Ayubi 11 - Wunta Mempori

Patuduno i Sopari 11:1-20

¹ Ka i'amba mepauomo i Sopari, to Na'ama,

² ”Nde nahi asalakono sinangkike pau anu hadio? Nde asalakono ta pinokomenteeke mia anu hadio mpau?

³ Nde asalakono ira mpo'iake mia a labampaumu? Tewala omue mompasinggiri, nde nahinake anu mokoko'iiko?

⁴ Potaemu: Pompaguruku molino, ka morina aku a pongkita-Miu.

⁵ Sine, po'ineeomo Ondae Ue Ala isa'a mepau, ka Dopepau ndi omue,

⁶ ka Dopauakomu rahasiano ponto'ori, hangano mongkona atuu orua pengkonaano a ponto'oria. To'oriomo nine Ondae Ue Ala nahi Dopototoio asa ntia inso a nsalamu.

⁷ Upokonto'ori Ira koake Ondae Ue Ala a menteeano ntu'u, me'ihilaroo langkaino pabawa-Do?

⁸ Mantandeno lumaloio langi; hapa anu komokoweweuo? Ondalono lumaloio tolinodo mia mate; hapa anu pinokonto'orimu?

⁹ Songkano ondauopo sekono tolino, ka maluaopo sekono tahi malua.

¹⁰ Tewala Ondae telalo, moweweu morako, ka moweweu pobitaraa, isema moko'onto Ira?

¹¹ Menteeano, Doto'orio puu pompopo'oo, ka kumitao wineweu mosa'o maupo nahi pinoposoo.

¹² Tewala mia benge-benge mokonto'orio, ka maupo anano kalide mo'ila mokompine'anaako gagi mia.

¹³ Tewala upatindao aroamu, ka tumandeo kaemu ndi Ondae;

¹⁴ tewala upoko'olaio wineweu mosa'o a ngkaemu, ka nahi upo'ineeo wineweu molengku mo'ia a laro ngkemamu,

¹⁵ ka omue manasa mokotandeo rupamu nahina tataano, omue komentade moroso ka nahi kodoito.

¹⁶ Menteeano kokumolupeo masusamu, terorambe ndi onae butu kana a uwoi anu telaloomo.

¹⁷ Tumuwumu ta gagi laluaopo mewanta sekonopo meene, wongi-wongia ta gagi mewine kana mo'oru.

¹⁸ Omue komoroodo, hangano hinao pomperorohia, ka umari paresao luwuno po'ianga, Omue komoturi roodo;

¹⁹ omue komepombole nahina monsosanggoli, ka hadio mia ira me'unde-undeko.

²⁰ Sine matado mia mosa'o gaudo ta mowewu, nahi dompokompolai mbo'u; pomperorohido butu koa mokotampulao penaa.”