Ayubi 8 - Wunta Mempori

I Bilidadi kumorahakono moleo-Do Ue Ala 8:1-22

¹ Mepauomo i Bilidadi, to Suahi,

² ”Hawe te'ipia mbo'u komepau kanatuu, ka pinauno ngangamu kana angi anu umu'uru?

³ Menteeke Ondae Ue Ala melengkuakono moleoa? Menteeke Anu Tedoa Pabawa melengkuakono menteea?

⁴ Tewala anamu mpoweweu iramo hala ndi Ondae, asalakono Dopo'inee iramo ipabawai ira salado.

⁵ Sine omue, tewala omue umungke Ira Ue Ala, ka mo'ema pompehohawa inso ndi Ondae Anu Tedoa Pabawa,

⁶ tewala moleoko ka mepau mentee, manasa Ira mentade hangano omue ka Ira wali mokomoikoo raha anu lano tiamu.

⁷ Teweweumu i ndi'ipua ta tengkita kodei, sine teweweumu lembuino ta gagi tedoa maramba.

⁸ Kanandio-andio pesikenoakonomo mongkona luwuno mia nse'elu, ka pekokoongakonomo hapa anu pinepenteedo uempu'udo.

⁹ Hangano ontae, nana'ote indiawi, nahina tino'orito hapa-hapa; hangano oleo ntumuwuto i tolino kana eo-eo.

¹⁰ Komba ondaeke anu asalakono mempaguruko ka mepau ndi omue, saru mpoluarako pau inso a mpinewowolodo anu molino?

¹¹ Mokotuwu koa ondauke tole tewala nahi a epe, ke gelaga tuwu mewalo tewala komba a uwoi?

¹² Da kontuwuano, napi tempono sinewo, onae moleu se'elu sekonopo ewo susua.

¹³ Kanatuumo sala ntumuwu luwuno mia anu kumolupe Ira Ue Ala; tampulaomo pomperorohiano mia anu mosa'o gauno,

¹⁴ anu pinerorohino kana banano kaangga, pompe'ala-alano kana inenano kaangga.

¹⁵ Onae mehonda a rahano, sine rahano atuu nahi pentade moleo mpiha, onae me'ini ndi onae, sine raha atuu nahi moroso.

¹⁶ Onae kana pinopaho anu da molowulu a mokulano mata oleo, harono melele a luwuno bonde.

¹⁷ Luwuno hakano wewesio howuno watu, mepinsolako a laro olo-olono watu atuu.

¹⁸ Sine tewala onae binuta inso a mpo'iangano, po'iangano atuu nami akuio mbo'u, ipotae: Napi kuhori kumitako!

¹⁹ Menteeano, butu onae atuu ineheno tuwuno, ka pinopaho susua mpe'umbaako inso a wita.

²⁰ To'oriomo, Ondae Ue Ala tumarima ira mia moleo, ka nahi pokorosoo kaeno mia anu moweweu mosa'o.

²¹ Da Ira koa weweuko mengingisi ka wiwimu mebooli mawongko.

²² Mia anu umo'aliaakomu ta mesoumbu mokoko'ii, ka kemado mia mosa'u gaudo nahi ta hina mbo'u.”