2 Mokole 6 - Wunta Mempori

Mata uase pinokoloonto

¹ Asa tempo bawaado nabi mpotaeakono i Elisa, ”Kitaomo, po'ianga mami saru omue andio kimpema'isoo lahi.

² Moikoomo kami melako a ngkoro Yarade ka i ra'ai singge mia mo'ala asa sobo, ka kami mpoweweu po'ianga i ra'ai.” Sumangki i Elisa, ”Imelakomo.”

³ Ka i'amba asa mia motae, ”Tewala ipemoikoo, ipetondamo saru luwuno atamiu andio.” Sumangki i Elisa, ”Humbee aku koa metonda.”

⁴ Ka i'amba tumonda ira. Mansado mehawe i Koro Yarade, pontuehi ira keu.

⁵ Tempono asa mia inso ndi ondae kontongaano mobangkuo asa keu, mata uaseno tedonta a laro uwoi. Onae meboo-booli, ”Masola akumo, ueku! Parewa atuu, parewa sinaru!”

⁶ Motae tetenaa-Do Ue Ala, ”Isua tedontaano?” Ka i'amba mia atuu tumisoakono po'iangano. I Elisa mompole keu ka ipetadiakono i tu'ai. Mata uase atuu iweweuo loonto.

⁷ Ka i'amba motae, ”Alaomo.” Mia atuu weroo kaeno ka i'alao.

I Elisa tumulungi ira to Isaraeli mpo'aropi to Arami

⁸ Mokole i wita Arami kontongaano metea umewai ira to Isaraeli. Mansano teriso saru luwuno pegawaino, ipotae, ”A mpo'ianga andio ka atuu asalakono impetii mpontowoki.”

⁹ Sine, tetenaa-Do Ue Ala montena mia a mokoledo to Isaraeli saru pe'oliwi, ”Impetangkoro, si mentelalo a mpo'ianga atuu, hangano to Arami mpetii iramo mpetowoki i ra'ai.”

¹⁰ Onaemo pu'uno mokoledo to Isaraeli montena mia lumako a mpo'ianga anu pinauno tetenaa-Do Ue Ala ndi onae. Umariomo ipopoto'oriakono mokole komba butu pohona pendua, kai pompe'inandai i ra'ai.

¹¹ Aroano mokole Arami gagi tekuda hangano mongkona atuu. Ipoboi ira luwuno pegawaino ka ipotaeako ira, ”Nahi mpolio ke mempauakune isema inso i oloto anu me'alaako ndi mokoledo to Isaraeli?”

¹² Asa mia inso i olodo pegawaino motae, ”Nahina maupo te'asa mia, ueku mokole, sangkadio i Elisa, nabi i Isaraeli atuumo anu pauako ira mokoledo to Isaraeli pau anu pinaumiu a mpoturiamiu.”

¹³ Motae iramo mokole, ”Lakomo ka ipepenteeo onae isua, kaku mpontena mia rumakoo.” Ka do'amba mempauakono, ”Kai to'oriomo, onae kongko i Dotani.”

¹⁴ Ka i'amba mo'oliwi ngara ka kareta saru bawaano sorodadu anu langkai melako i ra'ai. Ondae mehawe tempono wongi ka mengkaduo kota atuu.

¹⁵ Mansano mewangu puu mpopekakaakono tetenaa-Do Ue Ala mo'o-mo'oru ka ilako i bungkuno, tengkitaomo bawaano sorodadu saru ngara ka kareta limbu kota atuu. Ka i'amba atano atuu motaeakono, ”Masola kitamo, ueku! Hapa anu asalakono kita weweuo?”

¹⁶ Sumangki i Elisa, ”Si doito, hangano hadioopo anu kumongkomi kita sekonopo anu kumongkomi ira.”

¹⁷ Ka i'amba mekakai i Elisa, ”Oo Ue po'ineeomo Iwileakono matano, kai kitao.” Ondae i Ue wileakono matano ata atuu ranta kai pongkita; tengkitaomo torukuno atuu bukeako ngara ka kareta me'api lumimbuo i Elisa.

¹⁸ Mansano luwuno to Arami atuu tepohaweakono, i Elisa mekakai ndi Ondae i Ue, ”Po'ineeomo Ipokomorawuo matado mia andiodo.” Ka i'amba Dopokomorawuako ira matado, menunu saru pekakaino i Elisa.

¹⁹ Ka i'amba i Elisa motaeako ira, ”Komba onae andio salano, ka komba onae andio kotano. Imentonda aku, ka kuwawa komiu a mia anu inungkemiu.” Ka i'amba wawa ira melako i Samaria.

²⁰ Sahawedo i Samaria, motae i Elisa, ”Oo Ue, wileomo matado mia andiodo, ka dompongkita.” Onaemo ka Dowileo i Ue matado, ranta ka dompongkita; kahinaano mekongko iramo i tonga-tongano Samaria.

²¹ Mansano kumita ira, mokoledo to Isaraeli mesikeno ndi Elisa, ”Moiko koa ke kupepate ira, ama?”

²² Sumangki i Elisa, ”Si pepate ira! Nde welako mompepateako ponai ka panamu a mia anu tinawamu? Patindaomo kaanga ka inua i arodo, ka dompongkaa ka mpo'inu, ka do'amba mpekule a uedo.”

²³ Ipatindaako ira pelimbua anu langkai. Umarido mpongkaa ka mpo'inu, mempinotola iramo ka domelako ndi uedo. Kanandiomo luwuno gerombolado to Arami nami dompewinsokio mbo'u witado to Isaraeli.

Wineweuno i Elisa i tempono Samaria kinadu

²⁴ Umari atuu i Benihada, mokoledo to Arami pumpu ira luwuno sorodaduno, ka i'amba lumako kumaduo Samaria.

²⁵ Gagiomo mokoninggoa langkai i Samaria tempo domengkaduo, ranta-ranta asa uluno kalide me'oli halo pulu sikala salaka ka asa ntia opaa kabi taino marapatii me'oli olima sikala salaka.

²⁶ Asa tempo tempono mokoledo to Isaraeli melempa i wawono rere watuno kota, asa beine mebooli ndi onae, ”Itulungi akumo, oo ueku mokole!”

²⁷ Sumangki mokole, ”Naahi, po'ineeomo Ondae i Ue tumulungiko. Kana'umpe aku mokotulungiko? Saru hasilino ponsesaa, ke hasilino pomporo'ia anggoro?”

²⁸ Ka i'amba mokole mesikeno ndi onae, ”Hapa pinemasusamu?” Sangkino, ”Beine andio motaeakune: Peweengakonomo anamu tama ka tokaano a oleo andio, ka tisomo kita kumaano anaku tama.

²⁹ Gagi kinahuo anaku ka kikaano. Sine mansano a oleo tudano kupotaeakono: Peweengakonomo anamu ka tokaano, iwunio anano.”

³⁰ Rumongeo pinauno beine atuu, i mokole berio sangkano. Hangano onae melempa a wawo rere watuno kota, domengkitao mia hadio nine onae mompokona sawu po'inombo a ngkoroino.

³¹ Ka i'amba motae mokole, ”Po'ineeomo Ondae Ue Ala humuku aku mobea maupo torea mbo'u, tewala uluno i Elisa anano i Sapati da kongko mpiha a ngkoroino oleo andio.”

³² Kontongaano atuu i Elisa tekonai mentoro i rahano, ka luwuno mia memota'u mpentoro saru onae. Mokole montenaomo mia melempa mese'elungio. Sine napi hawe mia tinena atuu ndi Elisa, i Elisa mepauomo a luwuno mia memota'u atuu, ”Imento'orio koa ke nine puu mpopepate atuu montena mia kai poleo uluku? Impetangkoromo, tewala hawe mia tinena atuu, imentondoo pewowa ka ime'onsoio saru mengkorahakono pewowa atuu. Kombake terongeomo unino pelempano ueno i bungkuno?”

³³ Kontongaano mepauako ira, haweomo mokole tepohaweakono. Dopotae mokole ndi onae, ”Menteeano masolaa andio inso ndi Ondae i Ue. Pombio mbo'u ka aku momperorohi ndi Ondae i Ue?”