2 KORINTI 11 - Wunta Mempori

¹ Tedoa moiko, tewala mensabara komiu a benge-bengeku anu kodei atuu. Lano mensabara komiu ndi ongkue!

² Hangano kumosiriakomiu mosiri-Do i Ue. Hangano kupoposamborakomiumo a asa tama ka iwawa komiu kana ana beine moondo mempori ndi Ondae i Kerisituu.

³ Sine doito aku, ba mansa pinokontesaa pinewowolomiu inso a mpetenunumiu ntu'u ndi Ondae i Kerisituu, mengkena kana i Hawa pinopandeiako pe'akalano ule atuu.

⁴ Hangano butu komiu mensabara, tewala hinao mia hawe mompalele i Yesu anu susua sekonopo anu kimempaleleomo, ke moweeakomiu penaa anu susua sekonopo anu imentarimaomo ke Lele Mawongkoa anu susua sekonopo anu imentarimaomo.

⁵ Sine montonda pohaweku maupo tedei nahina makuraku sekonopo luwuno tinena anu nahina pengkenado atuu.

⁶ Tewala nahi kuponto'ori lahi mepau komba kanatuu mongkona a ponto'ori; hangano impokomengkaaomo ndi omiu a luwuno tempo ka a laro luwuakoano.

I Paulu nahi perioo koroino 11:7-33

⁷ Nde salake poweweuku, tewala me'urumako aku ka imempinelangkai, hangano kupaleleo ndi omiu, Lele Mawongkoa-Do Ue Ala nahi kupo'ema tambo?

⁸ Luwuno bawaa susua kurontu iramo hangano montarima akumo tiangino tambo inso ndi ondae, ka kupokompekakaakomiu!

⁹ Ka tempono ongkue a laro makuraa i tonga-tongamiu, nahina maupo te'asa mia pinokomasusaku, hangano hapa anu makura ndi ongkue, dompokosompoo pepaekompo anu mehawe inso i Makedonia. A luwuakoano kutangkoroo koroiku, ka si kupokonsusa komiu, ka aku koa mpiha moweweu kanandio.

¹⁰ Hangano mentee-Do i Kerisituu i laroku, kupokomanasao, nine mawongkoku atuu nahina ta benteio maupo isema i luwuno wita Akaya.

¹¹ Tembio ka naahi? Hangano nahi kupehohawa komiuke? Ondae Ue Ala tumo'orio.

¹² Sine hapa anu wineweuku, aku weweuo mpiha ka dompenaa-naa anu mpo'ungke sala ka dompotae, nine ondae pengkena saru omami a laro mongkona anu pinokomawongkoako.

¹³ Hangano mia atuudo tinena anu mpegaupi, anu mpo'angga pompopo'oo, anu mpo'onde-onde kana tinena-Do i Kerisituu.

¹⁴ Mongkona atuu siimo ikinohali-haliako, hangano maupo i Mosa'o mo'onde-onde kana mala'eka Mewine.

¹⁵ Gaagi komba ndio aasa anu kinohali-haliako, tewala puu pompekakaakono mpo'onde-onde kana puu pompekakaako menteea. Tampulaado ta menunu saru wineweudo.

¹⁶ Kuwalio mbo'u: si hina mia anu motaeakune benge-benge. Ka tewala mpotae komiu koa mbo'u kanatuu, imentarima akumo kana mia benge-benge ka imoiko kumawongko tedei.

¹⁷ Hapa anu pinauku, kupauo komba kana asa mia anu mepau montonda pau-Do i Ue, tendeano kana asa mia benge-benge anu hinao pompe'ala-alano, nine moiko imawongko.

¹⁸ Hangano hadio mia anu mawongko montonda tolino, ongkue mbo'u mingki mawongko.

¹⁹ Nde inehemiu mensabara a mia benge-benge, hangano mempande komiu ntu'u mposongka:

²⁰ hangano mensabara komiu, ba dompe'ata komiu mia, ba dome'alao mia anu komba tiado inso ndi omiu, ba domempabawai komiu mia, ba dompompelangka-langkaiakomiu, ba domempede komiu mia.

²¹ Saru tedoa mokoko'ii asalakono kumangakuakono, nine mongkona anu kanatuu memolema kami lahi. Sine tewala mia susua memosia pompelangka-langkaiako hapamo koa, ka ongkue mbo'u – kupepau a laro benge-benge – mosia aku koa!

²² Nde to Ibarani irake? Ongkue mbo'u to Ibarani! Nde to Isaraeli irake? Ongkue mbo'u to Isaraeli. Nde inuleno i Burahimake ondae? Ongkue mbo'u inuleno i Burahima!

²³ Nde puu pompekakaako-Do i Kerisituu ondae atuuke? – mepau aku kana mia mekombe – lalua akupo mbo'u! Hadioopo pe'iseiku; mararuopo a laro torungku; sinepi komba da sa'uno; mararu ilawu mate.

²⁴ Pelima domebobarasai aku to Yahudi, sompo dompesepi pato pulu inonini aasa ponsepi,

²⁵ pentolu kusinepi, pohona kuwinunoako watu, pentolu mompembasai kapala toondu, asa oleo asa wongi kukolonto-lonto a ntonga ntahi.

²⁶ A pelempaaku mararu ipokodoito aku mongkokongirino moowo ka mongkokongirino anu mperontu, mongkokongiria inso a to Yahudi ka inso anu komba to Yahudi; mongkokongiria a ngkota, mongkokongiria i pada one, mongkokongiria a ntonga ntahi, ka mongkokongiria inso a mpepaekompo anu mpo'onde-onde.

²⁷ Hadio pe'iseiku ka mo'angga mobea; mararu nahi kupoturi; mokoninggo aku ka mokoranga; mararu kupuasa, mokoseo ka nahi kupesangka,

²⁸ ka, hadio anu susuano mbo'u nami kupauo, anggaaku sompo oleo, onaemo mekakaako ira luwuno bawaa.

²⁹ Tewala hinao mia mompemolema, nde nahi aku tetondake mompemolema? Tewala hinao mia tetidu, nde nahi ta masusake aroaku hangano masusaa?

³⁰ Tewala asalakono aku mawongko, ka aku mawongko a molemaku.

³¹ Ondae Ue Ala, Ama-Do i Yesu, Ueto, anu inunde-unde ranta nahina tampulaano, tumo'orio, nine nahi kupegaupi.

³² I Damasi petewawa i witado mokole Aretasi metena dumagaio kotado to Damasi ka domerako aku.

³³ Sine ongkue pinotii inso a aasa pentangoa a laro aasa pinda'a hawe i bungkuno rere watuno kota ka kanandiomo kutola inso a ngkaeno.