope'ala-alaakune Ue Ala ka kupauakomiu luwu pau-Do,

²⁶ onaemo rahasia anu tewuni mapa'etu-etu nta'u ka inso a inule hawe a inule, sine anu kanandio-andio pinokomengkaa a mia memempori-Do.

²⁷ Ndi ondae Dopopoto'oriako ira Ue Ala, ba kana'umpe kaeano ka marambano rahasia atuu i olodo luwuno tongku susua, onaemo: Ondae i Kerisituu kongko Ira i tonga-tongamiu, Ondae i Kerisituu anu onaemo pomperorohia marambaa!

²⁸ Ondaemo anu pinalelemami, tewala sompo-sompo mia kimempatudu ira ka sompo-sompo mia kimempaguru ira a luwuno ponto'ori, ka kiwawa ira sompo-sompo mia a morosono pompe'ala-ala ndi Ondae i Kerisituu.

²⁹ Onaemo anu kuteahakono ka kupelulukuakono tompaano roso menunu saru pabawa-Do, anu mo'angga moroso i laroku.