2 Mokole 1 - Wunta Mempori

I nabi Elia pauo mateno i Ahasia

¹ Umarino mate i Ahabi, onaemo ka dompe'ewamo to Moabi a nto Isaraeli.

² Ia asa oleo i Ahasia tedonta inso a ntarali i bolongkono i wawono anu mo'ia i Samaria, ranta kai mahaki. Ka i'amba tumena ira mia saru pe'oliwi, ”Imelakomo, impesikenomo ndi Baala-Sebubi, anu pinesombai i Ekeroni, ke aku koa tompa inso a haki andio.”

³ Sine mala'eka-Do i Ue mepau ndi Elia, to Tisibe, ”Lakomo pontuturako tepohaweako ira mia tinenano mokoledo to Samaria ka pauako ira: Nde nahina ke Ue Ala i Isaraeli, ranta ka komiu melako mpesikeno ndi Baala-Sebubi, anu pinesombai i Ekeroni?

⁴ Onaemo pu'uno kanandiomo pau-Do i Ue: Omue nahi kometii mbo'u inso a mpoturia pepomboleamu, hangano omue manasa komate.” Ka i'amba lumako i Elia.

⁵ Mansado mpekule mia tinena atuu ndi mokole, ipotaeako ira, ”Tembio kai mpekulemo?”

⁶ Domesangkio, ”Hinao mia hawe tepohaweakami ka ipotaea kami: Impekulemo ndi ondae mokole anu tumena komiumo ka imempauako ira: Kanandiomo pau-Do i Ue: Nde nahina ke Ue Ala i Isaraeli, ranta kai petena mesikeno ndi Baala-Sebubi, pinesombai i Ekeroni? Onaemo pu'uno nahi komiu metii mbo'u inso a mpoturia pepomboleamiu, hangano omue manasa komate.”

⁷ Onae mesikeno ndi ondae, ”Kana'umpe rupano mia anu aiwa tepohaweakomiu ka ipauo pau andio ndi omiu?”

⁸ Domesangkio, ”Asa mia anu mesangkaako sangka wulu ka peboo kuli ipebooako a ntongano.” Motae mokole, ”I Elia atuu, to Tisibe!”

⁹ Ka i'amba mokole tumenao asa petewawa sorodadu saru lima pulu ana buano ndi Elia. Petewawa sorodadu atuu mewuatako tepohaweakono i Elia anu tekonai mentoro a punsuno torukuno ka ipotaeakono, ”Tetenaa-Do Ue Ala, dopotae mokole: Petiimo!”

¹⁰ Sumangki i Elia a mpetewawa sorodadu atuu, ”Tewala ongkue tetenaa-Do Ue Ala, po'ineeomo kai petii api inso i langi kai pingko ikaako saru lima pulu ana buamu.” Ka i'amba metiiomo api inso i langi kai pingko ikaano onae saru lima pulu ana buano.

¹¹ Ka i'amba mokole montena mbo'u ndi onae asa petewawa sorodadu susua saru lima pulu ana buano. Ipotae ndi Elia, ”Tetenaa-Do Ue Ala, kanandiomo paudo mokole: Pontuturakomo petii!”

¹² Sine sumangki i Elia ndi onae, ”Tewala ongkue tetenaa-Do Ue Ala, Po'ineeomo kai petii api inso i langi kai pingko ikaako saru lima pulu ana buamu.” Onaemo kai petii api-Do Ue Ala inso i langi kai pingko ikaano onae saru lima pulu ana buano.

¹³ Ka i'amba mokole tumenao mbo'u petewawa sorodadu anu ko'otolu saru lima pulu ana buano. Petewawa sorodadu anu ko'otolu atuu mewuatako ka mansano hawe, onae menggolontu i arono i Elia, saru mo'ema pompehohawa ndi onae, ipotae, ”Oo tetenaa-Do Ue Ala, po'ineeomo penaaku saru penaado luwuno atamiu andio mentudu a pongkitamiu.

¹⁴ Kombake metiiomo api inso i langi kumaano orua petewawa sorodadu anu tese'elu pingko saru lima pulu ana buado? Sine kanandio-andio po'ineeomo penaaku mentudu a pongkitaamiu.”

¹⁵ Mala'eka-Do i Ue mepau ndi Elia, ”Petiimo meronga saru onae, si doitoakono!” Ka i'amba i Elia mentade ka ipetii meronga saru onae me'aro ndi mokole.

¹⁶ Motae i Elia ndi mokole, ”Kanandiomo pau-Do i Ue: Hangano itena iramo mia mo'ema pontiso ndi Baala-Sebubi anu pinesombai i Ekeroni, kana nahina Ue Ala i Isaraeli kai pinesikenoako pau-Do. Onaemo pu'uno nami komiu mewangu mbo'u inso a mpoturia pepomboleamiu, hangano manasa komiu mate.”

¹⁷ Ka i'amba mateomo mokole menunu saru pau-Do i Ue anu pinohaweno i Elia. Ka i'amba i Yorami gagi mokole umeuo a nta'u ko'orua poparentaano i Yorami anano i Yosapa, mokole i Yehuda, hangano i Ahasia nahina anano tama.

¹⁸ Anu susua inso a nteweweuno i Ahasia, hapa anu wineweuno, kombake luwuno atuu teburi a wunta tutuludo luwuno mokole i Isaraeli?