IBARANI 3 - Wunta Mempori

Ondae i Yesu mantande Irapo sekono i Musa 3:1-6

¹ Onaemo pu'uno, hei luwuno pepaekompo anu mempori, anu mpohawe tia a mpepoboi suruga, imengkita iramo Tinena ka Sando Mpesomba Langkai anu pine'ala-alato, onaemo Ondae i Yesu,

² anu metenunu ndi Ondae anu pakosi Iramo, kana i Musa koa mbo'u metenunu a asa laro raha-Do.

³ Hangano Ondae kinita tekona mohawe marambaa langkaiopo sekono i Musa, mengkena kana anu pande mowangu pinelangkaiopo sekono raha anu winanguno.

⁴ Hangano sompo raha iwanguo asa mia anu pande mowangu, sine anu pande mowangu luwuakoano onaemo Ondae Ue Ala.

⁵ Ka i Musa lano metenunu a asa laro raha-Do Ue Ala gagi puu pompekakaako sumakosiio mongkona hapa anu ta pinalele lembuino,

⁶ sine Ondae i Kerisituu metenunu gagi Ana anu metewawa a raha-Do; ka raha-Do onaemo ontae, tewala mehawe kita a pokotompaano mpe'ini moroso a pompe'ala-ala ka pomperorohia anu pinemawongkoto.

Mate hangano humapu Ira i Ue 3:7-19

⁷ Onaemo pu'uno, kana anu pinau-Do Penaa Mempori, ”A oleo andio, tewala imerongeo suara-Do,

⁸ si mpokomoteao aroamiu kana a laro bamburu i tempono po'ara-arahakoa i pada one,

⁹ I ra'ai uempu'umiu me'ara-arahakoa-Kune po'arahako, maupo domengkitao luwuno wineweu-Ku, pato pulu nta'u tehineno.

¹⁰ Onaemo pu'uno ka Kutekuda a anu mentuwu asa api atuu, ka Kupepau: Wela tesosaelo aroado, ka nahi domento'orio pesalaa-Ku,

¹¹ onaemo ka Kupesumpa a laro ntekuda-Ku: Nahi ira mpewinso a mpo'ianga penaa-naaa-Ku.”

¹² Impetangkoromo, hei luwuno pepaekompo, ka si hinawe te'asa mia i olomiu anu mosa'o aroano ka anu nahi pompe'ala-ala hangano ihapu Ira Ue Ala anu tuwu.

¹³ Sine imemambe patudumo sompo oleo, i larono da pinokopau ”oleo andio,” ka si hina i olomiu anu gagi motea aroano hangano pompopo'oono hala.

¹⁴ Hangano mpohawe kitamo tia ndi Ondae i Kerisituu, poolo ka tompe'ini moroso a pompe'ala-alato anu amba-ambano hawe a pokotompaano.

¹⁵ Sine tewala horio pinau, ”A oleo andio, tewala imerongeo suara-Do, si mpokomoteao aroamiu kana a laro bamburu,”

¹⁶ Isemake ondae anu mokotesingkao tekuda-Do Ue Ala, maupo domerongeo suara-Do? Kombake luwudo anu mpeluarako inso i Masiri i Musa petewawado?

¹⁷ Ka isemake anu tinekudaako-Do pato pulu nta'u tehineno? Kombake ondae anu mpoweweu hala ka anu wata ngkoroido matumbole i pada one?

¹⁸ Ka isemake anu Dototonaaomo, nine nahi ira mpewinso a mpo'ianga penaa-naaa-Do? Kombake ondae anu nahi dompomperorongeako?

¹⁹ Kanandiomo tomengkitao, nine nahi dompokompewinso hangano nahi dompompe'ala-ala.