2 Tawarika 36 - Wunta Mempori

Mokole Yoahasi

¹ Palili i wita atuu melako me'alao i Yoahasi anano i Yosia, ka dompotoroo gagi mokole i Yerusale umeuo amano.

² Tinuwuno i Yoahasi rua pulu ka otolu nta'u tempono igagi mokole ka otolu wula tehineno ipoparenta i Yerusale.

³ Mokole i Masiri motiio inso a mpentoroano i Yerusale ka wita atuu dinenda asa etu talenta salaka ka asa talenta wulaa.

⁴ Ka i'amba mokole i Masiri atuu motoroo i Eliakimi, pepaekompono i Yoahasi gagi mokole i Yehuda ka Yerusale, ka umeuo neeno gagi i Yoyakimi. Sekono i Yoahasi pepaekompono atuu, itawao i Neko, ka i'amba winawa i Masiri.

Mokole Yoyakimi

⁵ Tinuwuno i Yoyakimi rua pulu ka olima nta'u tempono igagi mokole ka hopulu ka asa nta'u tehineno ipoparenta i Yerusale. Onae moweweu anu mosa'o a pongkita-Do i Ue, Ue Alano.

⁶ I Nebukanesa mokoledo to Babeli, lumako sumapoio, ponguakono rante mala ka iwawao i Babeli.

⁷ Ka ba'opia parewano Raha-Do i Ue iwawao i Nebukanesa i Babeli ka inaao a langkanaeno i Babeli.

⁸ Anu susua inso a nteweweuno i Yoyakimi, luwuno wineweuno anu mosa'o ka anu kongko ndi onae, menteeano luwuno atuu teburi a wunta tutuludo mokole i Isaraeli ka i Yehuda. Ka i'amba i Yoyakini anano, gagi mokole umeuo.

Mokole Yoyaki

⁹ Tinuwuno i Yoyaki hopulu ka oalu nta'u tempono igagi mokole ka otolu wula ka hopulu oleo tehineno ipoparenta i Yerusale. Onae moweweu anu mosa'o a pongkita-Do i Ue.

¹⁰ A tempo pepo'euano ta'u i mokole Nebukanesa montena mia wawao i Babeli saru luwuno parewa anu masuli inso a Raha-Do i Ue. Ka i'amba i Sedekia, pepaekompono amano i Yoyaki gagi mokole i Yehuda ka i Yerusale.

Mokole Sedekia ka tekaleno poparentaa Yehuda

¹¹ Tinuwuno i Sedekia rua pulu ka asa nta'u tempono igagi mokole ka hopulu ka asa nta'u tehineno ipoparenta i Yerusale.

¹² Onae moweweu anu mosa'o a pongkita-Do i Ue, Ue Alano, ka nahi pe'urumako i arono nabi Yeremia anu hawe mowawa pe'oliwi-Do i Ue.

¹³ Onae mbo'u i'ewaio mokole Nebukanesa, anu umari tumenao ka ipesumpa ndi Ondae Ue Ala. Ipokomoteao uluno, mokomoteao aroano ka nahi behe mepokule ndi Ondae i Ue, Ue Alado to Isaraeli.

¹⁴ Luwuno mbo'u petewawado sando mpesomba ka palili mararu dompelelu nahi dompetenunu saru mentondao luwuno wineweudo mosa'o tongku susua. Dompokomokoburuo Raha-Do i Ue anu Dopokomemporiomo i Yerusale.

¹⁵ Sine Ondae i Ue, Ue Alano uempu'udo, mararu Dope'oliwi molalo luwuno tinena-Do, hangano Dopehohawa ira bawaa-Do ka po'ianga-Do.

¹⁶ Sine dopasinggiri ira tinena-Do Ue Ala atuu, mokongkodeio luwuno pau-Do, ka mompopodeu-deu ira nabi-Do. Onaemo pu'uno tekuda-Do i Ue tesingka a bawaa-Do, ranta nami tepomule tekuda-Do.

¹⁷ Ondae i Ue lumeluo mokoledo to Kasidimi umewai ira. Mokole atuu mepateako ira ponai ana ntama kontuwuado a laro raha memporido, ka nahi pinehohawa mangalitau ke ana beine, mia mota'u ke mia me'uwa. Luwuno Dopeweengakono i Ue a ngkaeno.

¹⁸ Luwuno parewano Raha-Do Ue Ala, moiko anu langkai maupo kodei, saru arataa inso a Raha-Do i Ue, arataano mokole ka luwuno tadulakono, luwuno iwawao i Babeli.

¹⁹ Domesongkoo Raha-Do Ue Ala, mpobangkuo rere watu i Yerusale ka luwuno langkanae i ra'ai domentunuakono api, ranta ropuomo luwuno parewa anu ntekokosi.

²⁰ Ondae anu da tebinta ka anu tola inso a mponai winawa i Babeli ka ondae megagi atano ka atado luwuno anano ranta Peresia uminio poparentaa.

²¹ Bakanandio te'ihiiomo pau-Do i Ue anu pinauno i Yeremia, ranta wita atuu umariomo lumaloo luwuno ta'u Sabano. Wita atuu asalakono pino'inee londa i larono luwuno ta'u saba atuu, ranta sompoomo pitu pulu nta'u.

I Koresi umeheako ira mia mentinadi mpekule i witano

²² A nta'u ko'asa poparentaano i Koresi mokole i Perisia, Ondae i Ue lumeluo aroano i Koresi mokole i Peresia atuu, kai inihii pau-Do i Ue anu pinauno i Yeremia. Ka i'amba pinalele pau ka teburi pepopoto'ori andio a luwuno poparentaano, kanandio,

²³ ”Kanandiomo parentano i Koresi, mokole Peresia: luwuno poparentaa i tolino Doweeakumo i Ue, Ue Alano luwuno langi. Dotena aku mowangu raha-Do i Yerusale, anu kongko i Yehuda. Isema i olomiu tewinso bawaa-Do, po'ineeomo Ondae i Ue, Ue Alano kumongkomio, ka mo'ineeo ipelungka mekule!”