2 Tawarika 26 - Wunta Mempori

Mokole Usia

¹ Luwuno tongku Yehuda umalao i Usia, anu tinuwuno hopulu ka onoo nta'u ka ipinotoro gagi mokole umeuo amano, i Amasia.

² Onae mokorosoo kota Eloti ka mokuleo ndi Yehuda, umarino mokole mohawe penaa-naaano meronga uempu'uno.

³ Tinuwuno i Usia hopulu ka onoo nta'u tempono igagi mokole ka lima pulu ka orua nta'u tehineno ipoparenta i Yerusale. Neeno ineno, onaemo i Yekolia inso i Yerusale.

⁴ Onae moweweu hapa anu mentee a pongkita-Do i Ue, mengkena kana anu wineweuno i Amasia, amano.

⁵ Onae umungke Ira Ue Ala tempono i Sakaria da tuuwu anu paguruo ka idoitoako Ira Ue Ala. Tempono i'ungke Ira i Ue, Ondae Ue Ala weweuo mehasili.

⁶ Onae lumako meteaako ira to Pelisiti ka rumongkao rere watu Gati, Yabine ka Asidodi, ka i'amba wanguo luwuno kota a mpetengi-tengino Asidodi ka ba'opia mpo'ianga a witado to Pelisiti.

⁷ Ondae Ue Ala tumulungio umewai ira to Pelisiti, to Ara anu mpo'ia i Guri-Baala, ka to Me'unimi.

⁸ To Amoni mpo'owahi peki'ue ndi Usia. Neeno telele hawe olai i Masiri, hangano rosono anu kolangka-langkaino.

⁹ I Usia wangu ira menara i Yerusale i wawono Pewowa Langkai Siuno, i wawono Pewowa Langkai Lembono, ka i wawono Sompo Siuno, saru mokorosoo.

¹⁰ Iwangu ira mbo'u menara i pada one ka mongkeke hadio sumuru, hangano hadio pinotuwuno, moiko a Lembono maupo a wita Mantandeano. Onae hinao puu mpelereno ka puu mpodagaino lere anggoro, a luwuno torukuno ka wita anu mewalo, hangano i'ineheno mepinopaho.

¹¹ Hinao mbo'u sorodaduno i Usia anu polio metea, anu lumako metea a laro luwuno tepo'asaa montonda hadiono anu binurino i Yeieli, puu mpoburi ka i Ma'aseya puu mpodagai anu pinarentano i Hanania, asa mia tadulakono mokole.

¹² Luwuno petewawado anu mpepe'etu, luwuno sorodadu anu moroso atuu, luwuno rua nsowu ka nomo etu mia.

¹³ Ondae megagi petewawa a asa bawaa sorodadu hadiono tolu etu ka pitu nsowu ka lima etu mia anu moroso ntu'u a laro mpeteaa, ka dompokowalio mokole mo'aropi iwali.

¹⁴ I Usia pakaleako ira sorodadu atuu kanta, kansai, songko petea, lemba labu, pana ka watu pokembi.

¹⁵ I Yerusale iweweuo mbo'u luwuno parewa mpetea wineweuno asa mia mpande, anu mokompepanaako ana mpana ka watu langkai, anu ta ninaa i wawono luwuno menara ka luwuno sompo siuno. Neeno telele hawe a luwuno wita olai, hangano onae mohawe pontulungi kinohali-haliako ranta ka ikomoro-morosono.

¹⁶ Mansano morosoomo, onae gagi mompelangka-langkai ranta ka ipoweweu hala anu dumontaio. Onae moweweu nahi petenunu ndi Ondae i Ue, Ue Alano, ka mewinsokio raha-Do i Ue ta montunu pesomba dupa a wawo meda pontunua pesomba dupa.

¹⁷ Sine sando mpesomba Asaria tumondao inso i bungkuno meronga halu pulu sando mpesomba-Do i Ue, luwuno mia mosia;

¹⁸ ondae mpentade i arono mokole Usia ka dompotae ndi onae, ”Hei, Usia, komba anggaamu montunu pesomba dupa ndi Ondae i Ue. Luwuno sando mpesomba inuleno i Haruni koa anu umari iramo mpinokomempori anu tiado mpotunu pesomba mana mo'ahi! Peluarakomo inso a mpo'ianga mempori andio, hangano melelukomo nahi petenunu! Nami ta hina mbo'u pontudu ndi omue inso ndi Ondae Ue Ala.”

¹⁹ I Usia anu kontongaano mo'ini takea ta mompesombaako pesomba dupa, gagi tekuda. Kontongaano tekuda a nsando mpesomba, mansa me'umbaako haki ngkuli a ra'ino i arodo sando mpesomba i raha-Do i Ue, umpeda meda pontunua pesomba dupa.

²⁰ Tempono i Asaria, petewawado sando mpesomba, meronga luwuno sando mpesomba susua mpekokoongakono, ka tengkitaomo haki ngkuli a ra'ino. Mpopari-pari ira mensaario inso i ra'ai, ka onaeno mompari-pari meluarako, hangano Ondae i Ue moweeakonomo tula.

²¹ Mokole Usia marasaiako haki ngkuli hawe a oleo mateano, ka gagi mia anu mahaki ngkuli, onae mo'ia a laro asa raha peliahakoa, hangano pinonsia inso a raha-Do i Ue. I Yotami ana ntamano, gagi petewawa a langkanaeno mokole ka molempao poparentaa a mpalili i wita atuu.

²² Anu susuano inso a nteweweuno i Usia, inso a pompu'uano hawe pokotompaano, iburio i nabi Yesaya anano i Amosi.

²³ I Usia mate. Onae kinaburu i horino uempu'uno a lere umpeda pekaburuado mokole, hangano dompotae mia, onae mohawe haki ngkuli. Ka i'amba i Yotami, ana ntamano gagi mokole umeuo.