2 Tawarika 10 - Wunta Mempori

Tekaleno poparentaa i Isaraeli

¹ I Rehabea lumako i Sikemi, hangano luwuno to Isaraeli mehawe iramo i Sikemi ira mpotoroo gagi mokole.

² Rumongeo mongkona atuu, i Yerobea anano i Nebati, anu kongko i Masiri hangano molai i ra'ai inso i arono mokole Salomo, mekule inso i Masiri.

³ Mpontena ira mia moboio. Ka i'amba aiwaomo i Yerobea ka luwuno to Isaraeli ka dompotae ndi Rehabea,

⁴ ”Amamu mokomobeaomo tinembimami. Kanandio-andio, pokomonongkoomo anggaa mobea inso ndi amamu ka tinembi mobea anu ipopotembia kami, ka kami mpetenunu ndi omue.”

⁵ Sine sangkino ndi ondae, ”Impekulemo ndi ongkue te'ipua.” Ka do'amba palili atuu melako.

⁶ Umarino atuu i Rehabea mo'ema patudu inso a luwuno mia memota'u anu mpetenunu ndi Salomo, amano, kontongaano ituwu, ipotae, ”Hapake patudumiu sumangki ira palili atuu?”

⁷ Dompotaeakono, ”Tewala beheko melelu mauru a mpalili atuu, mokomawongko ira, ka sumangkiako ira pau anu moiko, manasa ira megagi atamu asa ntinuwumu.”

⁸ Sine, nahi perioo patudu anu domeweeakono luwuno mia memota'u atuu, ka mo'ema patudu a luwuno mia mongura anu pe'asa ntinuwuno ka anu metenunu ndi onae.

⁹ Ipotaeako ira, ”Hapa patudumiu? Kana'umpe tomesangki ira palili anu mpotae ndi ongkue: Pokomonongkoa kamimo anu ipopotembia kami amamu ndi omami?”

¹⁰ Ka i'amba luwuno mia mongura anu pe'asa ntinuwuno atuu mpotae, ”Kanandiomo asalakono ka upauako ira palili anu mpotae iramo ndi omue: ’Amamu mokomobeaomo tinembimami, sine omue pokomonongkoomo tinembimami’, gagi kanandiomo asalakono kau pauako ira: ’Ana ntonisoku langkaiopo sekono tongado amaku!’

¹¹ Kanandio-andio, amaku mopotembiakomiu tinembi anu mobea, sine ongkue mokomobeao tinembimiu. Ondae amaku tumunduhiakomiu ponsepi, sine ongkue tumunduhiakomiu ponsepi merui labu.”

¹² Te'ipuano haweomo i Yerobea saru luwuno palili ndi Rehabea, kana anu pinauno mokole, ”Impekulemo ndi ongkue te'ipua.”

¹³ Mokole Rehabea sumangkiako ira pauno meroku. Nahi perioo patududo mia memota'u.

¹⁴ Tumondao patududo mia mongura, ipotaeako ira, ”Ondae amaku mopotembiakomiumo tinembi anu mobea, sine ongkue mokomobeao tinembimiu; ondae amaku tumunduhiakomiu ponsepi, sine ongkue tumunduhiakomiu ponsepi merui labu.”

¹⁵ Gagi, mokole nahi perorongeako ira palili, hangano mongkona atuu, onaemo tebalia anu inso ndi Ondae Ue Ala, ka ite'ihii pau-Do i Ue anu pinohawe molalo i Ahia, to Silo, ndi Yerobea anano i Nebati.

¹⁶ Mansado mengkitao luwuno to Isaraeli nine i mokole nahi perorongeako ira, palili mesangkio mokole, ”Tia hapa anu kita mpohawe inso ndi Daudi? Nahina pusakato hapa-hapa inso ndi anano i Isai atuu! Singge mia lumako a ngkemano, oo to Isaraeli! Kanandio-andio orusuomo rahamu omuemu, oo Daudi!” Ka melako iramo luwuno to Isaraeli a ngkemado.

¹⁷ Sine a nto Isaraeli anu mpo'ia a luwuno kota Yehuda, i Rehabea gagi mokoledo.

¹⁸ Ka i'amba mokole Rehabea tumenao i Hadorami, petewawado mia mpo'angga dinadai, sine luwuno to Isaraeli mewunoakono watu, ranta ka imate. Ka i'amba mokole Rehabea mompari-pari mewuatako a ngkaretano ta molai i Yerusale.

¹⁹ Kanandiomo, pompu'uano to Isaraeli me'ewa a nsoborino i Daudi hawe oleo andio.