Imama 4 - Wunta Mempori

Pesomba po'onini hala

¹ Ondae i Ue mepau ndi Musa,

² ”Pauako ira to Isaraeli: Tewala asa mia nahi pe'inungako moweweu hala aasa anu inonto-Do i Ue, ka lano iweweu asa inso ndi onae,

³ ka tewala anu moweweu hala atuu sando mpesomba anu inurapi, ranta kai pokontehala ira bawaa, onae asalakono mompesombaako ndi Ondae i Ue asa sapi laki mongura anu nahina tataano gagi pesomba po'onini hala, hangano hala anu iweweuono atuu.

⁴ Asalakono iwawao sapi atuu a mpewowa Kema Tepotowoa, i aro-Do i Ue, ka i'amba numaao kaeno a wawo uluno sapi atuu ka isumbeleo i aro-Do i Ue.

⁵ Sando mpesomba anu inurapi atuu asalakono mo'ala asa ntia inso a reano sapi atuu, ka i'amba wawao i larono Kema Tepotowoa.

⁶ Sando mpesomba asalakono umemoo wunga ngkaeno a laro rea atuu ka itawisiakono tedei inso a rea atuu pepitu i aro-Do i Ue, i arono sawu pelingo po'oloti a mpo'ianga mempori.

⁷ Ka i'amba sando mpesomba atuu asalakono monaakono tedei inso a rea atuu a ntandu-tanduno meda pontunua pesomba anu mana dupa inso rampa mo'ahi woono anu kongko i aro-Do i Ue a laro Kema Tepotowoa. Toreano inso a reano sapi atuu asalakono i'uwuo i totono meda pontunua pesomba tinunu i arono pewowa Kema Tepotowoa.

⁸ Luwuno tabano sapi lakino pesomba po'onini hala atuu asalakono pinonsia inso a nsapi atuu, moiko taba anu walungio ihi kompo maupo luwuno taba anu metako a ihi kompo atuu,

⁹ saru orua wua hori ka taba anu metako anu mo'ia i horino ka ateno anu moiko ntu'u umpeda wua hori atuu asalakono pinonsia,

¹⁰ mengkena kana anu pinonsia inso a nsapi pesomba tekaduduia. Sando mpesomba asalakono tumunuo luwu i wawono meda pontunua pesomba tinunu.

¹¹ Sine kulino sapi laki atuu ka luwuno bauno, uluno ka witino, ihi kompo ka ta'ino,

¹² luwuno sapi lakino atuu, asalakono iwawao i bungkuno pekemaa, i asa po'ianga anu morina, a mpo'ianga pontadia awu. Sapi atuu asalakono tinunu ranta kai pingko i wawono keu ponahu a mpo'ianga pontadia awu.

¹³ Tewala anu moweweu hala nahi pe'inungako atuu luwuno bawaa Isaraeli, ka bawaa atuu nahi pokonto'orio ranta ka dompoweweu aasa anu inonto-Do i Ue ka domentehala,

¹⁴ tewala hala anu wineweudo atuu domento'orio, asalakono bawaa mpopesombaako asa sapi laki mongura gagi pesomba po'onini hala. Sapi atuu asalakono domewawao i arono Kema Tepotowoa.

¹⁵ Luwudo mia memota'u bawaa asalakono menaao kaedo i wawo uluno sapi laki atuu i aro-Do i Ue, ka i'amba sapi atuu asalakono sinumbele i aro-Do i Ue.

¹⁶ Sando mpesomba anu inurapi asalakono iwawao asantia inso a reano sapi atuu i larono Kema Tepotowoa.

¹⁷ Sando mpesomba atuu asalakono umemoo wunga ngaeno a rea atuu ka itawisiakono pepintu i aro-Do i Ue, i arono sawu pelingo.

¹⁸ Ka i'amba tedei inso a rea atuu asalakono iponaakono a ntandu-tanduno meda pontunua pesomba i aro-Do i Ue a laro Kema Tepotowoa. Toreano inso a rea atuu asalakono i'uwuo i totono meda pontunua pesomba tinunu i arono pewowa Kema Tepotowoa.

¹⁹ Luwuno taba asalakono iponsiao inso a nsapi atuu ka itunuo i wawono meda pontunua pesomba.

²⁰ Kanandiomo asalakono iweweuo a nsapi lakino atuu: kana anu iweweuo a nsapi lakino pesomba po'onini hala, kanandiomo asalakono iweweuo a nsapi atuu. Ba kanandio sando mpesomba atuu moweweuako ira pesintuwua, ranta ka dompohawe po'oninia hala.

²¹ Asalakono iwawao sapi lakino atuu i bungkuno pekemaa, ka i'amba tinunu ranta kai pingko kana itunuo ranta kai pingko sapi laki amba-ambano. Onaemo atuu pesomba po'onini halado bawaa.

²² Tewala anu moweweu hala atuu asa mia petewawa, anu nahi pe'inungakono weweuo hala asa i olono anu inonto-Do i Ue, Ue Alano, ranta kai tehala,

²³ ka tewala hala anu iweweuomo atuu pinauako ndi onae, asalakono iwawao asa bembe lakino anu nahina tataano gagi pesomba.

²⁴ Ka i'amba asalakono inaao kaeno a wawao uluno bembe atuu ka isumbeleo a mpo'iangado mia wela ponsumbele pesomba tinunu i aro-Do i Ue; onaemo atuu pesomba po'onini hala.

²⁵ Ka i'amba sando mpesomba asalakono mo'alaako wunga ngkaeno tedei inso a reano pesomba po'onini hala atuu, ka i'amba mehahiakono a ntandu-tanduno meda pontunua pesomba tinunu. Toreano inso a rea atuu asalakono i'uwuo i totono meda pontunua pesomba tinunu.

²⁶ Sine luwuno taba asalakono itunuo a wawo meda pontunua pesomba, kana koa mbo'u tabano pesomba tekaduduia. Kanandiomo sando mpesomba moweweuakono mia atuu pesintuwua a halano, ranta kai pohawe te'oninino halano.

²⁷ Tewala anu moweweu hala nahi pe'inungako atuu inso a palili mongkokolaro ka iweweuo asa i olono anu inonto-Do i Ue, ranta kai tehala,

²⁸ ka tewala hala anu wineweuno atuu pinauako ndi onae, asalakono iwawao asa bembe waino anu nahina tataano gagi pesomba hangano hala anu wineweuno atuu.

²⁹ Ka i'amba asalakono inaao kaeno a wawo uluno pesomba po'onini hala ka sumumbeleo pesomba po'onini hala atuu a mpo'iangano pesomba tinunu.

³⁰ Ka i'amba sando mpesomba asalakono mo'alaako wunga ngkaeno tedei inso reano pesomba atuu ka i'amba mehahiakono a ntandu-tanduno meda pontunua pesomba tinunu. Toreano inso a reano atuu asalakono i'uwuo i totono meda pontunua pesomba.

³¹ Sine luwuno taba asalakono iponsiao, kana taba pinonsia inso a mpesomba tekadudui, ka i'amba sando mpesomba tumunuo i wawono meda pontunua pesomba anu woono mokomawongkoo aroa-Do i Ue. Ba kanandanio sando mpesomba moweweu pesintuwuano mia atuu, ranta kai pohawe te'oninino halano.

³² Tewala pesomba anu winawano asa bimba gagi pesomba po'onini hala, asalakono iwawao anu waino ka nahina tataano.

³³ Ka i'amba asalakono inaao kaeno a wawo uluno pesomba po'onini hala atuu, ka sumumbeleo gagi pesomba po'onini hala a mpo'iangado mia wela ponsumbele pesomba tinunu.

³⁴ Ka i'amba sando mpesomba asalakono mo'alaako wunga ngkaeno tedei inso a reano pesomba po'onini hala atuu, ka i'amba mehahiakono a tandu-tanduno meda pontunua pesomba tinunu. Toreano inso a rea atuu asalakono i'uwuo i totono meda pontunua pesomba.

³⁵ Sine luwuno tabano iponsiao, kana taba pinonsia inso a bimba pesomba tekaduduia, ka i'amba sando mpesomba tumunuo i wawono meda pontunua pesomba i wawono pesomba ndi Ondae i Ue anu tinunuako api. Kanandiomo sando mpesomba moweweuakono mia atuu pesintuwua a hala anu wineweuno, ranta kai pohawe po'oninia hala.