2 Tawarika 33 - Wunta Mempori

Mokole Manase

¹ Tinuwuno i Manase hopulu ka orua nta'u tempono igagi mokole ka lima pulu ka olima nta'u tehineno ipoparenta i Yerusale.

² Onae moweweu hapa anu mosa'o a pongkita-Do i Ue, kana poweweudo anu mokoburu luwuno tongku anu Dosaari iramo i Ue inso i arodo to Isaraeli.

³ Onae wali wanguo luwuno po'ianga pesombaa anu umari pinobangkuno i Hisikia, amano; Iwanguo luwuno meda pontunua pesomba tiado Baala, weweuo luwuno tinaha tadeno i Asera ka menggolontu mesomba a ihino langi ka mesomba ndi onae.

⁴ Iwanguo luwuno meda pontunua pesomba a raha-Do i Ue, kahinaano mepau Iramo i Ue, ”Nee-Ku ta mo'ia i Yerusale ranta nahina tampulaano!”

⁵ Iwangu ira mbo'u meda pontunua pesomba tiado ihino langi a orua kintalano raha-Do i Ue.

⁶ Tendeano ipesombaako ira anano a laro api i Lebaki Beni-Hinomi. Onae mongkita anu nahi manasa ta gagi, mompau anu nahi manasa ta gagi ka mompake tino'ori, tepohaweako ira puu pompoboi onitu ka puu pompoboi penaa mompau anu nahi manasa ta gagi. Hadio wineweuno anu mosa'o a pongkita-Do i Ue, ranta ka ipokotesingkao tekuda-Do.

⁷ Inaao mbo'u tinaha lahumoa anu iweweuomo a laro raha-Do Ue Ala, kahinaano Ondae Ue Ala mepau Iramo ndi Daudi ka ndi Salomo, anano, ”A laro raha andio ka i Yerusale, anu Kubinikiomo inso i olono sukudo to Isaraeli, Aku weweuo nee-Ku mo'ia ranta nahina tampulaano!

⁸ Nahi Aku weweu ira mbo'u to Isaraeli mpelanda mpeluarako inso i wita anu Kupatotoomo tiado uempu'umiu, polomo koa ka domeweweuo mpiha luwuno anu Kuparentaako iramo, luwuno songka, pompakosi ka atora, anu pinohaweno i Musa.”

⁹ Sine i Manase sumosaelo ira Yehuda ka palilino Yerusale, ranta ka dompoweweu anu mosa'o laluaopo sekono luwuno tongku anu Dosolangi iramo i Ue inso i arodo to Isaraeli.

¹⁰ Mepau Ira i Ue ndi Manase ka a mpalilino, sine nahi domperioo.

¹¹ Ka Do'amba i Ue tumenaako ira luwuno tadulako sorodaduno mokole Asuri. I Manase domerakoakono kai, memponguakono rante mala ka domewawao i Babeli.

¹² A laro tepakadano, onae merokuhi mokomolusao aroa-Do i Ue, Ue Alano. Onae tedoa me'urumako i aro-Do Ue Alado uempu'uno,

¹³ ka mekakai ndi Ondae. Ka i'amba Ondae i Ue uminduo pekakaino, ka rumongeo po'emano. Onae pinokule i Yerusale gagi mokole. I'akuiomo i Manase nine Ondaemo i Ue Ala.

¹⁴ Ka i'amba montadeo rere watu i bungkuno i kota Daudi, i sumooano oleo Gihoni, i korono mo'are hawe umpeda Pewowa Langkai Bou, lumimbuo Opeli. Rere watu atuu iweweuo tedoa mantande. Inaa ira mbo'u tadulako mpetea i sompo kota mebente i Yehuda.

¹⁵ Itadio luwuno pinesombai susua ka lahumoa inso a Raha-Do i Ue, saru meda pontunua pesomba anu pinontadeno i wawo ntorukuno raha-Do i Ue ka i Yerusale. Luwuno atuu itadio i bungkuno kota.

¹⁶ Onae wali montadeo meda pontunua pesomba ndi Ondae i Ue, ka mompesombaako pesomba tekaduduia saru pesomba po'unde i wawono. Ipebooliakono a nto Yehuda ka dompesomba ndi Ondae i Ue, Ue Alado to Isaraeli.

¹⁷ Sine, palili da mpopesombaako pesomba a luwuno po'ianga pesombaa, maupo butu ndi Ondae i Ue, Ue Alado.

¹⁸ Anu susua inso a nteweweuno i Manase, pekakaino ndi Ondae Ue Alano, ka luwuno pinaudo puu mpongkita anu mpepau ndi onae a nee-Do i Ue, Ue Alado to Isaraeli, menteeano luwuno atuu hinawe a wunta tutuludo mokole i Isaraeli.

¹⁹ Pekakaino ka sangkino pekakaino, luwuno hala ka nahi petenununo, luwuno po'ianga pesombaa anu umari winanguno saru luwuno karuno lahumoa ka luwuno tinaha anu pinontadeno i ra'ai, se'eluno ipe'urumako, menteeano luwuno atuu teburi a laro nteweweudo puu mpongkita.

²⁰ I Manase mohawe penaa-naaano saru uempu'uno, ka onae kinaburu i laro langkanaeno. Ka i'amba i Amoni, anano gagi mokole umeuo.

Mokole Amoni

²¹ Tinuwuno i Amoni rua pulu ka orua nta'u tempono igagi mokole ka orua nta'u tehineno ipoparenta i Yerusale.

²² Onae moweweu hapa anu mosa'o a pongkita-Do i Ue kana anu wineweuno i Manase, amano. I Amoni mompesombaako pesomba a luwuno tinaha anu wineweuno i Manase, amano, ka mesomba ndi onae.

²³ Sine onae nahi pe'urumako i aro-Do i Ue kana i Manase, amano me'urumako. Tendeano i Amoni laluaopo mbo'u hadio salano.

²⁴ Luwuno pegawaino ntepo'asa umewaio, ka dompepateo a langkanaeno.

²⁵ Ka i'amba mbo'u palili i wita atuu mpepate ira luwuno mia anu ntepo'asa umewaio mokole Amoni. Ka i'amba palili i wita atuu mpotoroo i Yosia, anano, gagi mokole umeuo.