2 Tawarika 15 - Wunta Mempori

Pedandia saru Ondae i Ue ipokowo'ohuo i Asa

¹ I Asaria anano i Odedi ipewinsokio penaa-Do Ue Ala.

² Onae lumako tepohaweakono i Asa, ka ipotae ndi onae, ”Ronge akumo, omue Asa saru luwuno Yehuda ka Benami! Ondae i Ue saru omiu tewala omiu saru Ondae. Tewala ime'ungke Ira, Dopemoikoo intepohaweako Ira, sine tewala imebinta Ira, Ira binta komiu.

³ To Isaraeli tehineomo ntu'u nahina Ue Alado anu mentee, nahina sando mpesomba anu mompaguru, ka nahina songka.

⁴ Sine a laro masukaraa mpepokule ira ndi Ondae i Ue, Ue Alano i Isaraeli. Dome'ungke Ira i Ue ka Dopemoikoo dontepohaweako Ira.

⁵ I tempo atuu mia nahi pokolako ka mekule tuwu, hangano hinao marisua langkai i olodo palili a luwuno wita.

⁶ Tongku rumopuo tongku, kota rumopuo kota, hangano Ondae Ue Ala mokomarisuako ira mperupa-rupa masukaraa.

⁷ Sine omiu andio, pokorosoomo aroamiu, si memolema, hangano hinao tambono anu hapa anu wineweumiu!”

⁸ Mansano rumongeo i Asa pau andio ka pe'oliwi-Do i Ue ndi nabi Asaria anano i Odedi atuu, ipokorosoo aroano ka itadio luwuno pinesombai mokoburua inso a luwuno wita Yehuda ka Benami, ka inso a luwuno kota anu pinongko'alano i mentorukuno Eparai. Ipokomoikoo meda pontunua pesomba ndi Ondae i Ue anu kongko i arono bolongko Raha Mempori-Do i Ue.

⁹ Ipumpuo luwuno Yehuda ka Benami, ka luwuno mia inso i Eperai, Manase ka Simeoni anu mpo'ia i olodo gagi mia mehawe. Hangano inso i Isaraeli hadio anu me'asambaliako me'alaako ndi onae tempono domengkitao nine Ondae i Ue, Ue Alano, kumongkomio.

¹⁰ Mpepumpu ira i Yerusale ia wula ko'otolu, ta'u kohopulu ka olima poparentaano i Asa.

¹¹ Ia oleo atuu mpopesombaako ira ndi Ondae i Ue pitu etu sapi ka pitu nsowu inso a asa bawaa bembe bimba anu mpinomuru winawado mpekule.

¹² Ondae mpetonda saru tompaano aroado ka sumangado a laro pedandia umungke Ira i Ue, Ue Alano uempu'udo.

¹³ Sompo mia anu nahi ungke Ira i Ue, Ue Alano i Isaraeli, moiko nana'ote maupo mia sompoomo tinuwuno, moiko tama maupo beine, asalakono hinuku mate.

¹⁴ Mpesumpa ira ndi Ondae i Ue suarado meroku ka mpebooli mpo'unde, saru puurio napiri ka tawuwua.

¹⁵ Luwuno Yehuda memawongkoakono sumpa atuu, hangano tompaanomo aroado dompesumpa. Ka i'amba saru pompo'asa aroa anu bobotoli do'ungke Ira i Ue. Ondae i Ue memoikoo dontepohaweako Ira ka moweeako ira rodoa ndi ondae i suamo koa.

¹⁶ Tendeano i mokole Asa mokompenaa-naao i Ma'aka, ueno beine inso a mpotorono gagi inedo mokole, hangano ueno beine moweweu tinaha Asera anu minokoburuako. I Asa mobangkuo tinaha anu minokoburuako atuu, umisao ranta kai motutu ka tumunuo i koro Kidironi.

¹⁷ Maupo luwuno po'ianga pesombaa nahi rongkao i Isaraeli, sine i Asa moleo mpiha aroano asa ntinuwuno.

¹⁸ Iwawao a raha-Do Ue Ala luwuno pesomba memporino amano ka luwuno pesomba memporino onaeno, onaemo wulaa ka salaka saru luwuno sangka susua.

¹⁹ Nahina peteaa hawe a nta'u kotolu pulu ka olima poparentaano i Asa.