I MARAKUSU 2 - Wunta Mempori

Mia luuka pinokotompa 2:1-12 (Mat. 9:1-8; Luk. 5:17-26)

¹ Ka i'amba, umarino telalo ba opia oleo, tempono Do'aiwa mbo'u i Yesu i Kapenau, tepaleleomo lele, nine kongko Ira i raha.

² Onaemo ka mehawe iramo mia mpenggowo ranta nahina mbo'u po'ianga, tendeano maupo i arono pewowa nami hina. Kontongaa-Do montutuluako ira pau-Do i Ue,

³ hinao mia mehawe mewawao ndi Ondae aasa mia luuka, domenselao opaa mia.

⁴ Sine nahi dompokowawao ndi Ondae hangano mia hadio atuu, ka do'amba me'ungkahio ato anu i wawono; mansano te'ungkahi dompotiio poturia, pepomboleano mia luuka atuu.

⁵ Mansa-Do kumitao pompe'ala-alado, mepau Iramo a mia luuka atuu, ”Hei ana-Ku halamu inampuniomo!”

⁶ Sine i tu'ai hinao mbo'u mpentoro ba opia guru agama, dompewowoloo i laro aroado,

⁷ ”Tembio mia andio ka ipepau kanatuu? Ipepauikoako Ira Ue Ala. Isema anu mokompo'ampuni hala sangkadio Ondae Ue Ala?”

⁸ Sine Doronga mokonto'orio i Yesu i laro aroa-Do, nine mpompewowolo ira kanandio, ka Do'amba motaeako ira, ”Tembio ka impompewowolo kanatuu i laro aroamiu?

⁹ Isuake anu moruanaopo, motaeakono mia luuka andio: Halamu inampuniomo, ke motae: Pewangumo, tamdeomo poturiamu ka pelempa?

¹⁰ Sine ka imento'orio, nine i wawontolino andio i Ana Manusia pabawa mo'ampuni hala” — Dopotaeakono mia luuka atuu —,

¹¹ ”Ndi omue Kupepau, pewangumo, tandeomo poturiamu ka pekulemo i rahamu!”

¹² Ka mewanguomo mia atuu, mompari-pari tumandeo poturiano ka ilako i bungkuno i arodo mia hadio atuu, ranta ka domengkohali-hali luwu ka do'amba me'unde-unde Ira Ue Ala, dompotae, ”Anu kanandio napi tohori mpongkita.”

I Lewi puu pompupu sima'ulu tumonda Ira i Yesu 2:13-17 (Mat. 9:9-13; Luk. 5:27-32)

¹³ Umarino atuu Ondae i Yesu lumako mbo'u a wiwi rano, ka luwuno mia hadio me'aiwa ndi Ondae, ka i'amba paguru ira.

¹⁴ Ka i'amba tempono Dopelempa telalo i tu'ai, Dokitao i Lewi anano i Alipeu mentoro a raha sima'ulu ka Do'amba motaeakono, ”Tonda Akumo!” Ka mentadeomo i Lewi ka i'amba tumonda Ira.

¹⁵ Ka i'amba tempono Dopongkaa i Yesu a rahano mia atuu, hadio puu pompupu sima'ulu ka mia ntehala mpongkaa mperonga-ronga saru Ondae i Yesu ka ana guru-Do, hangano hadio mia tumonda Ira.

¹⁶ I tempono domengkitao anu mponto'ori Taura inso a nto Parisi, nine Ondae mongkaa saru puu pompupu sima'ulu ka mia ntehala atuu, dompotaeako ira ana guru-Do, ”Tembio ka Dopongkaa merongaako ira puu pompupu sima'ulu ka mia ntehala?”

¹⁷ Dorongeo i Yesu ka Dopotaeako ira, ”Komba mia madoo anu mongkere sando, sine mia mahaki; Komba ndio Aku hawe mompoboi mia mentee, tendeano mia ntehala.”

Mongkona puasa 2:18-22 (Mat. 9:14-17; Luk. 5:33-39)

¹⁸ I asa tempo, tempono ana guruno i Yohane ka to Parisi kontongaado mempuasa, mehawe iramo mia ka mempauako Ira i Yesu, ”Tembio ana guruno i Yohane ka ana gurudo to Parisi ka domempuasa, sine ana guru-Miu naahi?”

¹⁹ Sumangki ira i Yesu, ”Polioke ira mempuasa sambe'eno umbu ngkoroi tama sekono umbu ngkoroi tama atuu merongaako ira? I tempo umbu ngkoroi tama atuu merongaako ira, nahi ira mempuasa.

²⁰ Sine ta hawe tempono umbu ngkoroi atuu inala inso ndi ondae, ka i tempomo atuu ira mempuasa.

²¹ Nahina maupo te'asa mia anu motompeliako asa nsore sawu wo'ohu a lemba anu laano, hangano tewala kanandio sawu potompeli atuu ta berio, anu wo'ohu ta berio anu laano, ka i'amba kolangka-langkaino teberino.

²² Kanatuu koa mbo'u nahina maupo te'asa mia mo'ihii anggoro anu da sarai a ngkadu kuli anu tehineomo, hangano tewala kanatuu anggoro atuu ta berio kadu kuli atuu, ranta anggoro atuu ka kaduno oruano tinadi. Sine anggoro anu da sarai asalakono ninaa a laro ngkadu anu da sarai mbo'u.”

Ana guru mpo'opu wua gandu a oleo Saba 2:23-28 (Mat. 12:1-8; Luk. 6:1-5)

²³ I asa tempo, a oleo Saba, Ondae i Yesu melempa telalo a lere gandu, ka kontongaado mpelempa ana guru-Do mpo'opu tonggino gandu.

²⁴ Ka mpotae iramo to Parisi ndi Ondae, ”Kitao! Tembio ka domeweweu aasa anu inonto a oleo Saba?”

²⁵ Dosangki ira, ”Napi horike mebasao hapa anu wineweuno i Daudi, tempono onae ka ondae anu mentondao memakura ka memokoninggo,

²⁶ kana'umpe ipewinso a laro Raha-Do Ue Ala tempono i Abiata gagi Sando mpesomba Langkai ka i'amba kumaano roti pesomba atuu – anu nahi moiko ikinaa sangkadio luwuno sando mpesomba – ka ipoweeako ira mbo'u anu mentondao?”

²⁷ Ka Do'amba i Yesu motaeako ira, ”Oleo Saba wineweu tiano mia komba mia tiano oleo Saba,

²⁸ gagi i Ana Manusia Ueno koa mbo'u oleo Saba.”