2 Tawarika 25 - Wunta Mempori

Mokole Amasia

¹ Tinuwuno i Amasia rua pulu ka olima nta'u tempono igagi mokole ka rua pulu ka osio nta'u tehineno ipoparenta i Yerusale. Neeno ineno i Yoadani, to Yerusale.

² Onae moweweu hapa anu mentee a pongkita-Do i Ue, butumo koa nahi buke aroano.

³ Mansano poparentaa atuu morosoomo a ngkaeno, ipepate ira atano anu umari mepateo mokole, onaemo amano.

⁴ Sine luwuno anado nahi huku mate ira. Onae moweweu menunu saru hapa anu teburi a laro songka, a laro wuntano i Musa, kana parenta-Do i Ue, ”Ama kasi mate hangano anano, osi'i mbo'u ana mate hangano amano, tendeano sompo mia asalakono mate hangano halano onaeno.”

⁵ Ka i'amba i Amasia pumpu ira to Yehuda ka tumena ira luwuno to Yehuda ka to Benami, mpentade montonda pepe'etuado asa mia ka asa mia i totono luwuno petewawa sorodadu asa nsowu ka petewawa sorodadu asa etu. Mansano dumoa ira anu tinuwuno rua pulu nta'u kontahane, ihaweo tolu etu nsowu mangalitau anu polio meluarako meteaako kansai ka kanta.

⁶ Onae mbo'u tumamboo asa etu nsowu puu mpetea anu moroso ka mosia inso i Isaraeli saru owahino asa etu talenta salaka.

⁷ Sine asa mia tetenaa-Do Ue Ala hawe ndi onae ka ipotae, ”Oo mokole, si po'ineeo sorodadu Isaraeli mpe'asa saru omiu ueku, hangano to Isaraeli nahi Dokongkomi ira i Ue, onaemo luwuno inuleno i Eparai andio.

⁸ Tewala ondae tepo'asa saru omiu, maupo kana'umpe wineweu ka rosomiu a laro mpeteaa, Ira metadiakomiu Ue Ala i arodo iwali, hangano Ondae Ue Ala hinao pabawa-Do montulungi ka mompetadiako!”

⁹ Ka i'amba motae i Amasia a ntetenaa-Do Ue Ala atuu, ”Kana'umpemo asa etu talenta anu kuweeako iramo luwuno sorodadu Isaraeli?” Sumangki tetenaa-Do Ue Ala atuu, ”Ondae i Ue moweeakomiu laalo sekono atuu!”

¹⁰ Ka i'amba i Amasia monsiao sorodadu anu aiwa mpe'asa saru onae inso i Eparai, ka dompekule a mpo'iangado. Tedoa ira ntekuda a nto Yehuda ka dompekule a mpo'iangado saru tekudado anu tensila.

¹¹ I Amasia haweako mosiano ka i'amba wawao sorodaduno i Lembono Mopa'i. Ipepateo hopulu nsowu mia inso a inuleno i Seiri.

¹² Umarino anu atuu inuleno i Yehuda montawa hopulu nsowu mia tuwu-tuwu ka dowawa ira i asa punsuno pongku watu. Ka do'amba mempinetadiako inso a punsuno pongku watu atuu, ranta ka domeropu luwu.

¹³ Sine, luwuno sorodadu anu pinokuleno i Amasia ka nahi dome'ineheako mpetonda mpetea saru onae, mensapoio luwuno kota i Yehuda inso i Samaria hawe i Beti-Horoni. Dompepateo tolu nsowu mia palilino ka merontuo hadio pinomuru.

¹⁴ I Amasia mekule, umarino numangi ira to Edomi atuu. Iwawao mekule luwuno lahumoado inuleno i Seiri ka ipontadeo gagi luwuno pinesombaino. Onae menggolontu mesomba a luwuno pinesombaino atuu ka ipontunuako ira pesomba.

¹⁵ Ka i'amba tensilaomo tekuda-Do i Ue ndi Amasia ka Dotenao asa nabi ndi onae. Ipotae nabi atuu ndi onae, ”Tembio kau po'ungke pinesombaido aasa tongku anu nahi pokompotola ira tongkuno onaeno inso a ngkaemu?”

¹⁶ Kontongaano mepau nabi, motaeomo i Amasia ndi onae, ”Nde umariomo ke kimpotoroko gagi puu mpopatudu mokole? Siimo pepau! Nde inehemu ke pinepate?” Nabi atuu komino. Umarino atuu ipotae, ”Kanandio-andio kuto'orio nine Doputusiomo Ue Ala Ira sumolangiko, hangano uweweuomo mongkona atuu, ka nahi uperorongeakono patuduku!”

¹⁷ Mansano ntepo'asa aroa iramo i Amasia, mokole i Yehuda, montena mia lumako ndi Yoasi anano i Yoahasi anano i Yehu, mokole i Isaraeli, saru pe'oliwi, ”Aropi akumo tepopo'aro!”

¹⁸ Sine i Yoasi, mokole i Isaraeli montena mia lumako ndi Amasia, mokole i Yehuda, saru pe'oliwi, ”Laro rui i Libano me'oliwi a ngkeu arasi anu i Libano, kanandio: Peweengakonomo anamu beine a anaku tama gagi kombiano. Sine kondehora mo'ila anu kongko i Libano telalo ka lumandao laro rui atuu.

¹⁹ Pinewowolomu, omue lano unangiomo Edomi, onaemo kau pompelangka-langkai kau pohawe pompelangkai. Kanandio-andio, po'iamo koa i raha. Tembio kau po'ungke-ungkeako masolaa, ranta kau tedonta ka Yehuda tedonta mbo'u saru omue?”

²⁰ Sine i Amasia nahi behe merorongeakono. Lano mongkona andio mepu'u inso ndi Ondae Ue Ala anu po'ehe-Do meweengako ira a ngkaeno i Yoasi, hangano mpetonda iramo a mpinesombaido to Edomi.

²¹ Onaemo pu'uno lumakoomo i Yoasi, mokole i Isaraeli. I'aropio i Amasia, mokole i Yehuda, tepopo'aro i Beti-Semesi anu tewinso wita Yehuda.

²² Yehuda tenangi a nto Isaraeli ka sompo to Yehuda molai a ngkemano.

²³ I Yoasi, mokole i Isaraeli rumakoo i Amasia anano i Yoasi anano i Yoahasi, mokole i Yehuda, i Beti-Semesi, ka i'amba wawao i Yerusale. Irongkao rere watu i Yerusale mompu'u inso a Mpewowa Langkai Eparai hawe a Mpewowa Langkai Siuno, pato etu hiku ondauno.

²⁴ Ka i'amba umalao luwu wulaa, salaka ka luwuno parewa anu hinawe a laro raha-Do Ue Ala, anu pine'ala-alaako ndi Obedi-Edomi; kanandio koa mbo'u ponaapa a langkanaeno mokole ka luwuno mia tinawa. Umarino atuu onae mekule i Samaria.

²⁵ I Amasia anano i Yoasi, mokole i Yehuda da tuwu hopulu ka olima nta'u umarino mate i Yoasi, anano i Yoahasi, mokole i Isaraeli.

²⁶ Anu susuano mbo'u inso a nteweweuno i Amasia, inso a pompu'uano hawe pokotampulaano, kombake luwuno atuu teburi a wunta tutuludo mokole i Yehuda ka Isaraeli?

²⁷ Mansano i Amasia umolaiko Ira i Ue, mia ntepo'asa umewaio i Yerusale, onaemo ka ipolai i Lakisi. Sine mpotena ira mia meluluo lumako i Lakisi ka onae pinepate i ra'ai.

²⁸ Onae winawaako ngara, ka i'amba kinaburu i horino uempu'uno i kota Yehuda.