2 Tawarika 34 - Wunta Mempori

Mokole Yosia ka pepokowo'ohu anu wineweuno

¹ Tinuwuno i Yosia oalu nta'u tempono igagi mokole ka tolu pulu ka asa nta'u tehineno ipoparenta i Yerusale.

² Onae moweweu anu mentee a pongkita-Do i Ue, ka itondao sala ntumuwuno i Daudi, uempu'uno. Onae nahi pansia i koana ke i manggali.

³ A nta'u ko'oalu poparentaano, tempono da tedoa mongura, onae mompu'u umungke Ira Ue Alano i Daudi, ama mpu'uno, ka ia ta'u kohopulu ka orua onae mompu'u mokomorinao Yehuda ka Yerusale inso a luwuno po'ianga pesombaa, karuno lahumoa, tinaha pina'o ka luwuno tinaha tinawa.

⁴ Luwuno meda pontunua pesombado Baala ipobangkuo i arono, umarino atuu iperawo-rawo ira pontunua dupa anu kongko i wawono. Ipuro-puroo ka ipokoropuo luwuno karuno lahumoa, luwuno tinaha pina'o ka tinaha tinawa, ka i'amba merawoakono a wawo ngkaburudo mia anu mpopesombaako pesomba a luwuno lahumoa atuu.

⁵ Luwuno wukudo sando mpesomba lahumoa itunuo i wawono meda pontunua pesombado. Kanandiomo ipokomorinao Yehuda ka Yerusale.

⁶ Ka luwuno kotano i Manase, i Eparai ka i Simeo hawe a luwuno kotano i Napatali, a petengi-tengino anu terawo,

⁷ ipobangkuo luwuno meda pontunua pesomba ka karuno lahumoa, ipuroo ka rawo-rawoo luwuno tinaha pina'o saru pontunua dupa a luwuno wita i Isaraeli. Umarino atuu onae mekule i Yerusale.

Wunta Taura hinawe ka pedandia pinokowo'ohu

⁸ Ia ta'u kohopulu ka oalu poparentaano, mansano mokomorinao wita ka Raha-Do i Ue, itenao i Sapani anano i Asalia ka i Ma'asea, anu pabawaio kota saru i Yoahi anano i Yoasi, puu mpopekaria arataado mokole, ka dompokomoikoo Raha-Do i Ue, Ue Alano.

⁹ Me'aiwa ira ndi sando mpesomba langkai Hilikia ka mpeweengakono ndi onae doi anu winawaomo a Raha-Do Ue Ala ka anu domepumpuomo to Lewi, onaemo luwuno puu mpodagai pewowa, inso a ngkaedo to Manase ka to Eparai, inso a luwuno mia anu da tepo'ia i Isaraeli, ka inso a nto Yehuda ka to Benami, ka inso a mpalili i Yerusale.

¹⁰ Dompeweengakono doi atuu a ngkaedo puu mpo'angga anu pinokogagi puu mpodagai a Raha-Do i Ue. Ondae anu mpo'angga i Raha-Do i Ue andio meluarakono po'owahi weweuno mokontekosio ka mokomoikoo raha atuu.

¹¹ Domeweeako ira luwuno puu mpo'angga keu ka puu mpowangu ka dompo'oli watu pina'o saru keu weweua luwuno pontumbo ka luwuno sobo anu ta pinasa a luwuno raha langkai, anu dompo'ineeomo mokole i Yehuda ka itebangku.

¹² Luwuno mia atuu mpetenunu me'anggao. Luwuno mia anu pinotoro gagi mandorodo, onaemo i Yahati ka i Obaja, to Lewi inso a inuleno i Merari, sekono i Sakaria ka i Mesulami inso a inuleno i Kehati gagi petewawado. Luwuno to Lewi anu pande mpemaeakono parewa mpenani,

¹³ mandoroi ira mia mpo'angga ka petewawado luwuno puu mpo'angga hapamo koa. Inso a nto Lewi atuu hinao anu gagi puu mpoburi, puu mpo'atora ke puu mpodagai pewowa langkai.

¹⁴ Tempono kontongaado mpoluarako doi anu winawaomo i Raha-Do i Ue, sando mpesomba Hilikia humaweo wunta Taura-Do i Ue, anu pineweengako molalo i Musa.

¹⁵ Mepauomo i Hilikia ndi Sapani, puu mpoburi a poparentaa, ”Wunta Taura andio kuhaweomo i Raha-Do i Ue!” Ka i'amba wunta atuu ipeweengakono i Hilikia ndi Sapani,

¹⁶ ka i Sapani wawao wunta atuu ndi ondae mokole. Ipauo mbo'u ndi ondae mokole, ”Luwuakoano anu itenaako ira atamiu, dome'anggao.

¹⁷ Dome'alaomo luwu doi anu kongko i Raha-Do i Ue ka mpeweengakono a ngkaedo luwuno puu mpodagai ka mia mpo'angga.”

¹⁸ I Sapani, puu mpoburi a poparentaa, pauako ira mbo'u mokole, ”Sando mpesomba Hilikia moweeakunemo wunta,” Ka i'amba i Sapani basao i arodo mokole.

¹⁹ Rumongeo pauno Taura atuu, mokole berio sangkano hangano masusa aroano.

²⁰ Ka i'amba mokole parentao i Hilikia, i Ahikami anano i Sapani, i Abidoni anano i Mika, i Sapani puu mpoburi atuu ka i Asaia mbo'u, pegawaido mokole, ipotae,

²¹ ”Imelakomo, mpo'emaakune pontiso-Do i Ue, tiado to Isaraeli anu da tebinta i Isaraeli ka i Yehuda, mongkona pauno wunta anu hinawe andio, hangano mongkokongiriomo tensilano tekuda-Do i Ue ndi ontae. Hangano, ondae uempu'uto nahi dompekariao pau-Do i Ue saru meweweuo mengkena kana anu teburi a wunta andio!”

²² Umarino atuu lumakoomo i Hilikia meronga luwuno mia anu tinenado mokole ndi nabi beine Huluda, kombiano i Salumi anano i Tokihati anano i Hasera anu mo'orusu sangka. Nabi beine atuu mo'ia i Yerusale, a Mpe'iniaa Wo'ohu. Dompepau ndi onae kana anu domepinarentaako.

²³ Nabi beine atuu sumangki ira, ”Kanandiomo pau-Do i Ue, Ue Alado to Isaraeli! Pauakonomo mia anu tumena komiu aiwa ndi ongkue!

²⁴ Kanandiomo pau-Do i Ue: Menteeano Aku mompotii masolaa a mpo'ianga andio ka palilino, onaemo luwuno totonaa anu teburi a laro wunta anu binasaomo i arono mokole i Yehuda,

²⁵ hangano domebinta Akumo ka mpotunu pesomba a mpinesombai susua. Hangano luwuno inanggano kaedo mpokontesingkao tekuda-Ku. Tensilano tekuda-Ku ta pinotii a mpo'ianga andio ka nahi pinokompepate.

²⁶ Sine ndi mokole i Yehuda anu tumena komiumo ka impo'ema pontiso-Do i Ue, asalakono imempauakono kanandio: Kanandiomo pau-Do i Ue, Ue Alado to Isaraeli: Mongkona pau anu urongeomo atuu,

²⁷ hangano omue me'o'ole ka me'urumako i aro-Do Ue Ala i tempono urongeo pau-Do te'aro a mpo'ianga andio ka palilino, ka hangano me'urumakokomo i aro-Ku, berio sangkamu ka mengese i aro-Ku, onaemo ka Kurongeo, kanandiomo pau-Do i Ue,

²⁸ menteeano Aku pumpuko saru uempu'umu, ka kokinaburu moiko. Matamu nahi ta kumitao luwuno masolaa anu Aku motiio a mpo'ianga andio ka a mpalilino.” Ka do'amba mpohaweo sangki atuu ndi ondae mokole.

²⁹ Umarino atuu mokole montena mia pumpu ira luwuno mia memota'u i Yehuda ka i Yerusale.

³⁰ Ondae mokole lumako a raha-Do i Ue meronga luwuno to Yehuda ka palili i Yerusale, luwuno sando mpesomba, to Lewi, luwuno palili, moiko anu langkai maupo anu kodei. I arodo ibasaako ira luwuno pau inso a Wunta Pedandia anu hinawe a Raha-Do i Ue atuu.

³¹ Ka i'amba mokole mentade a mpo'iangano ka moweweu pedandia i aro-Do i Ue ta tumonda Ira i Ue, mekariao luwuno parenta-Do, atora-Do ka pompakosi-Do a tompaano aroa ka tompaano sumanga saru weweuo pauno pedandia anu teburi a wunta atuu.

³² Itena ira luwu mia anu kongko i Yerusale ka Benami mpetonda a laro pedandia atuu. Onaemo palilino Yerusale ka dompoweweu menunu saru pedandia-Do Ue Alano uempu'udo.

³³ I Yosia tumadio luwuno mokoburua inso a luwuno witado to Isaraeli ka tumena ira luwu mia anu kongko i Isaraeli mpesomba ndi Ondae i Ue, Ue Alado. Asa ntinuwuno i Yosia ondae mpetenunu tumonda Ira i Ue, Ue Alano uempu'udo.