Hosea 1 - Wunta Mempori

Pu'u Mpau

¹ Pau-Do i Ue anu hawe ndi Hosea anano i Be'eri a tempono i Usia, i Yotami, i Ahasi ka i Hisikia, luwuno mokole i Yehuda, ka tempono i Yerobea anano i Yoasi, mokole i Isaraeli.

Somborino i Hosea gambarano Isaraeli anu nahi petenunu

² Tempono Ondae i Ue mompu'u mepau molalo i Hosea, mepau Iramo ndi Hosea, ”Lakomo, kombiaomo asa beine belesu ka pe'ue iramo ana belesu, hangano wita andio inehedo mpebelesu saru mpebungkui Ira i Ue.”

³ Onaemo ka ilako kumombiao i Gomeri ana beineno i Dibilaimi. Beine atuu mentia ka ipe'anaakono asa ana ntama.

⁴ Ka Do'amba i Ue mepau ndi Hosea, ”Poponeeakonomo i Yisire'eli nana'ote atuu, nde nahi tehine mbo'u Aku humukuo somborino i Yehu hangano po'uwua rea i Yisire'eli ka Aku tumompaakono poparentano suku Isaraeli.

⁵ I tempo atuu Aku puduo wo'eno panano Isaraeli i lembono Yisire'eli.”

⁶ Ka i'amba beine atuu mentia mbo'u ka me'anaako asa ana beine. Mepau Iramo i Ue ndi Hosea, ”Poponeeakonomo i Lo-Ruhama nana'ote atuu, hangano nahi Aku mehohawao mbo'u suku Isaraeli, ka nahi Aku umoniniako ira ntu'u halado.

⁷ Sine Aku mehohawao suku Yehuda ka kumadudui ira a nee-Do i Ue, Ue Alado. Aku kumadudui ira komba mompake pana ke ponai, parewa mpetea ke ngara ka sorodadu mpengara.”

⁸ Umarino motoeo i Lo-Ruhama, beine atuu mentia mbo'u ka me'anaako asa ana ntama.

⁹ Ka Do'amba mepau, ”Poponeeomo i Lo-Ami nana'ote atuu, hangano omiu komba bawaa-Ku ka Ongkue andio komba Ue Alamiu.”

Dandi mongkona tekaduduia

¹⁰ Sine lembuino, hadiodo to Isaraeli ta kana oneno tahi, anu nahi pinokosa'u ka nahi pinokodoa. A mpo'ianga ba isua domempinauako, ”Omiu komba bawaa-Ku,” i tu'ai ira mempinauako, ”Luwuno ana-Do Ue Ala anu tuwu.”

¹¹ To Yehuda ka to Isaraeli ira ntepumpu mperonga ka pompotoro asa petewawado. Ira mpetorokio wita andio. Mentee ntu'u, tedoa langkai oleo Yisire'eli atuu!

¹² Potaemo a luwuno pepaekompomu tama, ”Ami!” ka a mpepaekompomu beine, ”Ruhama!”