Imama 11 - Wunta Mempori

Kondehora anu mokoburu ka anu nahi mokoburu

¹ Ondae i Ue mepau ndi Musa ka ndi Haruni, kanandio,

² ”Pauako ira to Isaraeli, Ndiomo luwuno kondehora anu moiko imengkaano inso a luwuno kondehora anu kongko i tolino:

³ sompo kondehora anu mekuku tebansi anu kukuno me'olo ondau ka anu wali ngumaio kaangano moiko imengkaano.

⁴ Sine ndiomo anu nahi moiko imengkaano inso anu wali ngumaio kaangano ke mekuku tebansi: onta, lano wali ngumaio kaangano sine nahi pekuku tebansi, mokoburu ndi omiu;

⁵ pelandu, lano wali ngumaio kaangano sine nahi pekuku tebansi, mokoburu ndi omiu;

⁶ kelinci, lano wali ngumaio kaangano sine nahi pekuku tebansi, mokoburu ndi omiu;

⁷ Bonti mbo'u mokoburu ndi omiu hangano bonti lano mekuku tebansi, kukuno me'olo ondau sine nahi wali ngumaio kaangano.

⁸ Bauno luwuno kondehora atuu si mengkaano ke medanggio kondehora anu mate. Luwuno atuu mokoburu ndi omiu.

⁹ Ndiomo anu moiko imengkaano inso a luwuno anu tuwu a laro uwoi: luwuno anu melowiri ka mekaransa a laro uwoi, a ntahi, ka a ngkorono. Luwuno atuu moiko imengkaano.

¹⁰ Sine luwuno anu nahi pelowiri ke mekaransa i tahi ka i korono, moiko luwuno anu mpebawaa a laro uwoi maupo luwuno anu mentuwu anu kongko a laro uwoi, luwuno atuu mokoburu ndi omiu.

¹¹ Menteeano luwuno atuu mokoburu ndi omiu. Bauno si mengkaano ka kondehora anu mate asalakono imemokoburuakono.

¹² Luwuno anu nahi melowiri ka nahi mekaransa a laro uwoi, imemokoburuakono.

¹³ Ndiomo luwuno manu-manu anu gagi mokoburua ndi omiu kasi mengkaano hangano luwuno atuu mokoburu: manu-manu rajawali, singko medanggo ka singko ntahi,

¹⁴ mperupa-rupa singko motaha ka singko mo'ito;

¹⁵ mperupa-rupa manu-manu paa-paa;

¹⁶ manu-manu unta, koa, camari, ka mperupa-rupa singko sikapi;

¹⁷ manu-manu punggu, manu-manu dendangi uwoi ka koa langkai;

¹⁸ manu-manu koa mopute, undani, ka manu-manu eringi;

¹⁹ manu-manu timba'u, mperupa-rupa manu-manu koro, meragai ka poneki.

²⁰ Luwuno kondehora anu melele, mepani ka melempaako opaa karuno, onae mokoburua ndi omiu.

²¹ Sine ndiomo anu moiko imengkaano inso a luwuno kondehora anu melele, mepani ka melempaako opaa karuno, onaemo anu hinao wuku lodino i wawono karuno pelonsono i wawo wita.

²² Ndiomo anu moiko imengkaano inso i olono: mperupa-rupa kosume: onaemo sompo rupano kosume gambara, sompo rupano kosume kuni ka kosume pae.

²³ Sine luwuno kondehora anu melele, mepani ka mekaru opaa onaemo mokoburua ndi omiu.

²⁴ Luwuno anu tudano andio ta weweu komiu mokoburu, sompo mia anu tedanggi a kondehora anu mate, gagi mokoburu hawe sumoo oleo,

²⁵ ka sompo mia anu mowawa kondehora anu mate asalakono iwo'ohio sangkano, ka onae gagi mokoburu hawe sumoo oleo.

²⁶ Sompo kondehora anu mekuku tebansi, sine nahi me'olo ondau ka nahi wali mongai kaangano, luwuno mokoburu ndi omiu. Sompo mia anu dumanggio gagi mokoburu.

²⁷ Kanatuu koa mbo'u luwuno anu melempaako pelengkaruno i'olono luwuno kondehora anu melempaako opaa karuno, luwuno atuu mokoburu ndi omiu. Sompo mia anu dumanggio kondehora mate atuu, gagi mokoburu hawe sumoo oleo.

²⁸ Isema anu mowawa kondehora mate atuu, asalakono iwo'ohio sangkano ka onae gagi mokoburu hawe sumoo oleo. Luwuno atuu mokoburu ndi omiu.

²⁹ Ndiomo anu mokoburu ndi omiu i olono luwuno kondehora melele anu mpebawaa i wawo wita: celuru, tehu, ka mperupa-rupa tumpa,

³⁰ saru landaki, kimbohu, kadali, uho, bungulo.

³¹ Onaemo luwu anu mokoburu ndi omiu i olono luwuno kondehora melele. Sompo mia anu dumanggio luwuno kondehora anu mateomo atuu, mia atuu gagi mokoburu hawe sumoo oleo.

³² Luwuakoano gagi mokoburu, tewala asa inso a luwuno kondehora atuu mate ka itedonta i wawono, moiko parewa keu hapamokoa maupo sangka ke kuli ke kampili. Sompo sangka anu pinake mo'angga hapamo koa asalakono wininso a laro uwoi; sangka atuu mokoburu hawe sumoo oleo, ka i'amba wali morina.

³³ Tewala asa inso a luwuno kondehora atuu tedonta a laro ngkuro wita, asalakono luwuno anu kongko i larono gagi mokoburu ka kuro atuu asalakono impehao.

³⁴ Luwuno kaanga anu moiko ikinaa gagi mokoburu tewala ikonao uwoi inso a ngkuro atuu, ka luwuno inua anu moiko i'ininu gagi mokoburu a laro ngkuro kana atuu.

³⁵ Tewala kondehora mate asa inso i olono luwuno kondehora atuu tedonta i wawono sangka hapamokoa, sangka atuu gagi mokoburu; pontunua roti awu kodei asalakono pinuro, hangano luwuno atuu mokoburu ka asalakono mokoburu mbo'u ndi omiu.

³⁶ Sine, mata uwoi ke sumuru anu me'ihi uwoi, morina mpiha, sekono isema anu dumanggio luwuno kondehora mate atuu gagi mokoburu.

³⁷ Tewala i olono asa kondehora mate inso a luwuno kondehora atuu tedonta i wawono inii anu ta rinawo, inii atuu nahi mokoburu mpiha.

³⁸ Sine tewala inii atuu inuwoiomo, ka i wawo inii atuu tedonta asa kondehora mate atuu, manasa inii atuu mokoburu ndi omiu.

³⁹ Tewala asa kondehora anu gagi kaangamiu mate, ka isema anu dumanggio kondehora mate atuu gagi mokoburu hawe sumoo oleo.

⁴⁰ Isema anu kumaano kondehora mate atuu, asalakono ilomboo sangkano ka onae gagi mokoburu hawe sumoo oleo. Kanatuu koa mbo'u isema anu mowawa kondehora mate, asalakono ilomboo sangkano ka onae gagi mokoburu hawe sumoo oleo.

⁴¹ Luwuakoano kondehora melele anu mpebawaa i wawo wita, onaemo mokoburua si mengkaano.

⁴² Luwuno anu melempaako kompono ka luwuno anu melempaako opaa karuno ke luwuno anu mekaru hadio, luwuno anu tewinso kondehora melele anu mpebawaa i wawo wita, si mengkaano hangano luwuno atuu mokoburua.

⁴³ Si meweweuo koroimu mokoburuako sompo kondehora melele anu mpebawaa ka si meweweuo koroimu mokoburuako luwuno atuu, nde hangano onaemo kai megagi mokoburu.

⁴⁴ Hangano Ongkuemo Ue, Ue Alamu; asalakono ipokomemporio koroimu ka asalakono kai memempori, hangano Ongkue andio mempori. Si meweweuo koroimu mokoburuako sompo kondehora melele anu mpebawaa i wawo wita.

⁴⁵ Hangano Ongkuemo Ue anu wawa komiumo mpeluarako inso i wita Masiri, kai gagi Ue Alamiu. Imegagimo mempori, hangano Ongkue andio mempori.

⁴⁶ Onaemo songka mongkona kondehora mekaru opaa, luwuno manu-manu, ka luwuno anu tuwu anu melelu i laro uwoi ka luwuno anu tuwu anu melele a wawo wita.

⁴⁷ Songka atuu anu mosinggeo i olono anu mokoburu ka anu nahi mokoburu, i olono kondehora anu moiko imengkaano ka anu nahi moiko imengkaano.”