2 KORINTI 7 - Wunta Mempori

¹ Pepaekompo anu pinehohawaku, hangano ontae kanandio-andio mehaweo luwuno dandi atuu, aiwamo tompokomemporio koroito inso a luwuno anu kumokoburutio koroi ntolino ka rohani, ka ba kanandio mokobobotolio memporiato doitoako Ira Ue Ala.

Mawongkoa umari mompemasusa 7:2-16

² Imentarima kamimo i laro aroamiu! Nahi kimehori sala mpoweweu maupo a asa mia, nahina maupo te'asa mia anu pinokorugimami, ka nahi kimpo'ungke uramami maupo inso a mia te'asa.

³ Kupepau kanandio, komba ndio aku mokonsala komiu, hangano hieno kupauomo, nine ndio komiumo i laro aroamami, ranta ka tompe'asa aroa mentuwu ka memate.

⁴ Kupauo ntu'u a menteeano ndi omiu; sine tedoa mbo'u kupo'undeakomiu. A laro luwuno marasaiamami tetarero aku ntu'u ka tedoa aku ntu'u mo'unde.

⁵ Tamoako tempono kimehawe i Makedonia, nahina penaa-naano koroimami. I sua-suamo koa mpompembasai kami masusaa: inso i bungkuno pe'u'uaa ka inso i larono doitoa.

⁶ Sine Ondae Ue Ala, anu montarero mia anu me'urumako, Dotarero kamimo haweno i Titu.

⁷ Komba butu hangano haweno, sine hangano mbo'u pontarero anu hinaweno inso ndi omiu. Hangano ipauakamimo mongkona tekewoimiu, pinemasusamiu, bobotolino aroamiu umala-alaakune, onaemo ka itetiangi po'undeku.

⁸ Gaagi maupo kupokomasusaomo aroamiu a wuntaku atuu, sine nahi kupe'o'oleakono. Lano hori aku me'o'oleakono, hangano kukitao, nine wunta atuu mokomasusao aroamiu – maupo kanatuu sarai koa –,

⁹ sine kanandio-andio mo'unde aku, komba hangano mpompemasusa komiumo, tendeano hangano pompemasusamiu weweu komiu ntepidi. Hangano pompemasusamiu atuu onaemo montonda po'ehe-Do Ue Ala, ranta nahina marugimiu maupo tedei hangano omami.

¹⁰ Hangano pompemasusa montonda po'ehe-Do Ue Ala mompokotepidi anu mowawa tekaduduia ka anu nahi ta pine'o'oleako, sine pompemasusa anu inso i wawontolino andio mowawa matea.

¹¹ Hangano impepenteeo tendeano pompemasusa anu montonda po'ehe-Do Ue Ala atuu umanggao ndi omiu pompesu'ui anu langkai, maupo pepokomentee, o'alia, doitoa, tekewoi, anggaa, pohukua! I larono luwuno atuu impopokitaomo, nine nahina salamiu.

¹² Onaemo pu'uno, tewala kupoburiakomiumo wunta, ka komba hangano mia moweweu anu sala, ke hangano mbo'u mia anu marasaiako poweweu anu sala, tendeano ka igagi mengkaa ndi omiu i aro-Do Ue Ala moputeno aroamiu ndi omami.

¹³ Onaemo pu'uno ka kigagi ntetarero. Ka umarino pontarero anu hinawemami atuu, laluaopo mbo'u po'undemami hangano po'undeno i Titu, hangano luwumiu mpokorosoakono aroano.

¹⁴ Kumawongkoakomiu ndi onae, ka komba impokoko'ii aku. Omami wela mpompau hapa anu mentee ndi omiu, kanandio koa mbo'u mawongkomami i arono i Titu mengkaaomo mentee.

¹⁵ Ka pompehohawano koteti-tetiangino ndi omiu, tewala irambeo pomperorongeakomiu luwu, kana'umpe imentotowoo haweno saru doito ka mpondidi-ndidi.

¹⁶ Mo'unde aku, hangano kupokomperorohi komiu a luwuakoano.