Ayubi 16 - Wunta Mempori

I Ayubi me'anaiki mongkona poweweu-Do Ue Ala 16:1–17:16

¹ Sine sumangki i Ayubi,

² ”Anu mongkona kanatuu mararuomo kurongeo. Luwumiu butu puu mpontarero anu mompokomasusa!

³ Napi pingkoke pau anu nahina tuduno atuu? Hapa anu popandeiko ka nahi utarimao?

⁴ Aku koa mokompepau mbo'u kana omiu, ande-andeno omiu a mpo'iangaku; aku mompotuda pau ndi omiu, ka kupobitu-bitu uluakomiu.

⁵ Aku mokorosoakomiu ngangaku, ka nahi aku umontoo wiwiku ka ipontarero.

⁶ Sine tewala ongkue mepau, pompemarasaiku komba gagi monongko, ka tewala komino aku, hapake anu tetadi inso ndi ongkue?

⁷ Kanandio-andio, Omiu oo Ue Ala, Iweweu akumo mokendo ka mokotampulao luwuno somboriku.

⁸ Irako akumo, Ndiomo anu gagi sakosii; morungkuku mentadeomo tumuluri aku.

⁹ Tekuda-Do momperangkami ka me'iwaliakune, Ondae mokingkio ngisi-Do ndi ongkue; iwaliku kumitaakune matano montaso.

¹⁰ Domewileo ngangado ndi ongkue, kombisiku tinampeleako pompepaukiako, ka mperonga-ronga dumuduluhi aku.

¹¹ Ondae Ue Ala meweengakune a mia melambaha, ka dumontai aku a ngkaedo mia mosa'o gaudo.

¹² Ongkue tuwu rodo, sine Ondae mokonsalalaro aku, ongkue Do'ini aku moroso a banga we'uku, ka Do'amba mepasiakono, ka Dopontade aku gagi pompotiia-Do.

¹³ Ongkue inusaiako ana mpana, wua horiku Dolompahio nahina pompehohawa, upeuku Do'uwuo a wita.

¹⁴ Doberi-beri aku, sumapoi aku kana asa puu mpetea.

¹⁵ Sawu po'inombo kuseuomo a ngkuliku, ka tanduku kuwinsoo a laro pampawu;

¹⁶ rupaku motaha hangano mengese, ka wulu mataku iborungio worikidi,

¹⁷ maupo nahina poweweu lambaha a ngkaeku, ka pekakaiku moleo inso i aroaku.

¹⁸ Hei tolino, siimo tutuwio reaku, ka pebooliku siimo ipohawe penaa-naaano!

¹⁹ To'oriomo, kanandio-andio mbo'u, Sakosiiku kongko i suruga, Anu mesakosiiakune kongko a mpo'ianga anu mantande.

²⁰ Maupo domempasinggiri aku sambe'eku, te'aro ndi Ondae Ue Ala mataku mentombu saru mengese,

²¹ ka Doputusio kara-kara olono mia ka Ondae Ue Ala, ka olono mia ka pe'asa miano.

²² Hangano ta hawe luwuno ta'u anu dinoa, ka aku tumondao sala, inso isua nahi aku mekule mbo'u.”