Esetere 9 - Wunta Mempori

Wineweudo to Yahudi a iwalido

¹ I larono wula kohopulu ka orua, onaemo wula Adari, a oleo anu kohopulu ka otolu, tempono parenta saru atorado mokole ta tinonda, a oleo luwuno iwalido to Yahudi mpoperorohi numangi ira to Yahudi, gagiomo anu posuleno. To Yahudi numangi ira mia anu umo'aliaako ira.

² Onaemo ka dompepumpu to Yahudi i larono luwuno kotado a luwuno witado mokole Ahasiwero, ka dompepate ira mia anu montoo ta sumolangi ira, ka nahina maupo te'asa mia anu polio umaropi ira, hangano luwuno tongku atuu medoito iramo a nto Yahudi.

³ Ka luwuno mia langkai potorono i wita ka sarungkoroido topoparenta ka bupati saru anu mpo'angga a poparentaa mompokowali a nto Yahudi, hangano domedoitoakonomo i Modekai.

⁴ Hangano i Modekai langkai pabawano a langkanaedo mokole ka tepaleleomo lele mongkona onae a luwuno wita, hangano i Modekai atuu koteti-tetiangino langkaino pabawano.

⁵ Onaemo ka donangi ira luwu to Yahudi iwalido. Donangiako ira ponai, dopepate ira ka domeropu. Doweweu ira montonda po'eheno aroado a luwuno mia anu umo'aliaako ira.

⁶ Butu ilarono bente Susani, to Yahudi mpopepate ka rumopu ira lima etu mia.

⁷ I Parasandata mbo'u, i Daliponi, i Asipata,

⁸ i Porata, i Adalia, i Aridata,

⁹ i Paramasita, i Arisai, i Aridai, ka i Waisata,

¹⁰ hopulu ira ana ntamano i Hamani anano i Hamedata, iwalido to Yahudi, dompepate ira, sine luwuno anu rinontu nahi domedanggio.

¹¹ Hopulu ira ana ntamano i Hamani anano i Hamedata, iwalido to Yahudi, dompepate ira, sine luwuno anu rinontu nahi domedanggio.

¹² Ka do'amba mepau mokole ndi mokole beine, Esetere, ”Butu i larono bente Susani, to Yahudi mpompepate iramo lima etu mia saru hopulu ira anano i Hamani. A luwuno wita poparentaa anu susua, nahi tomento'orio ba hapa anu wineweudo. Ka hapake po'emamu kanandio-andio? Manasa ta inindu. Ka hapa mbo'uke inehemu? Manasa inihii.”

¹³ Sumangkiomo i Esetere, ”Tewala ipemoikoo mokole, ipo'inee iramo to Yahudi anu i Susani, tisomo ka dompoweweu mbo'u menunu saru atora a oleo andio, ka hopulu ira anano i Hamani atuu ka domesinonso a ngkeu pinontade.”

¹⁴ Ondae mbo'u mokole meparenta ka iwineweu kanatuu. Onaemo ka ilinuarako atora atuu a bente Susani ka mia mesonso ira hopulu anano i Hamani.

¹⁵ Gagi mpepumpu iramo to Yahudi anu i Susani a oleo anu kohopulu ka opaa wula Adari koa mbo'u ka dompepate iramo i Susani tolu etu mia, sine luwuno anu rinontu nahi dompodanggi.

¹⁶ To Yahudi anu mehano, anu mekongko i larono wita poparentaa, mpepumpu ka mengkorahakono penaado saru mpohawe ira rodoa inso a iwalido. Ondae mpopepate pitu pulu ka olima nsowu mia i olodo mia anu umo'aliaako ira, sine luwuno anu rinontu nahi dompodanggi.

¹⁷ Mongkona atuu igagi a oleo anu kohopulu ka otolu i larono wula Adari. A oleo anu kohopulu ka opaa mpenaa-naa iramo ka oleo atuu dompokogagio oleo pelimbua ka mawongkoa.

¹⁸ Sine to Yahudi anu mpo'ia i Susani mpepumpu, moiko a oleo kohopulu ka otulu ke ba a oleo anu kohopulu ka opaa i larono wula atuu. Ka do'amba mpenaa-naa a oleo anu kohopulu ka olima ka oleo atuu dompokogagio oleo pelimbua ka mawongkoa.

¹⁹ Onaemo pu'uno to Yahudi anu mpo'ia a inia kodei, ondaemo anu mpo'ia a inia atuu, merame-rameo oleo anu kohopulu ka opaa wula Adari atuu gagi oleo mawongko ka oleo pelimbua ka gagi oleo po'undea singge monteo kaanga.

Oleo langkai Purimi pinakosi 9:20-32

²⁰ Onaemo kai burio i Modekai anu gagi atuu, ka i'amba umoliwiako ira wunta a luwuno to Yahudi a luwuno witado mokole Ahasiwero, moiko anu umpeda, ke olai,

²¹ anu mopoto'oriako ira, asalakono kai sompo-sompo ta'u merame-rameo oleo kohopulu ka opaa ka anu kohopulu ka olima wula Adari,

²² hangano a oleomo atuu to Yahudi mpohawe rodoa inso a iwalido ka a wulamo atuu masusaa gagi po'undea ka oleo po'inombo gagi mawongkoa, ka dompokogagio luwuno oleo atuu oleo pelimbua, mawongkoa ka oleo singe monteo kaanga ka mompowee a mia mongkokolaro.

²³ Onae ka domentarimao to Yahudi gagi pompakosi a hapa anu domempu'uomo mpolempao, kana anu binurino i Modekai ndi ondae.

²⁴ Menteeano i Hamani anano i Hamedata, to Agagi, iwalido luwuno to Yahudi atuu, mosongkaomo ta rumopu ira to Yahudi ka onae mbo'u umariomo montende pur onaemo undi ta mepate ira ka domeropu,

²⁵ sine mansado pinauako mokole mongkona atuu, onaemo ka dopepau mesala a wunta, kai sinule sinongkano i Hamani anu mosa'o a nto Yahudi atuu a wawo uluno onaeno. Onaemo pu'uno i Hamani saru luwuno anano ka domesinonso a ngkeu pinontade.

²⁶ Onaemo pu'uno luwuno oleo atuu pinau Purimi, montonda pau pur. Hangano luwuno ihino wunta atuu ka hapa anu kinitado mongkona luwuno atuu ka hapa anu pinembasaido,

²⁷ to Yahudi mentarimao gagi anu asalakono ira meweweuo ka gagi pompakosi tiano koroido ondaedo, inuledo ka tiado luwuno anu mpe'asa saru ondae, nine nahi ira melinggeio porame-ramea orua oleo atuu sompo ta'u, montonda anu binuri mongkona atuu ka a tempo anu tinantuako,

²⁸ ka nine orua oleo atuu ta pinelangkai ka riname-rame a sompo inule, a sompo pepe'etua, a sompo wita, ka sompo kota, ranta luwuno oleo Purimi atuu nahi ta tampula inso i olodo to Yahudi ka pompelangkaia nahi ta hina pokotampulaano inso i olono inuledo.

²⁹ Ka i'amba i Esetere, mokole beine, anano i Abihaili, moburi wunta meronga saru i Modekai, to Yahudi atuu. Wunta anu ko'orua mongkona oleo langkai Purimi andio iburio saru luwuno pabawa anu mokorosoo.

³⁰ Ka i'amba inoliwiomo luwuno wunta a luwuno to Yahudi i larono asa etu rua pulu ka opitu wita poparentaano mokole Ahasiwero, saru pau tabea mpetenunu,

³¹ ka luwuno oleo Purimi atuu riname-rame a tempo anu pinakosi, kana anu dotenaako ira i Modekai, to Yahudi atuu, ka i Esetere, mokole beine ka kana anu dotenaako ira a ngkoroido ondaedo saru inuledo mongkona puasa ka mponsosabangi.

³² Kanatuumo parentano i Esetere pakosio mongkona Purimi atuu, ka i'amba binuriomo a wunta.