2 KORINTI 6 - Wunta Mempori

I Paulu a laro pompekakaakono 6:1-10

¹ Gagi wali-wali mpe'asa mpo'angga, kime'emao ntu'u ndi omiu, ka si meweweuo gagi nahi mentudu pompehohawa-Do Ue Ala, anu imentarimaomo.

² Hangano mepau Ira Ue Ala, ”I tempono Kupemoikoo, Aku merorongeakomu, ka a oleo Kupongkadudui, Aku tumulungiko.” Menteeano, tempo andio onaemo tempo pinemoiko atuu; menteeano, oleo andio onaemo oleo pongkaduduia atuu.

³ Maupo a laro mongkona hapa nahi kimpompau pu'uno mia ka itetidu, ka si mansa tinata pompekakaakomami.

⁴ Tendeano, a laro luwuakoano kimempopokitao, nine omami puu pompekakaako-Do Ue Ala, onaemo: alaro pompetea anu bukeako sabaraa a laro marasaia, ma'isoa ka masukaraa,

⁵ monsusuru kona nsepi, a laro torungku ka marisua, a mpe'iseia mo'angga, petangkoromo ka puasa;

⁶ a molinono aroa, ponto'ori, sabaraa, ka pe'aroa; a laro Mpenaa Mempori ka pompehohawa anu nahi po'onde-onde;

⁷ a pompalelea menteea ka pabawa-Do Ue Ala; memparewa mpeteaako moleoa monsapoi ke maupo mo'alaako

⁸ tempono pinelangkai ka tempono pinokongkodei; tempono pinepaukiako ke tempono inunde-unde; tempono tinuluri mompopo'oo, sine pine'ala-ala,

⁹ kana mia anu nahi tino'ori, sine teto'ori; kana mia anu ilawu mate, ka mentee ntu'u mentuwu kami; kana mia anu tinunduhi, sine nahi kimemate;

¹⁰ kana mia anu mompemasusa, sine memawongko mpiha, kana mia mongkokolaro, sine mompokokaea hadio mia; kana mia anu nahina hapa-hapano, maupo luwuakoano hinao ndi omami.

Si hina mbo'u anu tetosa'aiako lambaha 6:11–7:1

¹¹ Hei to Korinti! Mpepau kamimo a menteeano ndi omiu, aroamami te'ungkahi malua ndi omiu.

¹² Ka omiu hinao po'ianga anu malua i laro aroamami, sine ndi omami butu tepatinda po'ianga anu ma'iso i laro aroamiu.

¹³ Ka kanandio-andio, ka tomambesulo – kupepau kana a luwuno anaku –: Ime'ungkahiomo aroamiu temalua ntu'u!

¹⁴ Si mengkana tarono anu nahi petoto saru mia anu nahi dompompe'ala-ala. Hangano hapake pengkenano anu hina i olono menteea ka lambaha? Ke kana'umpe mewine mokompe'asa saru wongi-wongi?

¹⁵ Hapake anu mengkena hinawe i olo-Do i Kerisituu ka i Beliali? Hapake pe'asaado mia mpompe'ala-ala saru mia anu nahi dompompe'ala-ala?

¹⁶ Hapake penggoeano raha-Do Ue Ala saru lahumoa? Hangano ontae onaemo raha-Do Ue Ala anu tuwu montonda pau-Do Ue Ala andio, ”Aku mo'ia me'asaako ira ka tuwu i tonga-tongado, ka Aku gagi Ue Alado, ka ondae gagi bawaa-Ku.

¹⁷ Onaemo pu'uno: Impeluarakomo inso i olodo, ka impensuaako iramo, pau-Do i Ue, ka si mpo'angga anu mokoburu, ka Aku tumarima komiu.

¹⁸ Ka Aku gagi Amamiu, ka komiu megagi ana-Ku tama ka ana-Ku beine ka kandiomo pau-Do i Ue, Anu Tedoa Pabawa.”