2 Tawarika 28 - Wunta Mempori

Mokole Ahasi

¹ Tinuwuno i Ahasi rua pulu nta'u tempono igagi mokole ka hopulu ka onoo nta'u tehineno ipoparenta i Yerusale. Onae nahi poweweu hapa anu mentee a pongkita-Do i Ue kana i Daudi, ama mpu'uno.

² Sine onae tuwu tumondao salado mokole i Isaraeli; tendeano iweweuo ira tinaha tinawa tiado Baala.

³ Onae montunu mbo'u pesomba i Lebaki Beni-Hinomi ka montunu anano gagi pesomba a laro api, mengkena kana poweweudo anu mokoburu luwuno tongku anu Dosaari iramo i Ue inso i arodo to Isaraeli.

⁴ Ipesombaakono ka montunu pesomba a luwuno po'ianga pompesombaa a wawo mepongkuano ka i totono sompo keu anu marombo.

⁵ Hangano atuu Ondae i Ue, Ue Alano meweengakono a ngkaeno mokoledo to Arami. Domenangio ka mpowawa hadio mia tinawa inso i olodo palilino ka i'amba wawao i Damasi. Umarino atuu onae pineweengako a ngkaeno mokole i Isaraeli ka mompembasai tenangia langkai.

⁶ I larono asa oleo i Pekahi anano i Remalia mompepate asa etu ka rua pulu nsowu mia i Yehuda, luwuno mia anu memoroso, hangano domebinta Iramo i Ue, Ue Alano uempu'udo.

⁷ I Sikiri, puu mpetea inso i Eparai, mepateo i Ma'aseya ana ntamano mokole, i Asirikami petewawa a langkanae, ka i Elikana mia ko'orua i totono mokole.

⁸ To Isaraeli mpotawa rua etu nsowu mia inso i olodo luwuno pepaekompodo, onaemo luwuno beine, nana'ote ntama ka beine. Hadio arataado rinontu ka winawa i Samaria.

⁹ Sine i ra'ai hinao asa nabi-Do i Ue meneeako i Odedi. Onae lumako tepohaweako ira sorodadu anu mpekule i Samaria ka ipotaeako ira, ”Kitaomo, hangano tekuda-Do anu tensila a nto Yehuda, Ondae i Ue, Ue Alado uempu'umiu meweengako ira a ngkaemiu, ka impepate iramo mongkokongiri lahi ranta hawe i langi.

¹⁰ Kanandio-andio tinoomiu numangi ira to Yehuda ka Yerusale gagi atamiu tama ka beine. Nahina ke halamu ndi Ondae i Ue, Ue Alamiu?

¹¹ Kanandio-andio, imeronge akumo: Impokule iramo mia anu tinawamiu inso a pepaekompomiu atuu, hangano tekuda-Do Ue Ala tensila ndi omiu.”

¹² Umarino atuu mpentade iramo ba'opia petewawado inuleno i Eparai: i Asaria anano i Yohanani, i Berekia anano i Mesilemoti, i Yehisikia anano i Salumi ka i Amasa anano i Hadalai umaropi ira mia anu mpekule inso a mpeteaa.

¹³ Dompotae ndi ondae, ”Si mewawa ira tinawa atuu i ndi'ai, hangano tinoomiu atuu weweuo ka tomensala ndi Ondae i Ue saru montiangi hala ka salato! Sompoomo langkaino salato, ranta ka ipetii tekuda anu tensila a nto Isaraeli.”

¹⁴ Ka i'amba mia anu mpeparewa mpetea atuu binta ira mia mentinawa ka luwuno sangka rinontudo i arodo petewawa ka luwuno bawaa.

¹⁵ Umarino atuu luwuno mia anu pinau neeno mompari-pari tumotowo ira tinawa atuu. Luwuno mia anu kolambe-lambe pinoweeako sangka inso anu rinontu atuu. Ondae pinoweeako sangka ka sandala, kaanga ka inua saru inurapiako lana. Luwuno anu tedoa molema nahi pokompelempa winawaako kalide, ka winawa i Yeriko, kota Keu Koroma umpedaako ira pepaekompodo. Ka i'amba to Isaraeli atuu mpekule i Samaria.

¹⁶ I tempo atuu mokole Ahasi montena mia lumako ndi ondae mokole i wita Asuri ta mepetulungi.

¹⁷ Ndiomo to Edomi mehawe iramo mbo'u ka mpokontenangio Yehuda saru mewawa ira mia mentinawa.

¹⁸ To Pelisiti mbo'u mensapoiomo luwuno kota i Wita Pongku ka i Wita Nege Yehuda. Dompoko'alao Beti-Semesi, Ayaloni, Gederoti, Soko saru luwuno kota kodeino, Timina saru luwuno kota kodeino ka Gomoso saru luwuno kota kodeino ka mpo'ia mpiha a luwuno kota atuu.

¹⁹ Kanandiomo Dototoakono i Ue Yehuda, hangano i Ahasi, mokole i Isaraeli mo'ineeo ira palili poweweu mondeenomo koa i Yehuda ka nahi dompetenunu ndi Ondae i Ue.

²⁰ Ka i'amba haweomo i Tiligati-Pileneseri, mokole i Asuri ndi onae, komba ta tumulungio, tendeano dumadoo.

²¹ I Ahasi rumontuo luwuno sangka inso a raha-Do i Ue, inso a rahano mokole ka inso a luwuno rahado petewawa. Ipeweengakono luwuno atuu ndi mokoledo to Asuri, sine luwuno atuu komba gagi me'uraano.

²² A laro tepakada, mokole Ahasi tekense moweweu nahi petenunu ndi Ondae i Ue.

²³ Onae mompesombaako pesomba a luwuno pinesombaido to Damasi anu umariomo numangio. Pinewowolono, ”Anu tumulungi ira mokoledo to Arami, onaemo luwuno pinesombaido; ndi ondaemo aku mompesombaako pesomba, ka domentulungi aku ngkuda.” Sine luwunomo anu pinesombai atuu anu weweuo ka luwuno to Isaraeli ntedonta.

²⁴ I Ahasi pumpuo parewano raha-Do Ue Ala ka iperawo-rawoo. Itondoo Raha-Do i Ue, ka i'amba weweu ira meda pontunua pesombano a luwuno siuno Yerusale.

²⁵ A sompo kota i Yehuda ipontade ira po'ianga pesombaa ta pontunua pesomba tiano pinesombai susua. Kanandiomo ipokotesingkao tekuda-Do i Ue, Ue Alado uempu'uno.

²⁶ Anu susuano inso a nteweweuno i Ahasi ka luwuno peleluno, inso a pompu'uano hawe pokotampulaano, menteeano luwuno atuu teburi a wunta tutuludo mokole i Yehuda ka i Isaraeli.

²⁷ I Ahasi mate. Onae kinaburu i laro kota, i Yerusale; sine nahi winawa a ngkaburudo mokole i Isaraeli. Onaemo i Hisikia anano gagi mokole umeuo.