2 Tawarika 35 - Wunta Mempori

I Yosia mate a laro mpeteaa

¹ I Yosia rumame-rameo oleo Pasa-Do i Ue i Yerusale. Bimba Pasa sinumbele a ntanggala hopulu ka opaa wula ko'asa.

² Ipakosio anggaado sando mpesomba ka mokorosoako ira aroado me'anggao anggaado a laro Raha-Do i Ue.

³ Ipotaeako ira to Lewi, luwuno puu mpompaguru a luwuno Isaraeli, ondae anu pinokomempori tia-Do i Ue, ”Imenaaomo Burua Mempori atuu i laro raha anu umariomo ipontandeo i Salomo anano i Daudi, mokole i Isaraeli. Siimo mbo'u imenselao. Kanandio-andio impekakaako Iramo i Ue, Ue Alamiu, ka Isaraeli, bawaa-Do!

⁴ Impepatindamo montonda luwuno pepe'etua ka montonda bawaamiu kana anu binurino i Daudi, mokole i Isaraeli, ka i Salomo, ana ntamano.

⁵ Pentademo a kintalano po'ianga mempori montonda pebawaado sombori pepaekompomu anu komba to Lewi, sompo sombori atuu tepo'asa saru asa bawaa somborido to Lewi.

⁶ Sumbeleomo bimba Pasa, pokomemporiomo koroimu, ka patindaomo tiado pepaekompomu, ka iwineweu kana anu pinau-Do i Ue telalo i Musa.”

⁷ I Yosia mompowee tiado mia hadio, asa bawaa bembe bimba, onaemo bimba mongura ka bembe lakino mongura, tolu pulu nsowu hadiono, luwuno gagi pesomba Pasa tiado luwuno mia anu hawe, ka tolu nsowu mbo'u sapi. Luwuno atuu inso a arataano mokole.

⁸ Luwuno anu langkai potorono moleo aroado mpompowee tiado palili, sando mpesomba, ka to Lewi. Ka i'amba i Hilikia, i Sakaria ka i Yehieli, luwuno mia memota'u a raha-Do Ue Ala, mpompowee a nsando mpesomba gagi pesomba Pasa rua nsowu ka nomo etu bembe bimba ka tolu etu sapi.

⁹ Ka i'amba i Konania ka orua ira pepaekompono, i Semaya ka i Netane'eli, saru i Hasabia, i Yeieli, ka i Yosabadi, luwuno petewawado to Lewi mpompowee a nto Lewi gagi pesomba Pasa lima nsowu bembe bimba ka lima etu sapi.

¹⁰ Mansano pinatinda pesombaa, mentadeomo sando mpesomba a mpo'iangano ka to Lewi montonda pebawaano menunu saru parentado mokole.

¹¹ Bimba Pasa atuu sinumbele, ka sando mpesomba mesiwuiakono rea anu tinarima inso a nto Lewi ka do'amba mengkulio bimba atuu.

¹² Ka do'amba mponsiao pesomba tinunu anu ta pineweengako mia anu komba to Lewi montonda petiaa a mpepe'etuado, ka ipinesombaako ndi Ondae i Ue kana anu teburi a laro wuntano i Musa. Kanatuu koa mbo'u domeweweuo a luwuno sapi.

¹³ Ka do'amba menahuo bimba Pasa a wawo api menunu saru atora, sekono luwuno pesomba mempori domenahuo a ngkawali, kuro, ka a sempe langkai, ka do'amba ronga mewawao a luwuno mia anu komba to Lewi.

¹⁴ Umarino atuu domempatindao tiano koroido ka tiado sando mpesomba, hangano sando mpesomba onaemo luwuno anano i Haruni, hawe wongi mpepui-puika mpopesombaako pesomba tinunu ka luwuno taba. Onaemo pu'uno to Lewi patindao tiano koroino ka tiado sando mpesomba, onaemo luwuno anano i Haruni.

¹⁵ Luwuno puu mpenani inso a inuleno i Asapi, kongko a mpo'iangado menunu saru parentano i Daudi, onaemo i Asapi, i Hemani saru i Yedutuni, puu mpongkitado mokole; ka luwuno puu mpodagai pewowa langkai kongko a sompo pewowa langkai. Siimo domebintao anggaado, hangano to Lewi, pepaekompodo, mempatindaako ira.

¹⁶ Kanandiomo luwuno pesombaa ndi Ondae i Ue pinatinda ia oleo atuu ka iriname-rame Pasa ka mpopesombaako pesomba tinunu a wawo meda pontunua pesomba ndi Ondae i Ue menunu saru parentano mokole Yosia.

¹⁷ I tempo atuu to Isaraeli anu mehawe, merame-rameo Pasa ka oleo langkai Roti Nahi Peragi i larono opitu oleo.

¹⁸ Oleo Pasa kanatuu nami riname-rame mbo'u i Isaraeli mompu'u i nabi Semueli. Nahina maupo te'asa mia inso a luwuno mokole i Isaraeli anu hori rumame-rameo Pasa kana riname-rameno i Yosia saru luwuno sando mpesomba ka to Lewi, luwuno to Yehuda ka Isaraeli anu mehawe saru palilino i Yerusale.

¹⁹ Pasa atuu riname-rame a nta'u kohopulu ka oalu poparentaano i Yosia.

I Neko mepateo i Yosia

²⁰ Umarino luwuno andio, tempono raha-Do i Ue umariomo ipokomoikoo i Yosia, lumakoomo i Neko, mokole i Masiri ta metea i Karikemisi i wiwi ngkoro Eparata. I Yosia meluarako umaropio.

²¹ Ka i'amba onae montena mia ndi Yosia, saru pe'oliwi, ”Hapake orusuamu ndi ongkue, mokole i Yehuda? Tempo andio komba aiwa aku umewaiko, sine umewaio somborino mokole anu kontongaano kupeteaakono. Ondae Ue Ala parenta aku ka kuronga lumeluo. Penaa-naakonomo tinoomu umewai Ira Ue Ala anu kumongkomi aku, kasi Doropuko!”

²² Sine i Yosia nahi pewolili inso ndi onae, tendeano i'euo sangkano kasi teto'ori ta meteaakono. Nahi perioo luwuno pauno i Neko anu tepu'u inso ndi Ondae Ue Ala, tendeano meteaakono i lembono Megido.

²³ Puu mpepana mempanao i Yosia, ka i mokole mebooliako ira miano, ”Wawa aku lumako, hangano mapari mobelaku!”

²⁴ Luwuno miano mentandeo inso a ngkaretano, ka do'amba mewawaakono kareta susua ka mewawao i Yerusale. Onae mate ka kinaburu a mpekaburuado uempu'uno. Luwuno Yehuda ka Yerusale mpo'inomboakono i Yosia.

²⁵ I Yeremia moweweu asa powadi ponsabangi mongkona i Yosia. Hawe kanandio-andio luwuno puu mpenani tama ka beine mpenaniako luwuno powadi ponsabangi mongkona i Yosia, ka dompokogagio andio aasa gau i Isaraeli. Luwuno atuu teburi a laro luwuno powadi ponsabangi.

²⁶ Anu susua inso a nteweweuno i Yosia ka luwuno wineweuno anu moleo menunu saru anu teburi a laro Taura-Do i Ue,

²⁷ onaemo teweweuno inso a pompu'uano hawe pokotompaano, menteeano luwuno atuu teburi a laro wuntado luwuno mokole i Isaraeli ka i Yehuda.