2 Mokole 25 - Wunta Mempori

¹ Ia ta'u ko'osio poparentaano, ia wula kohopulu, tanggala hopulu wula atuu, haweomo i Nebukanesa mokole i Babeli saru luwuno sorodaduno sumapoio Yerusale. Onae mekema kumaduo ka mowangu rere watu pongkadu lumimbuo.

² Kanandiomo kota atuu tekadu hawe a nta'u kohopulu ka asa poparentaano mokole Sedekia.

³ A ntanggala osio wula ko'opaa, mokoninggoa tepahe mongkokongiri i kota atuu ka nami hina mbo'u kaanga a mpalili i wita atuu.

⁴ Rere watuno kota atuu binolo ka luwuno sorodadu mpolai i tempono wongi telalo a mpewowa langkai i olono orua rere watu anu umpeda lere bungano mokole, kontongaado to Kasidimi mengkaduo limbu kota atuu. Melako ira te'aro i Araba-Yarade.

⁵ Sine sorodadudo to Kasidimi lumuluo mokole ka domehaweo i lembono Yeriko. Luwuno sorodaduno ntesiarawo mebintao.

⁶ Domerakoo mokole ka mewawao ndi mokoledo to Babeli i Ribela. Ka do'amba mehukuo.

⁷ Luwuno anano i Sedekia sinumbele i arono matano onaeno, ka i'amba matano i Sedekia pinokomorawu. Onae pinonguako rante mala ka winawa i Babeli.

⁸ A ntanggala opitu wula ko'olima, ta'u kohopulu ka osio poparentaano mokole Nebukanesa, mokoledo to Babeli, haweomo i kota Yerusale i Nebusaradani, petewawa sorodadu puu mpodagai, pegawaino mokole to Babeli.

⁹ Isongkoo raha-Do i Ue, rahano mokole ka luwuno raha i Yerusale. Luwuno rahado anu langkai potorono isongkoakono api.

¹⁰ Rere watu anu lumimbuo kota Yerusale dompobangkuo luwuno sorodadudo to Kasidimi anu mentondao petewawado sorodadu puu mpodagai atuu.

¹¹ Luwuno toreano palili anu da tebinta i kota atuu, luwuno anu pansia mpe'asambaliako mpe'alaako ndi mokole i Babeli, ka mia hadio anu susuano iwawa ira i Nebusaradani, petewawado sorodadu puu mpodagai atuu a pontadia.

¹² Butu ba opia mia mongkokolaro inso i wita atuu ibintao petewawado puu mpodagai atuu ka domegagi puu mpo'angga lere anggoro ka puu mpo'angga bonde.

¹³ Luwuno mbo'u karu raha mala a raha-Do i Ue ka kareta pontumbo ka ”Tahi” mala anu a raha-Do i Ue domempehao to Kasidimi ka malano winawa i Babeli.

¹⁴ Dome'alao luwu kawali, sikopa, piso, sangkiri ka luwuno parewa mala anu pinake a mpoweweua pesombaa.

¹⁵ Luwuno mbo'u polu pontunua halo ka luwuno loea kodei ponsiwui, luwuno anu inso a wulaa ke maupo inso a nsalaka i'alao petewawado puu mpodagai atuu.

¹⁶ Ka orua karuno ”Tahi” anu asa atuu ka kareta pontumbo anu wineweuno i Salomo tiano raha-Do i Ue, luwuno parewa andio nahi pinokokati malano.

¹⁷ Ondauno karuno anu asa hopulu ka oalu hiku ka i wawono hinao uluno karuno inso a mala; ondauno uluno karuno atuu otolu hiku ka ramba-ramba buani saru wua-wua delima hinao i wawono limbu uluno karuno atuu, luwuno inso a mala. Kanatuu koa mbo'u a ngkaruno anu ko'orua saru ramba-ramba buanino.

¹⁸ Ka i'amba petewawado sorodadu puu mpodagai atuu rumakoo i Seraya, petewawa sando mpesomba, ka i Sepanya, sando mpesomba i totono, saru otolu ira puu mpodagai pewowa.

¹⁹ Inso i kota atuu irakoo asa mia pegawai langkanae anu pinotoro gagi petewawado sorodadu ka olima mia puu pompekakaakodo mokole anu hinawe i kota atuu, saru puu mpoburino tadulako sorodadu anu wawa ira palili gagi sorodadu ka nomo pulu mia inso a mpalili anu hinawe i kota atuu.

²⁰ I Nebusaradani, petewawado sorodadu puu mpodagai, rumako ira ka wawa ira ndi mokoledo to Babeli i kota Ribela.

²¹ Ka i'amba mokoledo to Babeli metena mepate ira i kota Ribela, i wita Hamati. Kanandiomo domewinawa to Yehuda inso i witado a laro pontadia.

I Gedalia gagi guberenuu ka pinepate

²² A mpalili anu da tepo'ia i wita Yehuda anu binintano, i Nebukanesa mokole i Babeli, motoroo i Gedalia anano i Ahikami anano i Sapani.

²³ Luwuno tadulako sorodadu saru luwuno miano merongeo nine i Gedalia dopotoroomo mokole i Babeli. Ka i'amba luwudo, onaemo i Isumaeli anano i Netania, i Yohanani anano i Kareahi, i Seraya anano i Tanahumeti, to Netopa atuu, ka i Ya'asania, anano asa to Ma'aka, melako i Misipa tepohaweakono i Gedalia.

²⁴ Ka i'amba i Gedalia mesumpa ndi ondae ka miado, ipotaeako ira, ”Siimo imedoitoako ira pegawaino to Kasidimi atuu. Impo'iamo i wita andio ka mpetenunumo ndi mokole i Babeli, ka tamo moiko tumuwumiu.”

²⁵ Sine ia wula ko'opitu haweomo i Sumaeli anano i Netania anano i Elisama, asa mia ulea mokole ka hopulu mia perongano. Dompepateo i Gedalia, luwuno to Yehuda ka to Kasidimi anu kongko saru onae i Misipa.

²⁶ Ka i'amba luwuno palili, inso anu kodei hawe anu langkai, saru luwuno tadulako sorodadu mpopari-pari melako i Masiri, hangano medoito ira a nto Kasidimi atuu.

I Yoyakini mohawe pompehohawa

²⁷ A nta'u kotolu pulu ka opitu umarino tinadi i Yoyakini mokole i Yehuda, ia wula kohopulu ka orua, tanggala rua pulu ka opitu wula atuu, i Ewili-Merodaki mokole i Babeli, a nta'u ipewuatako a ngkadera poparentaa, mopokitao pompehohawano ndi Yoyakini, mokole i Yehuda, ka ipotolaomo inso a ntorongku.

²⁸ I Ewili-Merodaki mepau momoiko ndi onae ka moweeakono potorono anu lalu mantande sekonopo potorodo luwuno mokole anu perongano i Babeli.

²⁹ Onae ineheako mo'uo sangka torungkuno ka ineheako mbo'u mongkaa i arodo mokole asa ntinuwuno.

³⁰ Gagi pepotuwuno, ondae mokole wela moweeakono pototono anu kinereno sompo oleo asa ntinuwuno.