Danieli 1 - Wunta Mempori

A langkanae i Babeli

¹ A nta'u ko'otolu poparentaano i Yoyakimi, mokoledo to Yehuda, haweomo i Nebukanesa, mokoledo to Babeli, i Yerusale ka kumaduo kota atuu.

² Ondae i Ue meweengakono i Yoyakimi, mokoledo to Yehuda, ka asa ntia parewa a Raha-Do Ue Ala a ngkaeno. Luwuno atuu iwawao i wita Sineari, a raha mpesombaano. Parewa atuudo inaao a laro mponaapa arataa pinesombaano.

³ Mokole meparenta ndi Asipenasi, petewawa langkanae, ka ipowawa ba te'opia to Isaraeli, anu inso a inuledo mokole ka inuledo mia pinelangkai.

⁴ Ondae atuudo mia mongura anu nahina tataado, tekosi koroido, mokonto'orio mperupa-rupa ponto'ori, hadio ponto'orido, hinao ponto'orido mongkona pepaguru, ka pande mpo'angga a laro langkanaedo mokole. Ira mempinaguru mpoburi ka paudo to Kasidimi.

⁵ Mokole pakosiako ira hadiono tiado sompo oleo inso a ngkaangado mokole ka inso a anggoro anu wela ininudo. Ondae asalakono mempinaguru otolu nta'u tehineno, ka umarino atuu ondae asalakono mpo'angga tiado mokole.

⁶ I olodo atuu kongko i Danieli, i Hanania, i Misaeli ka i Asaria inso a inuleno i Yehuda.

⁷ Petewawado pegawai langkanae atuu mompowee nee susua ndi ondae: i Danieli ineeakono i Beletasasari, i Hanania ineeakono i Sadaraki, i Misaeli ineeakono i Mesaki ka i Asaria ineeakono i Abenego.

⁸ I Danieli mo'asao aroano nahi ta weweuo koroino mokoburuako kaangado mokole ka saru anggoro anu wela ininudo mokole. Onaemo ka i'emao a mpetewawado pegawai langkanae ka ibeheo nahi pokomokoburuo koroino.

⁹ A pompehohawa-Do Ue Ala, i Danieli mohawe pompehohawa ka pe'aroa i arono petewawado pegawai langkanae atuu.

¹⁰ Sine petewawado pegawai langkanae atuu motae ndi Danieli, ”Doito aku ndi ondae ueku mokole anu pakosiomo kaanga ka inuamiu. Kana'umpe tewala ikita komiu nahi memadoo kana mia mongura mehano anu pe'asa ntinuwumiu? Ka i'amba hangano omiu ongkue dopokonsala aku mokole.”

¹¹ Ka i'amba motaeomo i Danieli a mpuu mpodagai anu pinotorono petewawado pegawai langkanae anu dumagai ira i Danieli, i Hanania, Misaeli ka i Asaria,

¹² ”Arahakono a atamiu andiodo i larono hopulu oleo: Po'ineeomo ipoweeakami inahu kaangamami ka uwoi inuamami.

¹³ Umarino atuu pongkenaomo koroimami saru koroido mia mongura anu mpongkaa inso a ngkaangado mokole, ka i'amba weweu iramo atamiu andio menunu saru pohawemiu.”

¹⁴ Po'emado atuu pinerorongeako, ka i'amba inarahakoomo ndi ondae i larono hopulu oleo.

¹⁵ Hopulu oleo umarino atuu, mengkaaomo koroido moikoopo ka ondae tengkita mewalo irapo sekono luwuno mia mongura anu mpongkaa iramo inso a ngkaangado mokole.

¹⁶ Ka i'amba puu mpodagai atuu wela umalao kaangado ka anggoro anu asalakono inuado, ka moweeako ira inahu.

¹⁷ A opaa mia mongura atuu Ondae Ue Ala moweeako ira ponto'ori ka pande mongkona mperupa-rupa binuri ka ponto'ori anu mentee. I Danieli hinao mbo'u ponto'orino mongkona mperupa-rupa pongkita ka mo'ipi.

¹⁸ A pokotompaano tempo anu pinakosido mokole ka domewinawa mpe'aro, ondae dowawa ira petewawado pegawai langkanae atuu i arono i Nebukanesa.

¹⁹ Mokole mepau-pauako ira, ka i olono luwudo atuu nahi hinawe maupo te'asa mia anu mengkena saru i Danieli, i Hanania, i Misaeli ka i Asaria. Ondae mpo'angga tiado mokole.

²⁰ A laro luwuakoano anu mongkere pinewowolo molino ka ponto'ori, anu pinesikenoakodo mokole ndi ondae, ihaweo nine pandedo lalua pempulu sekonopo luwuno anu pande mebali-bali mata ka luwuno anu pande mobasa-basa a luwuno poparentaano.

²¹ I Danieli kongko i ra'ai hawe ta'u amba-ambano poparentaano i Koresi.