2 Mokole 8 - Wunta Mempori

Mokole tumulungio beine i Sunemi

¹ I Elisa mepauomo a beine, anu anano wali pinokotuwuno, ipotae, ”Pompakalemo ka lakomo saru somborimu ka po'iamo a mpo'ianga ba isua upokompo'ia mpiha gagi mia hawe, hangano Ondae i Ue mompotii Iramo mokoninggoa, ka ta umaluo wita andio opitu nta'u tehineno.”

² Beine atuu mompakale ka iweweuo menunu saru pinauno tetenaa-Do Ue Ala atuu. Onae lumako saru somborino ka ipo'ia gagi mia hawe i witado to Pelisiti opitu nta'u tehineno.

³ Mansano telalo opitu nta'u atuu, beine atuu mekule inso i witado to Pelisiti. Onae lumako pauo ndi ondae mokole mongkona raha ka lereno.

⁴ Ondae mokole kontongaano mepau ndi Gehasi, atano tetenaa-Do Ue Ala atuu, ipotae, ”Tutuluakunemo luwuno wineweu langkai anu wineweuno i Elisa.”

⁵ Kontongaano tumutuluako ira mokole mongkona i Elisa anu motuwuo nana'ote anu mate atuu, haweomo beine anu anano pinotuwuno atuu pauo ndi ondae mokole mongkona raha ka lereno. Motaeomo i Gehasi, ”Oo ueku mokole! Onaemo andio beine atuu ka onaemo andio anano anu pinotuwuno i Elisa.”

⁶ Tempono dopesikeno mokole a beine atuu, itutuluako ira. Ka do'amba mokole montenaakono beine atuu asa mia anu langkai potorono saru pe'oliwi, ”Pokuleomo luwuno anuno ka luwuno hasilino lere atuu mompu'u ibintao wita andio ranta kanandio-andio.”

I Elisa i kota Damasi

⁷ I Elisa lumako i Damasi. I tempo atuu i Benihada, mokoledo to Arami, kontongaano mahaki. Pinauako ira mokole, ”Tetenaa-Do Ue Ala haweomo i ndi'ai.”

⁸ Dopotae mokole ndi Hasaeli, ”Wawaomo pompowee, lakomo tepohaweakono tetenaa-Do Ue Ala atuu ka po'emamo pontiso-Do i Ue molalo onae, pesikenoakono: Aku koa tompa ke inso a haki andio?”

⁹ I Hasaeli lumako tepohaweakono saru mowawa gagi pompowee luwuno sangka anu ntekokosi inso i Damasi, hadiono inulano pato pulu unta. Mansano hawe, mentadeomo i arono i Elisa ka ipotae, ”Anamiu i Benihada, mokoledo to Arami, tumena aku aiwa ndi omiu mesikenoakono: Aku koa tompa ke inso a haki andio?”

¹⁰ Sumangki i Elisa, ”Lakomo, pauakonomo: Manasa komiu koa tompa. Sine, Ondae i Ue Dopokomengkaaomo ndi ongkue nine onae manasa mate pinepate.”

¹¹ I Elisa pasomatao ranta kai mo'o'anuno, ka i'amba tetenaa-Do Ue Ala atuu mengese.

¹² Motae i Hasaeli, ”Tembio ueku kai pengese?” Sumangki i Elisa, ”Hangano kuto'orio mokoburua anu ta wineweumu a nto Isaraeli: kotano anu mebente kosumongkoo, mia mongurano komepateakono ponai, nana'ote anu da kodei kopisikio ka beine anu mentia kobonsio.”

¹³ Motae i Hasaeli, ”Sine isemake atamiu andio, butu kana asa dahu, ranta kai pokompoweweu anu tedoa lansara atuu?” Sumangki i Elisa, ”Ondae i Ue mopokitaakunemo nine omue kogagi mokoledo to Arami.”

¹⁴ Ka i'amba lumako bintao i Elisa ka ipekule ndi ueno. Ondae mokole mesikeno ndi onae, ”Hapa anu pinauno i Elisa ndi omue?” Sumangki i Hasaeli, ”Ipauakune nine omiu manasa komiu tompa.”

¹⁵ Sine tisomono i'alao asa hawu, i'emoo a laro uwoi ka ipetompoakono a wawo rupado mokole ranta ka domate. Ka i'amba i Hasaeli gagi mokole umeuo.

I Yorami, mokoledo to Yehuda

¹⁶ Ia nta'u ko'olima poparentaano i Yorami, ana ntamano i Ahabi mokole i Isaraeli ka i Yosapa onaemo mokole i Yehuda, i Yorami, ana ntamano i Yosapa mokole i Yehuda, mompu'u moparenta gagi mokole.

¹⁷ Tinuwuno tolu pulu ka orua nta'u tempono igagi mokole ka oalu nta'u tehineno ipoparenta i Yerusale.

¹⁸ Itondao sala ntumuwudo mokole i Isaraeli kana anu wineweudo somborino i Ahabi, hangano onae mongkombia anano i Ahabi. Onae moweweu hapa anu mosa'o a pongkita-Do i Ue.

¹⁹ Maupo kanandio, nahi Dobehe i Ue rumopuo Yehuda hangano i Daudi, tetenaa-Do, menunu saru dandi-Do ndi Daudi, nine Ira tumeahakono langano pelita ndi onae ka ana'ueno ranta nahina tampulaano.

²⁰ I tempo poparentaano i Yorami, to Edomi umewaio pabawano i Yehuda ka ipompotoro asa mokole gagi mokoledo.

²¹ I Yorami sumaki me'asambaliako i Sairi meronga saru luwuno karetano. I tempono wongi ipewangu, ka i'amba meronga saru luwuno tadulako sorodadu mpekareta ipewinsokio baresido to Edomi anu mengkaduo, sine sorodaduno mpolai mpekule a ngkemado.

²² Kanandiomo dome'ewa to Edomi ka ntepotola inso a mpabawano Yehuda hawe kanandio-andio. Ka i'amba i Libina mbo'u umewa i tempo atuu.

²³ Anu susuano inaso a teweweuno i Yorami ka luwuno anu wineweuno, kombake luwuno atuu teburi a wunta tutuludo luwuno mokole i Yehuda?

²⁴ I Yorami mate, ka onae kinaburu i horino uempu'uno i kota Daudi. Ka i'amba i Ahasia, anano gagi mokole umeuo.

I Ahasia, mokoledo to Yehuda

²⁵ Ia ta'u kohopulu ka orua poparentaano i Yorami, anano i Ahabi mokole i Isaraeli, i Ahasia, anano i Yorami mokole i Yehuda gagi mokole.

²⁶ Tinuwuno rua pulu ka orua nta'u tempono igagi mokole ka asa nta'u tehineno ipoparenta i Yerusale. Neeno ineno i Atalia, ana'ueno i Omiri mokole i Isaraeli.

²⁷ Itondao gau ntuwuno somborino i Ahabi ka moweweu anu mosa'o a pongkita-Do i Ue mengkena kana somborino i Ahabi, hangano onae asa poni inso a sombori atuu.

²⁸ Onae lumako meronga saru i Yorami ana ntamano i Ahabi ta meneeakono i Hasaeli, mokoledo to Arami i Ramoti-Gileadi. Sine to Arami atuu mebelaio i Yorami.

²⁹ Ka i'amba mokole Yorami mekule i Yisire'eli kai pinokotompa inso a luwuno mobelano hangano to Arami i Rama tempono ipetea umewaio i Hasaeli, mokoledo to Arami. I Ahasia, ana ntamano i Yorami mokoledo to Yehuda, lumako kumitao i Yorami anano i Ahabi i kota Yisire'eli, hangano mahaki.