2 Tawarika 27 - Wunta Mempori

Mokole Yotami

¹ Tinuwuno i Yotami rua pulu ka olima nta'u tempono igagi mokole ka hopulu ka onoo nta'u tehineno ipoparenta i Yerusale. Neeno ineno, onaemo i Yerusa anano i Sadoki.

² Onae moweweu hapa anu mentee a pongkita-Do i Ue, mengkena kana anu wineweuno i Usia, amano; butu koa nahi pewinsokio raha-Do i Ue. Sine palili da mpoweweu hala anu modontai.

³ Iwanguo Pewowa Langkai Mantande i raha-Do i Ue ka hadio anu winanguno a rere watu Opeli.

⁴ Iwanguo mbo'u luwuno kota i mentorukuno Yehuda ka luwuno bente saru menara a luwuno tobu.

⁵ Onae metea umewaio mokole inuleno i Amoni ka inangio. A nta'u atuu inuleno i Amoni mo'owahi ndi onae asa etu talenta salaka, hopulu nsowu kor gandu ka hopulu nsowu kor jelai. Ka a nta'u ko'orua ka ko'otolu inuleno i Amoni wawao peki'ue atuu ndi onae.

⁶ I Yotami gagi moroso pentoroano, hangano iwawao tuwuno ndi Ondae i Ue, Ue Alano.

⁷ Anu susuano inso a nteweweuno i Yotami, luwuno peteaa ka peleluno, menteeano luwuno atuu teburi a wunta tutuludo mokole i Isaraeli ka Yehuda.

⁸ Tinuwuno rua pulu ka olima nta'u tempono igagi mokole ka hopulu ka onoo nta'u tehineno ipoparenta i Yerusale.

⁹ Ka i'amba i Yotami mate. Onae kinaburu i kota Daudi. Ka i'amba i Ahasi, ana ntamano gagi mokole umeuo.