2 TESALONIKA 1 - Wunta Mempori

Tabea 1:1-2

¹ Inso ndi Paulu, i Siliwanu ka i Timotiu, hawe a bawaado to Tesalonika ndi Ondae Ue Ala Amato ka ndi Ondae i Yesu Kerisituu.

² Pe'aroa ka rodoa inso ndi Ondae Ue Ala, Amato, ka inso ndi Ondae Ue Yesu Kerisituu kumongkomi komiu.

Pontarimakasi ka pekakai 1:3-12

³ Omami asalakono pontarimakasi mpiha ndi Ondae Ue Ala hangano omiu, pepaekompoku luwu-luwu. Ka lano tekona ka ikanandio, hangano pompe'ala-alamiu koteti-tetiangino ka mambe pehohawamiu komoro-morosono i olomiu,

⁴ ranta a luwuno bawaa-Do Ue Ala mpo'unde kami mongkona omiu hangano pompeteamiu ka pompe'ala-alamiu a luwuno poweweunsa'o ka pompokonsiia anu pinemarasaimiu:

⁵ aasa tondonino mongkona moleono pobitara-Do Ue Ala, anu mokomengkaao nine omiu tekona gagi palili a Poparentaa-Do Ue Ala, omiu anu kanandio-andio memarasai hangano Poparentaa atuu.

⁶ Hangano lano ndi Ondae Ue Ala ka Dopombaloakono pompokonsii ndi ondae anu mempokonsii komiu

⁷ ka ndi omiu anu mempinokonsii Dopowee komiu sanaa aroa ka ndi omami mbo'u, i tempono Dopesabaako i Yesu inso i laro nsuruga meronga saru luwuno mala'eka-Do, a mpabawa-Do, a laro api anu kolanga-langa,

⁸ ka moweweu pombaloa ndi ondae anu nahi domebehe mento'ori Ira Ue Ala ka nahi domperorongeakono Lele Mawongkoa-Do i Yesu, Ueto.

⁹ Ondae andio ira mehinukuako matea anu nahina tampulaano, pinoko'olai inso i aro-Do i Ue ka inso a marambano roso-Do,

¹⁰ tewala hawe Ira a oleo atuu ka Dopinokomaramba i olodo mia mempori-Do ka domengkohali-haliakono luwuno mia anu mpompe'ala-ala, hangano ponsakosiimami ndi omiu impe'ala-alaomo.

¹¹ Onaemo pu'uno ka kiwela mpekakaiakomiu mbo'u, ka Dopetekona komiu Ue Ala a mpepoboi-Do ka saru roso-Do mokosompoo po'ehemiu mpoweweu moiko ka mokosompoo inanggano pompe'ala-alamiu,

¹² ranta ka ipinokomaramba nee-Do i Yesu, Ueto, ndi omiu, montonda pe'aroa-Do Ue Alato ka Ondae Ue Yesu Kerisituu.