Imama 1 - Wunta Mempori

Pesomba tinunu

¹ Ondae i Ue moboio i Musa ka Dopepau inso a laro Kema Tepotowoa,

² ”Pepaumo a nto Isaraeli ka pauako ira: Tewala asa mia inso i olomu ta mompowe pesombano ndi Ondae i Ue, asalakono pesomba anu komiu mpesombaakono atuu inso a mpinotuwu, ke sapi ke asa bawaa bembe bimba.

³ Tewala pesombano anu tinunu inso a nsapi, asalakono ipesombaakono anu lakino ka nahina tataano. Asalakono iwawao a mpewowano Kema Tepotowoa, kai moiko i aro-Do i Ue.

⁴ Ka i'amba numaao kaeno a wawo uluno pesomba tinunu atuu, ranta pesomba atuu, pinemoiko wineweu pesintuwua ndi onae.

⁵ Ka i'amba onae asalakono sumumbeleo sapi atuu i aro-Do i Ue. Ka i'amba luwuno anano i Haruni, luwuno sando mpesomba atuu, asalakono mpesombaakono reano sapi atuu ka domensiwuiakono liimbu a meda pontunua pesomba, i arono pewowano Kema Tepotowoa.

⁶ Umarino atuu asalakono ikulisio pesomba tinunu atuu kai batu-batuo montonda tiano.

⁷ Luwuno anano sando mpesomba i Haruni asalakono mponaa api i wawono meda pontunua pesomba ka mpotudao keu i wawono api atuu.

⁸ Luwuno anano i Haruni, luwuno sando mpesomba atuu asalakono me'atorao luwuno batuno pesomba atuu, saru uluno ka tabano i wawono keu anu kontongaano melanga i wawono meda pontunua pesomba.

⁹ Ihi kompono ka witino asalakono wino'ohiako uwoi ka sando mpesomba tumunuo luwu i wawono meda pontunua pesomba, gagi pesomba tinunu anu woono mokomawongkoo aroa-Do i Ue.

¹⁰ Tewala pesombano anu tinunu inso a asa bawaa bembe bimba, moiko atuu bembe ke bimba, asalakono ipesombaakono anu lakino ka nahina tataano.

¹¹ Asalakono isumbeleo i apano meda pontunua pesomba te'alaako i utara i aro-Do i Ue, ka i'amba luwuno anano i Haruni, luwuno sando mpesomba atuu mensiwuiakono reano liimbu a meda pontunua pesomba.

¹² Ka i'amba sumampao montonda tiano, saru uluno ka tabano, luwuno i'atorao sando mpesomba i wawono keu anu kontongaano melanga i wawono meda pontunua pesomba.

¹³ Ihi kompono ka witino asalakono wino'ohiako uwoi. Luwuno dompesombaakono sando mpesomba ka tinunu i wawono meda pontunua pesomba. Onaemo pesomba tinunu, pesomba tinunuako api anu woono mokomawongkoo aroa-Do i Ue.

¹⁴ Tewala pesombano ndi Ondae i Ue onaemo pesomba tinunu inso a manu-manu, asalakono ipesombaakono pesombano atuu inso a manu-manu wurokou ke inso a anano manu-manu marapati.

¹⁵ Sando mpesomba asalakono mewawao a meda pontunua pesomba, ka do'amba melisuo uluno ka mentunuo i wawono meda pontunua pesomba. Reano domempisio kai peluarako a rereno meda pontunua pesomba.

¹⁶ Takuwea saru wuluno asalakono liniahako kai tinadi i horino meda pontunua pesomba i sabaano oleo, a mpotadia awu.

¹⁷ Asalakono isopio manu-manu atuu a mpu'u panino sine si teponsia. Ka i'amba sando mpesomba tumunuo i wawono meda pontua pesomba i wawono keu anu kontongaano melanga. Onaemo pesomba tinunu, pesomba tinunuako api anu woono mokomawongkoo aroa-Do i Ue.”