Ayubi 35 - Wunta Mempori

Ondae Ue Ala merioo marasaino mia 35:1-16

¹ Ka i'amba i Elihu sumangki,

² ”Onaeke andio anu potaemu moleo ka anu nineemu: menteeku i aro-Do Ue Ala,

³ tewala omue mesikeno: Hapa tuduno ndi ongkue? Hapa urano ba kupoweweu hala?

⁴ Aku koa moweeakomu sangkino ka a luwuno sambe'emu anu perongamu:

⁵ Pentombumo i langi ka kitaomo, pekokoongakonomo seru anu mantande irapo sekono omue!

⁶ Tewala omue moweweu hala, hapa anu koweweuo ndi Ondae? Tewala hadio salamu, hapa anu koweweuo ndi Ondae?

⁷ Tewala omue mentee, hapa anu upoweeako Ira? Ke hapa anu tinarima-Do inso a ngkaemu?

⁸ Butu mia kana omue anu pinokorugino gaumu anu mosa'o ka butu anano mia anu pinokome'urano menteea.

⁹ Mia mperaali hangano hadiono pompokonsii, mpebooli mepetulungi hangano pobobarasaido mia anu mempabawa.

¹⁰ Sine mia nahi dompesikeno: Isua Ira Ue Ala anu weweu aku, ka anu mompowee penani po'unde-unde i tempono wongi;

¹¹ anu moweeakita pompewowolo molino lumaloio kondehora i tolino, ka ponto'ori lumaloio manu-manu i laro meene?

¹² Tempo atuu mia mperaali, sine nahi Dosangki, hangano pompelangka-langkaido mia melambaha.

¹³ Mentee ntu'u, pebooli anu nahina pengkonaano nahi Dorongeo Ue Ala ka nahi Doperioo Anu Tedoa Pabawa.

¹⁴ Tamoako mbo'u tewala omue motae nine nahi ukita Ira, nine teweweumu winawaomo i aro-Do, sine omue da sumisikori Ira!

¹⁵ Sine kanandio-andio: hangano tekuda-Do nahi pohuku ka nahi tedoa Doperioo sala mpoweweu,

¹⁶ onaemo i Ayubi ka ipepau nahina tuduno, hadio mpau nahina pengkonaano.”