2 Tawarika 29 - Wunta Mempori

Mokole Hisikia

¹ Tinuwuno i Hisikia rua pulu ka olima nta'u tempono igagi mokole ka rua pulu ka osio nta'u tehineno ipoparenta i Yerusale. Neeno ineno, onaemo i Abia, anano i Sakaria.

² Onae moweweu hapa anu mentee a pongkita-Do i Ue, mengkena kana anu wineweuno i Daudi, ama mpu'uno.

I Hisikia wali mokomemporio Raha-Do i Ue 29:3-36

³ A nta'u amba-ambano poparentaano, a laro wula amba-ambano, i'ungkahio luwuno tondono Raha-Do i Ue ka mokomoikoo.

⁴ Itena ira sando mpesomba ka to Lewi me'aiwa, ka i'amba pumpu ira a kintalano i sabaano oleo.

⁵ Ipotaeako ira, ”Rongeomo, oo to Lewi! Kanandio-andio impokomemporiomo koroimiu ka Raha-Do i Ue, Ue Alano uempu'umiu! Tadiomo luwuno anu mokoburu inso a mpo'ianga mempori.

⁶ Hangano ondae uempu'uto nahi dompetenunu. Mpoweweu ira anu mosa'o a pongkita-Do i Ue, Ue Alato, ka binta Ira. Domewolilio rupado inso a mpo'ianga-Do i Ue ka mpebungkui Ira.

⁷ Tendeano dometondoo luwuno pewowano bolongko a Raha-Do i Ue ka mpepateo luwuno hulu. Nahi dompotunu pesomba mana mo'ahi ka mpopesombaako pesomba tinunu ndi Ondae Ue Alado to Isaraeli a mpo'ianga mempori,

⁸ ranta tekuda-Do i Ue umaluo Yehuda ka Yerusale. Ondae Doweweuo gagi aasa anu mongkokongiri ka mongkokodoito saru pasinggiri kana anu imengkitaakono matamiu isa'a.

⁹ Hanganomo atuu ondae uempu'uto memateako ponai, ka luwuno anato, tama ka beine saru luwuno kombiato gagi mentinawa.

¹⁰ Kanandio-andio montoo aku mowutu pedandia saru Ondae i Ue, Ue Alano i Isaraeli, ka tekuda-Do anu tensila atuu ka ibinta kita.

¹¹ Luwuno anaku kanandio-andio si memangulele, hangano dobiniki komiumo i Ue mentade i aro-Do mekakaako Ira, ka impoweweu pesombaa ka montunu pesomba tia-Do.”

¹² Umarino atuu melako iramo to Lewi, onaemo inso a inuleno i Kehati: i Mahati anano i Amasai, ka i Yoeli anano i Asaria; inso a inuleno i Merari: i Kisia anano i Abadi ka i Asaria anano i Yehaleleeli; inso a to Geresoni: i Yoahi anano i Sima ka i Edeni anano i Yoahi;

¹³ inso a inuleno i Elisapani: i Simiri ka i Yeieli; inso a inuleno i Asapi: i Sakaria ka i Matania;

¹⁴ inso a inuleno i Hemani: Yehieli ka i Simei, ka inso a inuleno i Yedutuni: i Semaya ka i Usieli.

¹⁵ Ondae pumpu ira pepaekompodo ka mokomemporio koroino. Ka do'amba me'aiwa montonda parentado mokole, menunu saru pau-Do i Ue, ka dompokomemporio raha-Do i Ue.

¹⁶ Umarino atuu mpewinso iramo sando mpesomba a laro raha-Do i Ue ira mpokomemporio. Luwuno anu mokoburu, anu hinawe a laro Raha-Do i Ue, domewawao a kintalano Raha-Do i Ue. Luwuno to Lewi tumarimao ka iwinawa i bungkuno, i Lembono Kidironi.

¹⁷ Dompompu'u mpokomemporio Raha atuu ia tanggala asa wula anu amba-ambano. Ia oleo ko'oalu wula atuu mehawe ira a bolongko i arono Raha-Do i Ue ka mpokomemporio luwuno Raha-Do i Ue i larono oalu oleo. Dome'umari ia oleo kohopulu ka onoo wula amba-ambano.

¹⁸ Ka i'amba mpewinso iramo mpe'aro ndi mokole Hisikia ka dompotae, ”Umari kamimo mpokomemporio luwuno Raha-Do i Ue, ka meda pontunua pesomba tinunu saru luwuno parewano ka meda roti pesomba saru luwuno parewano.

¹⁹ Luwuno parewa anu tinadino mokole Ahasi, tempono nahi petenunu a tempo poparentaano, kimempatindaomo ka mpokomemporio. Kanandio-andio luwuno atuu kongko i arono meda pontunua pesomba ndi Ondae i Ue!”

²⁰ Da mo'oru ntu'u mokole Hisikia pumpu ira luwuno petewawa kota, ka domelako a raha-Do i Ue.

²¹ Domewawao opitu sapi lakino, opitu bimba lakino, opitu ana bimba ka opitu bembe lakino gagi pesomba po'onini hala a nsomborino mokole, po'ianga mempori ka Yehuda. Iparenta ira sando mpesomba, inuleno i Haruni ka dompesombaakono a wawo meda pontunua pesomba ndi Ondae i Ue.

²² Luwuno sapi atuu sinumbele ka i'amba sando mpesomba tumarimao reano ka mesiwuiakono a meda pontunua pesomba. Ka do'amba mensumbeleo luwu bimba lakino ka mesiwuiakono reano a meda pontunua pesomba. Umarino atuu domensumbele ira ana bimba ka mesiwuiakono reano a meda pontunua pesomba.

²³ Ka do'amba mewawao luwuno bembe lakino pesomba po'onini hala i arodo mokole ka bawaa. Domenaao kaedo a wawo luwuno bembe atuu.

²⁴ Luwuno sando mpesomba sumumbeleo ka mesombaakono reano a wawo meda pontunua pesomba gagi pesomba po'onini hala ka iwineweu pesintuwua tiado luwuno to Isaraeli. Hangano ondae mokole meparenta iramo ka ipinesombaako pesomba tinunu ka pesomba po'onini hala tiado luwuno to Isaraeli.

²⁵ I Hisikia numaa ira to Lewi i raha-Do i Ue, singge mia saru simbali, gambusu, ka katapi menunu saru parentano i Daudi ka i Gadi, puu mpongkitado mokole, ka nabi Nata, hangano parenta atuu inso ndi Ondae i Ue molalo nabi-Do.

²⁶ Ka i'amba luwuno to Lewi mpepatinda saru parewa mpenanino i Daudi, kanatuu koa mbo'u luwuno sando mpesomba saru napiri.

²⁷ I Hisikia meparenta ka ipinesombaako pesomba tinunu a wawo meda pontunua pesomba. I tempono pesomba tinunu mompu'u pinesombaako, penani tia-Do i Ue pinu'u mbo'u meronga unino napiri ka tinondaako parewa mpenanino i Daudi, mokole i Isaraeli.

²⁸ Luwuno bawaa mpenggolontu mpesomba kontongaano penani pinenaniako ka napiri pino'uni. Luwuno atuu motilalo ranta pesomba tinunu umari pinesombaako.

²⁹ Mansano pesomba tinunu umari pinesombaako, mokole saru luwuno mia hawe meronga saru onae mpenggolontu ka mpetuundu mpesomba.

³⁰ Ka i'amba mokole Hisikia ka luwuno petewawa parenta ira to Lewi mpenaniako luwuno pauno i Daudi ka i Asapi, puu mpokita atuu, umunde-unde Ira i Ue. Ondae memawongko mpenaniako po'unde-unde, ka do'amba mpenggolontu ka mpesomba.

³¹ Ka i'amba i Hisikia mepau, ”Kanandio-andio impesusuaomo koroimiu tia-Do i Ue. Ime'umpedamo ka wawaomo luwuno pesomba sinumbele ka pesomba po'unde a raha-Do i Ue!” Ka i'amba bawaa mewawao luwuno pesomba sinumbele ka luwuno pesomba po'unde-unde; sompo mia anu moleo aroano wawao luwuno pesomba tinunu.

³² Porokono pesomba tinunu anu winawado bawaa, onaemo sapi pitu pulu, bimba lakino asa etu ka anano bimba rua etu. Luwuno gagi pesomba tinunu tia-Do i Ue.

³³ Pesomba mempori, onaemo sapi nomo etu ka bembe bimba tolu nsowu.

³⁴ Sine sando mpesomba tedei lahi, ranta nahi dompolio mengkulio luwu pesomba tinunu. Onaemo pu'uno luwuno pepaekompodo, to Lewi mpokowali ira ranta ka i'umari anggaa atuu ka ranta luwuno sando mpesomba mokomemporio koroino. Hangano luwuno to Lewi atuu mpompesu'ui irapo mpokomemporio koroido sekonopo luwuno sando mpesomba.

³⁵ Umarino atuu hadio ntu'u pesomba tinunu, saru luwuno taba pesomba tekaduduia ka pesomba tinawa a luwuno pesomba tinunu atuu. Kanandiomo pesombaa i raha-Do i Ue wali wineweu.

³⁶ I Hisikia ka luwuno palili mawongko a hapa anu Dopakosiomo Ue Ala tiano tongku atuu, hangano luwuno atuu mansa gagi.