IBARANI 8 - Wunta Mempori

Sando Mpesomba Langkai Pedandia wo'ohu 8:1-13

¹ Pu'uno luwuno anu pinauto atuu onaemo: hinao Sando Mpesomba Langkaito anu kanandio, anu mentoro i koanano kadera poparentaa-Do Anu Tedoa Langkai i Suruga,

² ka anu mompekakaako pesomba a mpo'ianga mempori, onaemo a laro kema mentee, anu winangu-Do i Ue ka komba winanguno mia.

³ Hangano sompo Sando Mpesomba Langkai pinakosi ka ipompesombaako pesomba ka onaemo pu'uno Ondae i Yesu ka ihina koa Dopesombaakono.

⁴ Ba Dondio i tolino andio, nahi Ira ntu'u gagi sando mpesomba, hangano i ndi'ai hinaomo mia anu mpompesombaako pesomba montonda songka Taura.

⁵ Pompekakaakodo onaemo gambara ka eo-eono inso a hapa anu mekongko i suruga, mengkena kana anu ipinauako i Musa, tempono ta mowangu kema, ”Pewowoloo koa,” kanandiomo pau-Do, ”nine uweweuo luwuno montonda pandiri anu umariomo utinisoako a wawo ntorukuno atuu.”

⁶ Sine kanandio-andio mohawe Iramo aasa anggaa mompekakaako anu lalu maramba, hangano gagi Ira pomposombu inso a mpedandia anu lalu maramba, anu pinu'uako dandi anu lalu i wawono.

⁷ Hangano, ba kana nahina tataano pedandia anu amba-ambano atuu, nahi ta inungke mbo'u po'ianga tiano anu ko'orua.

⁸ Hangano Dokuahako ira tempono Dopotae, ”Menteeano, ta hawe tempono,” kanandiomo pau-Do i Ue, ”Aku moweweu pedandia wo'ohu saru suku Isaraeli ka saru suku Yehuda,

⁹ komba kana pedandia anu Kuweweuomo saru uempu'udo, i tempono Ku'inio kaedo wawa ira mpeluarako inso i wita Masiri. Hangano nahi dompetenunu a mpedandia-Ku, ka nahi Kutarima ira,” kanandiomo pau-Do i Ue.

¹⁰ ”Ka onaemo andio pedandia anu Kuweweuo saru suku Isaraeli umarino tempo atuu,” kanandiomo pau-Do i Ue. ”Aku numaao songka-Ku a mpinewowolo molinodo ka burio i laro aroado, ka Aku gagi Ue Alado ka ondae gagi bawaa-Ku.

¹¹ Ka nahi ira mempaguru ira mbo'u pe'asa palilido, ka pada ondaedo mpepaekompo saru mpotae: To'ori Iramo i Ue! Hangano luwudo, langkai kodei, ira mento'ori Aku.

¹² Hangano Aku umampunio salado ka nahi Aku mewowoloo mbo'u luwuno halado.”

¹³ Hangano mepau Ira mongkona pedandia anu wo'ohu, Dopokomengkaao anu amba-ambano gagi pedandia anu gagiomo mota'u. Ka hapa anu gagiomo mota'u ka mo'unsa, umpedaomo ropuano.