Esetere 7 - Wunta Mempori

I Hamani kinalaki ka hinuku mate

¹ Hawe iramo mokole saru i Hamani ka ipaka ira i Esetere, mokole beine.

² A oleo anu ko'orua atuu, kontongaado mo'inu anggoro, mesikeno ira mbo'u mokole ndi Esetere, ”Hapake po'emamu, mokole beine Esetere? Manasa ta inindu. Ka hapake inehemu? Maupo hawe entongano poparentaa ta inihii.”

³ Onaemo ka isangki i Esetere, mokole beine, ”Oo mokole, tewala ipehohawao tetenaamiu ka tewala ipemoikoo, ku'emao po'ineeomo ka ikongko penaaku ka tongkuku a mpo'eheno tetenaamiu.

⁴ Hangano omami, tetenaamiu saru tongkuno tetenaamiu, inasaomo ta pinokotampula, pinepate ka pinokoropu. Tewala ande-andeno butu kami me'inasa gagi ata tama ka beine, manasa tetenaamiu ta menoro-noro, sine masukaraa andio nahina pengkenano i olono masolaa anu umalukomiu mokole.”

⁵ Onaemo ka dopesikeno i mokole Ahasiwero ndi Esetere, mokole beine, ”Isemake mia atuu ka isuake onae anu aroano monaa tinoo ta moweweu kanatuu?”

⁶ Ka i'amba sumangki i Esetere, ”I Hamani mia anu mosa'o andio onaemo anu ta mobobarasai ka iwalito!” Onaemo kai tedoa doito i Hamani i arodo mokole ka mokole beine.

⁷ Ka i'amba mentade iramo mokole saru mokula arodo umarido mo'inu anggoro ka dopeluarako a lere bunga langkanae. Sine i Hamani da mo'ia mo'ema ndi Esetere, mokole beine ka da ituwu, hangano ikitao nine doputusiomo mokole tinoodo ira mompotii masolaa ndi onae.

⁸ Tempono dopekule mokole inso a lere bunga langkanae i larono a mpo'inua anggoro, ka i Hamani menggolontu a mpoturia pepomboleano i Esetere. Motae iramo mokole, ”Da mingki mbo'u ke onae dumadaio ta mewowaliakono mokole beine i larono langkanaeku?” Mansano meluarako paudo mokole atuu inso a wiwido, domentutuwiomo mia rupano i Hamani.

⁹ Mesombaomo i Harabona, aasa sida-sida anu i arodo mokole, ”Lano keu pinontade anu wineweuno i Hamani tiano i Modekai, mia anu kumadudui ira mokole ka ipauako ira atuu, mentadeomo umpeda rahano i Hamani, lima pulu hiku mantandeno.” Ka do'amba metena mokole, ”Onae imesonsoo a ngkeu atuu.”

¹⁰ Ka do'amba mesonsoo i Hamani a ngkeu pinontadeno tiano i Modekai. Ka i'amba morini aroado mokole.