Ayubi 1 - Wunta Mempori

Pesombano ntu'u i Ayubi inarahako

¹ Hinao asa tama i wita Usi meneeako i Ayubi. Mia atuu moroso pompe'ala-alano ka moleo aroano, doitoako Ira Ue Ala ka olaiakono wineweu mosa'o.

² Onae hinao anano opitu tama ka otolu ira beine.

³ Onae hinao bawaa bembe bimbano pitu nsowu, unta tolu nsowu, sapi lima nsowu pasa, kalide waino lima etu ka tedoa hadio atano. Onae mia anu lalua mompoli i olodo luwuno mia i sabaano oleo.

⁴ Luwuno anano anu tama wela ira mpe'eu-eu mpoweweu gawe i rahado asa mia ka asa mia ka otolu ira pepaekompodo beine me'inolu mpongkaa ka mpo'inu meronga ondae.

⁵ Sompo umarino oleo pogawea, i Ayubi moboi ira ka mokomempori ira. Tisomono mo'oru, i Ayubi mewangu ka mompesombaako pesomba tinunu menunu saru hadiodo, hangano ipewowoloo, ”Bara'ura anaku mpoweweu iramo hala ka domentotonaa Iramo Ue Ala i laro aroado.” Kanandiomo iwela weweuo i Ayubi.

⁶ I asa oleo me'aiwa iramo ana nsuruga mpe'aro ndi Ondae i Ue ka i olodo aiwa mbo'u i Mosa'o.

⁷ Mesikeno Ira i Ue ndi Mosa'o, ”Inso isuake omue?” Sumangki i Mosa'o ndi Ondae i Ue, ”Inso a mpelempaa sumompoo tolino.”

⁸ Ka Do'amba mesikeno i Ue ndi Mosa'o, ”Nde upoposooke tetenaa-Ku i Ayubi? Menteeano, nahina maupo te'asa mia i tolino kana onae, anu moroso kanatuu pompe'ala-alano ka moleo aroano, anu dumoitoako Ira Ue Ala ka olaiakono wineweu mosa'o.”

⁹ Sumangki i Mosa'o ndi Ondae i Ue, ”Nde maupo nahi pohawe hapa-hapa i Ayubi doitoako Ira Ue Ala?

¹⁰ Kombake Omiu anu moweweu wala lumimbuo ka somborino saru luwuno anu pine'ueno? Hapa anu inanggano Ironsoomo ka hapa anu pine'ueno koteti-tetiangino i wita atuu.

¹¹ Sine, Ipotiiomo kae-Miu ka rumopuo luwuno anu pine'ueno. Manasa itotonaa Komiu i aro-Miu.”

¹² Pau-Do i Ue ndi Mosa'o, ”Kanandio-andio, anu pine'ueno kongko a ngkaemu; butu si potiio kaemu ndi onae.” Ka i'amba lumakoomo i Mosa'o inso i aro-Do i Ue.

¹³ I asa oleo, tempono luwuno anano tama ka beine mpongkaa ka mpo'inu anggoro a rahano pepaekompodo anu aka,

¹⁴ haweomo asa mia tinena ndi Ayubi ka ipotae, ”Tempono sapi kontongaano mompadeko ka kalide waino mpongkaa ewo i asambalino,

¹⁵ mehawe iramo to Sieba mposapoi ka merontuo saru numangiako ira ponai puu mpodagaino. Butu asa-asaku anu tola, onaemo ka kupokopauo mongkona atuu ndi omiu ue.”

¹⁶ Kontongaano mepau mia atuu, hawe mia susua ka ipotae, ”Mesilawiomo api inso i langi ka pingko itunuo bawaano bembe bimba ka luwuno puu mpodagaino. Butu asa-asaku anu tola, onaemo ka kupokopauo mongkona atuu ndi omiu ue.”

¹⁷ Kontongaano mepau mia atuu, hawe mia susua ka ipotae, ”To Kasidimi mpoweweu otolu bawaa sorodadu, ka do'amba mensapoi ira unta ka merontuo saru numangiako ira ponai puu mpodagaino. Butu asa-asaku anu tola, onaemo ka kupokopauo mongkona atuu ndi omiu ue.”

¹⁸ Kontongaano mepau mia atuu, hawe mia susua ka ipotae, ”Luwuno anamiu ue anu tama ka beine kontongaado mpongkaa ka mpo'inu anggoro a rahano pepaekompodo anu aka.

¹⁹ Borono mepuuri opue inso i asambalino pada one ka i aluo raha atuu a opaa siuno. Raha atuu tebangku dumunsi ira mia mongura atuudo, ranta ka domemate. Butu asa-asaku anu tola, onaemo ka kupokopauo mongkona atuu ndi omiu ue.”

²⁰ Mentadeomo i Ayubi, berio lemba meloeno, ka kumeruo uluno, ka i'amba menggolontu ka mesomba.

²¹ Ipotae, ”Kupeluarako kolambe-lambe inso a mpe'anakaano ineku, kolambe-lambe mbo'u kupekule i larono. Ondae i Ue anu mompowee, Ondae i Ue anu umalao, inunde-undeomo nee-Do i Ue!”

²² I larono luwuno atuu i Ayubi nahi poweweu hala ka nahi tuluri Ira Ue Ala moweweu anu nahi tekona.