1 Tawarika 28 - Wunta Mempori

Pontinosono i Daudi ndi Salomo mongkona powangua Raha Mempori

¹ I Daudi pumpu ira luwu anu langkai potorodo a nto Isaraeli i Yerusale, onaemo luwuno petewawa suku, luwuno petewawa bawaano luwuno mia anu mpekakaako ira mokole, luwuno petewawa sorodadu asa nsowu ka petewawa sorodadu asa etu, luwuno mbo'u puu mpo'atora arataa saru pinotuwudo mokole ka luwuno anado; saru mbo'u luwuno pegawai langkanae, luwuno sorodadu anu langkai potorono ka luwuno puu mpetea anu moroso ka mosia.

² Ka i'amba mentadeomo mokole Daudi ka dopotae, ”Imerongeomo oo luwuno pepaekompoku ka tongkuku! Tinooku mowangu raha penaa-naaano Burua Pedandia-Do i Ue ka pelandaano karu-Do Ue Alato. Kupatindaomo wanguno.

³ Sine Ondae Ue Ala mepau ndi ongkue, ’Nahi kowanguo rahano nee-Ku, hangano omue sorodadu ka mo'uwukomo rea.’

⁴ Sine Ondae i Ue, Ue Alado to Isaraeli, Dobiniki akumo inso i olodo luwuno pe'etuku gagi mokoledo to Isaraeli ranta nahina tampulaano. Hangano Dobinikiomo i Yehuda gagi petewawa ka pe'etuku inso i olodo suku Yehuda ka inso i olodo luwuno anado amaku Dopemoikoo kupinotoro gagi mokole a luwuno Isaraeli.

⁵ Inso i olodo luwuno anaku, hangano Dopowee akumo i Ue hadio anaku, Dobinikiomo anaku i Salomo kai pentoro a wawo ngkadera poparentaa-Do i Ue a nto Isaraeli.

⁶ Mepau Iramo ndi ongkue, ’i Salomo anamu, onaemo anu ta wanguo raha-Ku ka kintala-Ku, hangano Kubinikiomo gagi ana-Ku ka Aku gagi Amano.

⁷ Aku mokorosoo poparentaano ranta nahina tampulaano, tewala onae metenunu weweuo luwuno parenta ka atora-Ku kana kanandio-andio.’

⁸ Kanandio-andio, i arono matado luwuno to Isaraeli, bawaa-Do i Ue ka Dorongeo Ue Alato, mepau aku ndi omiu: Impekariaomo temenoo luwuno parenta-Do i Ue, Ue Alamiu, ka ikongko koa mpiha mpetorokio wita anu moiko andio ka imeweeako ira luwuno anamiu anu lembuino ranta nahina tampulaano.

⁹ Ka omue anaku Salomo, to'oriomo Ue Alano amamu ka pesombamo ndi Ondae tompaano aroa ka bobotoli aroamu, hangano Ondae i Ue paresao sompo aroa ka tumo'orio sompo tinoo. Tewala omue umungke Ira, kohumawe Ira, sine tewala omue binta Ira, Ira tumadiko ranta nahina tampulaano.

¹⁰ Kanandio-andio penootiomo, hangano Dobinikikomo i Ue komowangu asa raha gagi po'ianga mempori. Pokorosoomo aroamu ka weweuomo atuu.”

¹¹ Ka i'amba i Dadi meweengakono ndi Salomo, anano, gambara wanguno tambi ka luwuno bolongkono, inso a ponaapa arataano, luwuno bolongko i wawono ka i larono ka inso a bolongko po'iangano ulo pesintuwua.

¹² Ipeweengakono mbo'u songka wanguno inso a luwuno anu pinewowolono mongkona kintalano raha-Do i Ue ka luwuno bolongko anu lumimbuo, luwuno ponaapa arataano raha-Do Ue Ala ka ponaapa sangka mempori;

¹³ mongkona luwuno bawaado sando mpesomba ka to Lewi ka mongkona luwuno anggaa a mpesombaa i raha-Do i Ue saru luwuno parewa mpesomba a raha-Do i Ue;

¹⁴ mongkona mbo'u mobeano wulaa anu kinere a luwuno parewa a sompo-sompo pesombaa ka mobeano salaka anu kinere a luwuno parewa salaka a sompo-sompo pesombaa,

¹⁵ mobeano wulaa weweua luwuno hulu mekaru inso a wulaa ka luwuno hulu wulaano, montonda mobeano anu kinere sompo hulu mekaru ka luwuno huluno, ka salaka weweua holu mekaru salaka montonda mobeano anu kinere weweua sompo hulu mekaru ka luwuno huluno, menunu saru pompakea sompo hulu mekaru a laro mpesombaa,

¹⁶ ka i'amba mobeano wulaa weweua luwuno meda roti pesomba, sompo meda ka mobeano salaka weweua luwuno meda inso a nsalaka;

¹⁷ ka i'amba mobeano wulaa mpena weweua luwuno sarampa, loea kodei ponsiwui saru loea kodei inso a wulaa mpena ka weweua luwuno tonde wulaa mekaru montonda mobeano anu kinere weweua sompo piala, ka mobeano salaka weweua tonde salaka mekaru montonda mobeano anu kinere weweua sompo-sompo tonde;

¹⁸ mobeano mbo'u wulaa anu wineweu gagi wulaa mpena weweua meda pontunua dupa montonda mobeano anu kinere kanatuu koa mbo'u gambarano kareta anu gagi pelandaano orua kerubi wulaa anu wileo panino borungio Burua Pedandia-Do i Ue.

¹⁹ ”Luwuno atuu hinawe a laro binuri anu Dotisoakune i Ue, me'ihi pontiso mongkona luwuno weweuano songka atuu.”

²⁰ Ka i'amba motae i Daudi ndi Salomo, anano, ”Pokorosoomo aroamu ka weweuomo atuu, siimo doito ka siimo itelusa aroamu, hangano Ondae Ue Ala, Ue Alaku, kumongkomiko. Nahi Ira mo'ineeko ka bintako ranta ka i'umari luwuno anggaa a mpesombaa i raha-Do Ue Ala.

²¹ Menteeano, hinao bawaado sando Mpesomba ka to Lewi anu molempao luwuno pesomba a raha-Do Ue Ala ka hinao ndi omue luwuno mia mpo'angga nahi domentinambo anu tedoa pande a laro sompo anggaa. Luwuno mbo'u petewawa ka luwuno palili mporonge parentamu.”