2 Tawarika 17 - Wunta Mempori

Mokole Yosapa mokorosoo Yehuda 17:1-19

¹ I Yosapa, anano, gagi mokole umeuo, ka i'amba mokorosoo koroino umewaio Isaraeli.

² Inaa ira sorodadu i luwuno kota anu mebente i Yehuda ka luwuno sorodadu mpodagai i wita Yehuda saru a luwuno kota Eparai anu pinongko'alano i Asa, amano.

³ Ondae i Ue kumongkomio i Yosapa, hangano onae tuwu tumondao sala ntumuwuno amba-ambano i Daudi, uempu'uno, ka nahi ungke ira Baala,

⁴ tendeano umungke Ira Ue Alano uempu'uno. Onae tuwu tumondao luwuno parenta-Do ka nahi poweweu kana i Isaraeli.

⁵ Ondae i Ue mokorosoo poparentaa anu pinebawaino. Luwuno Yehuda mpompowee pesomba ndi Yosapa, ranta ka igagi tedoa mompoli ka pinelangkai.

⁶ Ipedatoo aroano tuwu montonda sala anu Dotisoakono i Ue. Onae mbo'u rumongkao luwuno po'ianga pompesombaia ka karuno lahumoa inso i Yehuda.

⁷ A nta'u ko'otolu poparentaano itena ira i Benaili, i Obaja, i Sakaria, i Netane'eli ka i Mika, luwuno anu langkai potorono ka dompopaguru a luwuno kota i Yehuda.

⁸ Meronga ondae mpetonda mbo'u luwuno to Lewi, onaemo i Semaya, i Netania, i Sebaja, i Asaeli, i Semiramoti, i Yonata, i Adonia, i Tobia ka i Tobi-Adonia, luwuno to Lewi; saru sando mpesomba Elisama ka Yorami.

⁹ Ondae mpompaguru i Yehuda saru mpowawa wunta Taura-Do i Ue. Domesompoo luwuno kota i Yehuda ka paguru ira palili.

¹⁰ Doitoa inso ndi Ondae i Ue umaluo luwuno poparentaa a wita sumompoo Yehuda, ranta nahi dompetea umewaio i Yosapa.

¹¹ Inso i olodo to Pelisiti hinao anu mowawa pesomba ndi Yosapa ka salaka gagi peki'ue. To Ara mbo'u mpowawa ndi onae asa bawaa bembe bimba: bimba lakino pitu nsowu ka pitu etu ka bembe lakino pitu nsowu ka pitu etu.

¹² I Yosapa kotehi-tehineno tekense moroso. I Yehuda iwangu ira bente ka kota ponaapa kaanga.

¹³ Onae monaa hadio ponaapa kaanga a luwuno kota i Yehuda ka luwuno sorodadu, luwuno puu mpetea anu moroso ka mosia i Yerusale.

¹⁴ Ndiomo anggaado montonda luwuno pepe'etuado. Inso i Yehuda, luwuno tadulakodo puu mpetea asa nsowu, onaemo tadulako Adana saru tolu etu nsowu puu mpetea anu moroso ka mosia;

¹⁵ ka i'amba tadulako Yohana saru rua etu ka halu pulu nsowu mia;

¹⁶ ka i'amba i Amasia anano i Sikiri, anu inso i aroano mesombaakono koroino ndi Ondae i Ue, saru rua etu nsowu puu mpetea anu moroso ka mosia.

¹⁷ Ka i'amba inso ndi Benami, onaemo i Eliada, asa mia puu mpetea anu moroso ka mosia, saru rua etu nsowu mia anu mompake pana ka kanta.

¹⁸ Ka i'amba i Yosabadi saru asa etu ka halu pulu nsowu mia anu pinoweeako parewa mpetea ka ipetea.

¹⁹ Ondaemo atuu mpo'angga tiano mokole, sangkadio ondae anu ninaado mokole a luwuno kota mebente a luwuno Yehuda.