Amosi 1 - Wunta Mempori

Pu'u mpau 1:1

¹ Pauno i Amosi, asa mia i olodo puu mpopakambi inso i Tekoa, anu kinitano mongkona Isaraeli i tempono i Usia mokole i Yehuda, ka i tempono i Yerobea anano i Yoasi, mokole i Isaraeli, orua nta'u se'eluno leelu wawontolino.

Pohuku a luwuno tongku susua 1:2–2:3

² Ipotae, ”Ondae i Ue mengaoli inso i Sioni ka inso i Yerusale Dopoporongeo pau-Do; mokariomo luwuno mpada pompakambia ka moleuomo punsuno torukuno Karameli.”

³ Kanandio pau-Do i Ue, ”Hangano otolu wineweuno mosa'o Damasi, tendeano opaa, nahi Aku balio mbo'u pomputusi-Ku: Hangano Gileadi domensesaakonomo ponsesaa inso a labu,

⁴ Aku mompotola api a laro langkanaeno i Hasaeli, ranta luwuno benteno i Benihada mo'ai luwu;

⁵ Aku puduo lanso pewowano Damasi ka mokotampulao palili inso i Bikeati-Aweni saru anu uminio tuko poparentaa inso i Beti-Edeni. Palilino Arami asalakono melako gagi mia mentinadi i Kiro,” pau-Do i Ue.

⁶ Kanandiomo pau-Do i Ue, ”Hangano otolu wineweuno Gasa anu mosa'o, ke opaa, nahi Aku balio mbo'u pomputusi-Ku: Hangano domewawa iramo a mpontadia luwuno mia tinadi, ka dompineweengako ndi Edomi,

⁷ Aku mompotola api a laro rere watu Gasa, ranta luwuno bente mo'ai luwu.

⁸ Aku mokotampulao palili inso i Asidodi ka anu uminio tuko poparentaa inso i Asikeloni; Aku tumaangakono kae-Ku umewaio Ekeroni, ranta memasola iramo to Pelisiti anu da mentuwu,” pau-Do Ue Ala.

⁹ Kanandiomo pau-Do i Ue, ”Hangano otolu wineweuno Tirusi anu mosa'o, ke opaa, nahi Aku balio mbo'u pomputusi-Ku: hangano dompeweengako iramo luwu mia tinadi ndi Edomi ka nahi pinewowolo pedandi pepaekompoa,

¹⁰ Aku mompotola api a laro rere watu Tirusi, ka benteno mo'ai luwu.”

¹¹ Kanandiomo pau-Do i Ue, ”Hangano otolu wineweuno Edomi anu mosa'o, ke opaa, nahi Aku balio mbo'u pomputusi-Ku. Hangano onae moluluako ponai pepaekompono ka mepateo aroa pompehohawano, bamburuno moberi mpiha, ka tekudado kongko mpiha,

¹² Aku mompotola api a laro Temani, ka benteno i Bosora mo'ai luwu.”

¹³ Kanandiomo pau-Do i Ue, ”Hangano otolu wineweuno inuleno i Amoni anu mosa'o, ke opaa, nahi Aku balio pomputusi-Ku. Hangano ondae mpobonsi kompodo beine mentia i Gileadi ira mpokomaluao witado,

¹⁴ Aku molangao api a rere watu Raba, ranta luwuno bente mo'ai luwu, tinondaako pohio i tempo peteaa, tinondaako opue i tempono melompiu.

¹⁵ Mokoledo asalakono lumako gagi mia tinadi, onae merongaako ira anu langkai potorono,” pau-Do i Ue.