Imama 21 - Wunta Mempori

Memporido luwuno sando mpesomba 21:1-24

¹ Ondae i Ue mepau ndi Musa, ”Pepaumo a luwudo sando mpesomba, luwuno anano i Haruni ka potaeako ira: Asa sando mpesomba si weweuo koroino mokoburuako mia mate i olodo mia pe'asa tongkuno,

² sangkadio tewala anu mate atuu pe'etuno umpeda: ineno, amano, anano tama ke beine, pepaekompono tama,

³ pepaekompono beine anu da ana beine ka umpeda saru onae hangano napi pekombia. Saru ondae atuu moiko imokoburuakono koroino.

⁴ Gagi tamano kombiano siimo ipo'ineeo koroino mokoburu i olodo mia pe'asa tongkuno ka anu kanandio molalo memporino.

⁵ Si mengkeruo asantia wuuno uluno, mengkeruo wiwino danggono, ka mensorekio kuli ngkoroino.

⁶ Ondae asalakono mempori ndi Ondae Ue Alado ka si domelaloo memporino nee-Do Ue Alado. Hangano ondaemo anu mpopesombaako luwuno pesomba tinunu ndi Ondae i Ue, gagi pesomba ndi Ondae Ue Alado, ka hangano atuu ondae asalakono mempori.

⁷ Si dompo'ala asa beine belesu ke anu nahi da ana beine ke anu pinonsuano tamano, hangano sando mpesomba atuu mempori ndi Ondae Ue Alano.

⁸ Asalakono imentuduo onae mempori, hangano onaemo anu mompesombaako pesomba ndi Ondae Ue Alamiu. Onae asalakono mempori ndi omiu, hangano Ongkue, Ue, anu mokomempori komiu mempori.

⁹ Tewala ana beine anano asa sando mpesomba mo'ineeo memporino koroino gagi pebelesua, onae lumaloo memporino amano, ka onae asalakono tinunu a api.

¹⁰ Sando mpesomba langkai i olodo luwuno pepaekompono anu umariomo inurapiako lana po'urapi inuwu i wawo uluno, ka anu rinonso saru pinokonaako ndi onae sangka mempori, siimo ipo'ineeo wuuno tekale ka siimo ipoberi sangkano.

¹¹ Siimo i'umpedaakono luwuno wata ngkoroi, tendeano onae si pokomokoburuo koroino hangano wata ngkoroino amano ke ineno.

¹² Siimo ipeluarako inso a mpo'ianga mempori kasi laloo memporino po'ianga mempori-Do Ue Alano, hangano onae pinesusuaako lana po'urapi-Do Ue Alano i wawo uluno. Ongkuemo Ue.

¹³ Onae asalakono mo'ala asa beine anu da ana beine.

¹⁴ Siimo ipo'ala asa tuwu beine, beine anu pinensuaako anu sinolangi memporino, ke beine belesu, tendeano asalakono asa da ana beine inso i olodo mia pe'asa tongkuno,

¹⁵ kasi laloo memporino inuleno i olodo mia pe'asa tongkuno, hangano Ongkuemo Ue anu mokomemporio.”

¹⁶ Ondae i Ue mepau ndi Musa,

¹⁷ ”Pauakonomo i Haruni, kanandio: Sompo mia inso i olodo luwuno inulemu anu hinao tataano, nahi moiko i'aiwa umpeda ta mompesombaako pesomba ndi Ondae Ue Alano.

¹⁸ Menteeano sompo mia anu hinao tataano nahi moiko i'aiwa umpeda: mia morawu, mia tiimpa karu, mia anu hinao tataano a rupano, mia anu ondau lahi parewa ngkoroino,

¹⁹ mia anu tepudu karuno ke kaeno,

²⁰ mia anu mempalasa ke biilo ke anu sirere matano, mia anu mengkumbi ke merasa ke anu masola wuku nsu'uluino.

²¹ Sompo mia inso a inuleno sando mpesomba Haruni anu hinao tataano, nahi moiko i'aiwa ta mompesombaako luwuno pesomba anu tinunu ndi Ondae i Ue. Hangano onae hinao tataano siimo i'aiwa umpeda ta mompesombaako pesomba ndi Ondae Ue Alano.

²² Mongkona pesomba ndi Ondae Ue Alano, moiko luwuno pesomba tedoa mempori maupo luwuno pesomba mempori moiko ikaano.

²³ Butu siimo i'aiwa hawe a nsawu pelingo ka siimo i'umpedaakono meda pontunua pesomba, hangano onae hinao tataano, kasi laloo memporino luwuno po'ianga mempori-Ku, hangano Ongkuemo Ue, anu mokomempori ira.”

²⁴ Kanandiomo ipohawe i Musa pau atuu ndi Haruni ka luwuno anano saru luwuno to Isaraeli.