2 Tawarika 19 - Wunta Mempori

I Yehu puu mpongkita kumuahakono mokole Yosapa 19:1-3

¹ I Yosapa, mokole i Yehuda, mekule kongko tuwu i langkanaeno i Yerusale.

² Tempo atuu i Yehu anano i Hanani, puu mpongkita atuu, lumako tepohaweakono ka ipotae ndi mokole Yosapa, ”Pototono ke omiu tumulungio mia nahi perio Ira i Ue ka mesambe'eako ira anu umo'aliaako Ira i Ue? Hangano mongkona atuu Ondae i Ue tekuda ndi omiu.

³ Sine da hinawe luwuakoano anu moiko ndi omiu, hangano omiu umoninio luwuno karuno lahumoa inso i wita andio ka mo'asao aroamiu umungke Ira Ue Ala.”

I Yosapa motoro ira puu mpobitara 19:4-11

⁴ I Yosapa mo'ia i Yerusale. Isompo ira mbo'u luwuno wita inso i Bereseba hawe i mentorukuano Eparai, ka itena ira palili mpepokule ndi Ondae i Ue, Ue Alano uempu'udo.

⁵ Ipotoro ira mbo'u puu mpobitara a luwuno wita, onaemo i luwuno kota anu mebente i Yehuda, i sompo-sompo kota.

⁶ Me'oliwiomo a luwuno puu mpobitara atuu, ”Impepentiio hapa anu komiu meweweuo, hangano komba tiano mia impoputusi songka, tendeano tia-Do i Ue anu kumongkomi komiu ba impoputusi songka.

⁷ Onaemo pu'uno, po'ineeomo ka imedoitoako Ira i Ue. Impopetu'uimo pomputusi, hangano moweweu molengku, mobiniki mia ke maupo montarima anu nahi pototono nahina ndi Ondae i Ue, Ue Alato.”

⁸ Ka i Yerusale i Yosapa mompotoro ba'opia mia inso i olodo to Lewi, inso i olodo sando mpesomba ka inso i olono petewawa pepe'etuado to Isaraeli anu mompowee pomputusi kara-kara mongkona songka-Do i Ue ka nteposisalaa. Ondae mpentoro i Yerusale.

⁹ Iparenta ira, ”Omiu asalakono pomputusi saru doitoako Ira i Ue, mpetenunu ka saru moleo aroa, kanandio:

¹⁰ A laro sompo kara-kara anu pinohawedo wali-walimiu anu mpo'ia i luwuno kota, mongkona po'uwua rea ke mongkona songka, parenta, luwuno pompakosi ka atora, asalakono impopoto'oriako ira, kasi domensala ndi Ondae i Ue, ranta tekuda-Do umalukomiu ka wali-walimiu. Asalakono impoweweu kanandio, ka nahi komiu mensala.

¹¹ Menteeano i Amaria, sando mpesomba langkai pinotoro gagi petewawamiu a laro luwuno kara-kara pe'uea ka i Sebaja anano i Isumaila, mia pinerorohi a nsuku Yehuda, a laro luwuno kara-kara poparentaa, ka to Lewi ira mpekakaakomiu anu gagi puu mpo'atora. Impoputusimo temantindo! Po'ineeomo Ondae i Ue kumongkomio mia anu moleo aroa.”