2 KORINTI 10 - Wunta Mempori

Mate tuwuno i Paulu 10:1-11

¹ Ongkue, i Paulu, asa mia anu nahi sapa tewala tepo'aroakomiu, sine mosia ndi omiu tewala tepo'olai, kupopoto'oriakomiu a nee-Do i Kerisituu anu mauru ka me'aroa.

² Ku'emao ndi omiu: si medadai aku ka kupopokitao mosiaku tewala tepo'umpeda, kana tinooku tekudaako ira mia anu potaedo, nine mentuwu kami montonda tuwu ntolino.

³ Lano da mentuwu kami i wawontolino, sine komba kimpo'angga montonda tuwu ntolino,

⁴ hangano parewa mpeteamami a laro mpeteahako komba parewa mpetea ntolino, tendeano parewa mpetea anu pinokorosoako pabawa-Do Ue Ala, anu polio humoao luwuno bente.

⁵ Kimengkale-kaleo sompo pe'akalano mia ka mobangkuo sompo bente anu winanguno pompelangka-langkaino mia anu umewaio ponto'ori mongkona Ondae Ue Ala. Kimempabawaio luwuno pinewowolo ka mokompetuunduo ndi Ondae i Kerisituu,

⁶ ka mpepatinda kami koa mbo'u mehukuo sompo pe'ewaa, tewala mpetonda komiumo ntu'u.

⁷ Imengkitaomo anu mengkaa i arono matamiu! Tewala hinao asa mia anu memanasao, nine onae mia-Do i Kerisituu, asalakono ka ipompewowolo i laro aroano, nine omami mbo'u mia-Do i Kerisituu mengkena kana onae.

⁸ Tendeano, tewala laalo tedei kumawongkoakono pabawa, anu Dowee kami i Ue ka kimpowangu ka komba ka kimengkale-kale komiu, ka i larono mongkona atuu nahi aku mohawe mokoko'ii.

⁹ Sine nahi kubehe tengkita kana kupokodoitoakomiu luwuno wuntaku.

¹⁰ Hangano, dompotae mia, luwuno wuntano lano manasa ka me'ihi, sine tewala tepo'aro rupa onae telusa ka luwuno pinauno nahina pengkonaano.

¹¹ Sine moikoano mia anu mpotae kanandio ka domempokonto'orio, nine wineweumami, tewala ntepo'aro rupa, mengkena kana pinaumami a laro wuntamami, tewala nahi tontepo'aro rupa.

Pohaweno i Paulu mongkona koroino 10:12–11:6

¹² Lano nahi kimensapa me'alu doao koroimami ke mpengkenaako ira mia mehano anu me'unde-undeo koroido ondaedo. Ondae mesongkaakono posongkado ondaedo koroido ka mpongkenao koroido saru koroido ondaedo! Tedoa iramo mebenge-benge!

¹³ Sine omami nahi kimebehe memawongko komba da sa'uno, tendeano a luwuno koa mpiha tidano anggaa anu Dopakosiakami Ue Ala, anu tepalele hawe koa mbo'u ndi omiu.

¹⁴ Hangano a pompalelea Lele Mawongkoa mongkona Ondae i Kerisituu mehawe kamimo ndi omiu, ranta nahi kimelaloo tidano po'anggaamami, kana napi kimehawe ndi omiu.

¹⁵ Nahi kimpehamba-hambaako anggaa anu wineweudo mia susua i wita mpo'anggaa anu nahi kimempinakosiako. Sine kimperorohio, nine tewala pompe'ala-alamiu koteti-tetiangino, kami mpohawe pompelangkai lalu langkai mbo'u i olomiu, tewala pinongkenaako saru wita po'anggaa anu kimempinakosiako.

¹⁶ Oo, mentuwu kami, ka kimpokopaleleo Lele Mawongkoa a luwuno wita anu lalu olai sekonopo witamiu ka nahi kimemawongkoakono luwuno hasilino anu hinawedo mia susua i wita po'anggaa anu domempinakosiako.

¹⁷ ”Sine ba isema mawongko, ka imawongkomo ndi Ondae i Ue.”

¹⁸ Hangano komba mia anu umunde-undeo koroino anu monangi, tendeano mia anu inunde-unde-Do i Ue.